តុលាការសហរដ្ឋអាមេរិក បានដោះលែងលោក គ្រី ម៉ះផល ឱ្យនៅក្រៅឃុំបណ្តោះអាសន្ន ព្រឹកនេះ

នៅព្រឹកថ្ងៃទី២៨  ខែធ្នូ  ឆ្នាំ២០២២នេះ  ត្រូវនឹងល្ងាចថ្ងៃទី២៧  ខែធ្នូ  ម៉ោងនៅសហរដ្ឋអាមេរិក  លោក  គ្រី  ម៉ះផល ប្រធាននាយកដ្ឋានសត្វព្រៃ និងជីវចម្រុះ នៃរដ្ឋបាលព្រៃឈើ ត្រូវបានដោះលែងឱ្យនៅក្រៅឃុំជាបណ្តោះអាសន្ន  បន្ទាប់ពីបានឆ្លងកាត់ការតស៊ូតាមផ្លូវច្បាប់ ដ៏ស្វិតស្វាញ  ដោយមានមេធាវីអាមេរិកចំនួន២រូប ជួយការពារក្តី  នៅតុលាការអាមេរិក  តាមរយ:ការជួយជ្រោមជ្រែងចាំបាច់  និងទាន់ពេលវេលាពីស្ថានទូតកម្ពុជាប្រចាំសហរដ្ឋអាមេរិក  ក្រសួងការបរទេស  និងសហប្រតិបត្តិការអន្តរជាតិ និងរាជរដ្ឋាភិបាលកម្ពុជា។ នេះបើតាមការជូនដំណឹងរបស់ក្រសួង​កសិកម្មកម្ពុជា។

បើតាមក្រសួងកសិកម្ម ការធានាបាននូវយុត្តិធម៌សម្រាប់មន្ត្រីកម្ពុជាទាំងអស់  រួមទាំងលោក គ្រី ម៉ះផល ដែលជួប​បញ្ហាក្នុង​ពេលបំពេញបេសកកម្មនៅបរទេស ដើម្បីផលប្រយោជន៍ជាតិ   គឺជាកាតព្វកិច្ចរបស់ រាជរដ្ឋាភិបាលកម្ពុជា។

ក្រសួងបានគូសបញ្ជាក់ថា នេះគឺជាជំហានដ៏វិជ្ជមានមួយដែលទើបសម្រេចបាន  និងជាដំណឹងដ៏រីករាយ  សម្រាប់លោក ម៉ះផល  និងក្រុមគ្រួសារ  ជាពិសេសកូនៗរបស់លោក  ក្រោយពីបែកគ្នា  និងខកខានមិនបានទាក់ទងគ្នា  អស់រយ:ពេលជាងមួយខែកន្លងមក។

ករណីលោក ម៉ះផល នឹងត្រូវឆ្លងកាត់នីតិវិធីតាមផ្លូវតុលាការ  ជាបន្តបន្ទាប់ទៀត នៅសហរដ្ឋអាមេរិក។  រាជរដ្ឋាភិបាលកម្ពុជា នឹងបន្តផ្តល់ជំនួយផ្លូវច្បាប់  និងការគាំទ្រចាំបាច់ដល់លោក ម៉ះផល  រហូតសំណុំរឿងនេះ​ឈានដល់ទីបញ្ចប់  ដើម្បីស្វែងរកយុត្តិធម៌ ជូនលោក។

សូមបញ្ជាក់ថា មន្ត្រីជាន់ខ្ពស់កម្ពុជា ២រូប ក្នុងចំណោមមនុស្ស៨នាក់ ត្រូវបានក្រសួងយុត្តិធម៌អាមេរិក ចោទប្រកាន់ក្នុងសំណុំរឿងជួញដូរសត្វស្វាក្តាម ដែលគេស្គាល់ថា ជាពូជសត្វព្រៃដ៏កម្រ និងជិតផុតពូជ ចូលទៅទឹកដីអាមេរិក៕