អាជ្ញាធរចុះសិក្សាផលប៉ះពាល់គម្រោងសង់ស្ពានបាឡេឆ្លងកាត់ទន្លេបាសាក់ថ្មី

អាជ្ញាធរខណ្ឌច្បារអំពៅរាជធានីភ្នំពេញបានចុះសិក្សាពីផលប៉ះពាល់នៃការពង្រីកផ្លូវដែលតភ្ជាប់ពីស្ពានបាឡេឆ្លងកាត់ទន្លេបាសាក់តភ្ជាប់ពីសង្កាត់ព្រែកប្រាខណ្ឌច្បារអំពៅឆ្ពោះទៅសង្កាត់ចាក់អង្រែក្រោមខណ្ឌមានជ័យរាជធានីភ្នំពេញ។

លោក ជា សុខៃ ចៅសង្កាត់ចាក់អង្រែក្រោមបានឲ្យកម្ពុជាថ្មីដឹងថា គល់ស្ពានបាឡេដែលគ្រោងសាងសង់នាពេលខាង​មុខនេះ គឺស្ថិតនៅចំភ្លើងស្តុបមុខវត្តចាក់អង្រែក្រោម ជាប់ក្រុមហ៊ុន ប៉ាតេ ៩៩៩ ឆ្ពោះទៅផ្លូវ៦០ម៉ែត្រកាត់​ផ្លូវជាតិ​លេខ២។

លោក ងឹន ធីរ៉ូ សង្កាត់ព្រែកប្រាបានឲ្យដឹងដែរថា ស្ពានបាឡេដែលគ្រោងសាងសង់មកព្រែកប្រាគឺស្ថិតនៅចន្លោះ​ភូមិព្រះពន្លា និងភូមិព្រែកតាពៅ(ផ្លូវកុងស៊ីកាប់ជ្រូក)ខាងជើងផ្សារជនជាតិឥស្លាមព្រែកប្រា ក្នុងខណ្ឌច្បារអំពៅរាជ​ធានីភ្នំពេញ។ នៅថ្ងៃទី២៤ខែកញ្ញានេះមន្ត្រីជំនាញរបស់សាលាខណ្ឌច្បារអំពៅ និងខណ្ឌមានជ័យបាន​ចុះសិក្សា​លើផលប៉ះពាល់ក្នុងពេលដែលក្រុមសាងសង់ចុះមកបើកការដ្ឋានធ្វើស្ពាន និងពង្រីកផ្លូវ។

ក្នុងពេលដែលក្រុមជំនាញចុះមកសិក្សាលើផលប៉ះពាល់នេះប្រជាពលរដ្ឋអមសង្ខាងផ្លូវមានសេចក្តីត្រេកអរបើទោះជាប៉ះពាល់ដីមុខផ្ទះ ព្រោះបានស្ពានឆ្លងកាត់ទន្លេបាសាក់ដែលរាល់ថ្ងៃលំបាកក្នុងការធ្វើដំណើរឆ្លងកាត់ស្ពានព្រះមុនីវង្សថ្មី ចាស់ដែលកកស្ទះរាល់ថ្ងៃនេះ ពិសេសនោះមានផ្លូវ មានស្ពាន វិស័យអចលនទ្រព្យក៏ឡើងថ្លៃផងដែរ។

គម្រោងស្ពានព្រែកប្រា-ចាក់អង្រែ ត្រូវបានក្រសួងសារធារណការ និងដឹកជញ្ជូន បញ្ចប់ការសិក្សារួចរាល់ហើយ គ្រោងបើកការដ្ឋានសាងសង់នៅពេលឆាប់ៗខាងមុខនេះ។ 

សម្តេច ហ៊ុន ម៉ាណែត នាយករដ្ឋមន្រ្តីកម្ពុជា និងលោក លី ឈាង នាយករដ្ឋមន្រ្តីចិន បានអញ្ជើញជាអធិបតី ក្នុងពិធីចុះហត្ថលេខាលើកិច្ចព្រមព្រៀងឥណទានសម្បទានសម្រាប់គម្រោងសាងសង់ស្ពានទន្លេបាសាក់(ចាក់អង្រែក្រោម-ព្រែកប្រា) កាលពីពេលថ្មីៗនេះ នៅប្រទេសចិន។

សូមបញ្ជាក់ថា គម្រោងស្ពាននេះ ត្រូវបានសិក្សាបញ្ចប់ដោយក្រុមហ៊ុនចិន Shanghai Construction Group Co.,Ltd. (SCG) ដែលទទួលបានថវិកាពីរដ្ឋាភិបាលចិន។

ស្ពានឆ្លងពីចាក់អង្រែទៅព្រែកប្រានេះ ស្ថិតនៅខណ្ឌមានជ័យ មានប្រវែងបណ្ដោយជាង៨០០ម៉ែត្រ បែងចែក​ដល់ទៅ៤គន្លង (២ទៅ-២មក) ដើម្បីកុំឱ្យស្ទះចរាចរណ៍លើស្ពាន។ គម្រោងស្ពានព្រែកប្រានេះដែរ មានតម្លៃ​ប្រមាណ៦០លានដុល្លារអាមេរិក៕​

អត្ថបទ ៖ នរា