លោកឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យ ផ្តល់ដំបូន្មាន សម្រាប់អ្នកចង់ វិនិយោគ គប្បីត្រូវសិក្សាស្វែងយល់ពីទីផ្សារពិភពលោក ឱ្យបានច្បាស់លាស់ជាមុនសិន និងត្រូវចេះគ្រប់គ្រងផល វិនិយោគ​របស់ខ្លួនឯង។

ក្នុងវេទិកាអ្នកជំនាញសប្តាហ៍នេះ ដែលរៀបចំដោយកម្ពុជាថ្មី អ្នកជំនាញអចលទ្រព្យរូបនេះ ពន្យល់ថា បើសិនជាមាន​លុយ​នៅ​ក្នុងដៃ ១០ម៉ឺនដុល្លារ ត្រូវដឹងថា ក្នុងនោះមានទៅលើអលចនទ្រព្យប៉ុន្មានភាគរយ មាននៅលើអាជីវកម្ម ពាណិជ្ជកម្ម​ប៉ុន្មានភាគរយ ហើយមានទៅក្នុងប័ណ្ណភាគហ៊ុនមូលបត្រប៉ុន្មានភាគរយ។ ក្នុងនោះ អ្នកជំនាញណែនាំថា បើការវិនិយោគមួយណា ប្រឈមហានិភ័យខ្ពស់ជាងគេ គឺត្រូវកំណត់វាឱ្យទាបជាងគេបំផុត។

តាមការគូសបញ្ជាក់របស់លោកឧកញ៉ា ឃាង ពុទ្ធី ក្រុមហ៊ុនធំៗ ដែលមានលុយខ្ទង់ពាន់លានដុល្លារ ជាអ្នកគ្រប់គ្រងតម្លៃ​អចលនទ្រព្យ នៅលើពិភពលោក ដែលលុយនោះទៀតសោត មិនមានជាប់ការប្រាក់ធនាគារណានោះឡើយ។ អ្នកជំនាញរូបនេះ បានបើកបង្ហាញយុទ្ធសាស្ត្រនៃការដើរទីផ្សារអចលនទ្រព្យ របស់ក្រុមហ៊ុនធំៗទាំងនោះថា ដំបូងឡើយ គេបំប៉ោងទីផ្សារ ដោយការបញ្ចូលលុយទៅលើអចលនទ្រព្យ គឺជាការប្រមូលទិញក្នុងចំនួនមួយ បន្ទាប់មកនឹងទម្លាក់តម្លៃទីផ្សារវិញ តាមរយៈការលក់ចេញ។

ចំពោះការវិនិយោគក្នុងវិស័យអចលនទ្រព្យ អ្នកជំនាញអចលនទ្រព្យរូបនេះថា “យើងមិនអាចទិញអលចលនទ្រព្យហើយ អង្គុយចាំឡើងថ្លៃនោះទេ តែអាចធ្វើបែបនេះបាន បើសិនជាប្រទេសយើងកំពុងតែរីកចម្រើនខាងសេដ្ឋកិច្ច”។ លោកបន្ថែម ថា ការវិនិយោគទុនសំខាន់ទី១ គឺចំណេះដឹង និងទី២ គឺអាជីវកម្ម ដែលបង្កើតប្រាក់ចំណេញ ឬចំណូល ឱ្យយើង ជារៀងរាល់ថ្ងៃ៕