ទូតអង់គ្លេស៖ ការអប់រំថ្នាក់ខ្ពស់មានសារៈសំខាន់ណាស់ក្នុងការអភិវឌ្ឍប្រទេសកម្ពុជាឱ្យកាន់តែរីកចំរើន

លោក Dominic Williams ឯកអគ្គរាជទូតចក្រភពអង់គ្លេសប្រចាំនៅកម្ពុជាបានមានប្រសាសន៍ថា ការអប់រំថ្នាក់ខ្ពស់គឺជាអាទិភាព និងមានសារៈសំខាន់ណាស់នៅក្នុងជំហានបន្ទាប់នៃការអភិវឌ្ឍន៍ប្រទេសកម្ពុជាព្រមទាំងជាការពង្រឹងចំណងមិត្តភាពរវាងប្រទេសកម្ពុជា និងចក្រភពអង់គ្លេសផងដែរ។

លោកឯកអគ្គរាជទួតបានលើកឡើងបែបនេះក្នុងពិព័រណ៍អាហារូបករណ៍ និងជម្រើសសិក្សានៅចក្រភពអង់គ្លេស
និងប្រទេសអៀរឡង់ជាពិព័រណ៍ការសិក្សាដ៏ធំមួយនៅកម្ពុជាដែលរៀបចំឡើងដោយស្ថាប័នឈានមុខគេលើការផ្តល់ប្រឹក្សា និងបញ្ចូនសិស្សទៅសិក្សានៅបរទេសកាលពីរសៀលថ្ងៃទី ១៩ ខែមករា ឆ្នាំ២០២៣ នៅឯសណ្ឋាគារ ហៃយ៉ាត់ រីជីនស៊ី ភ្នំពេញ។

លោកឯកអគ្គរាជទូតបានបន្តថា និស្សិតកម្ពុជាប្រមាណ២០០នាក់រួចមកហើយដែលទទួលបានអាហារូបករណ៍ Cheveningក្នុងការបន្តថ្នាក់ឧត្តមសិក្សានៅសាកលវិទ្យាល័យដែលឈានមុខគេក្នុងចក្រភពអង់គ្លេស។ លោកឯកអគ្គរាជទូត Williams បានបន្ថែមទៀតថា ក្រៅពីកម្រិតអប់រំលំដាប់ពិភពលោក សិស្សនិស្សិតដែលរៀននៅចក្រភពអង់គ្លេសក៏ទទួលបានចក្ខុវិស័យថ្មី និងឈានមុខគេក្នុងការបន្តរួមចំណែកអភិវឌ្ឍន៍សង្គមជាតិ និងពិភពលោក។ មានសិស្ស និសិ្សត និងអាណាព្យាបាលប្រមាណជាង ៤០០នាក់បានជួបទទួលព័ត៌មានផ្ទាល់ពីអ្នកតំណាងមកពីស្ថាប័នអប់រំចក្រភពអង់គ្លេសនិងប្រទេសអៀរឡង់តាមរយៈពិព័រណ៍ដោយផ្ទាល់និងអនឡាញអំពីជម្រើសសិក្សាក្នុងថ្នាក់វិទ្យាល័យ ថ្នាក់កម្រិតជំនាញ និងសាកលវិទ្យាល័យព្រមទាំងព័ត៌មានអាហារូបករណ៍និងតម្រូវការសុំទិដ្ឋាការជាដើម។ ការចូលរួមពិព័រណ៍និងសេវាកម្មចុះឈ្មោះរបស់ស្ថាប័ន IDP គឺផ្តល់ជូនដោយឥតគិតថ្លៃ។

លោក ម៉ៅ ស្រេង នាយកស្ថាប័នអប់រំ IDP ប្រចាំនៅប្រទេសកម្ពុជា បានបញ្ចាក់ថា ពិព័រណ៍នេះបង្កើតឡើងដោយស្ថាប័នអប់រំរួមជាមួយនឹងការគាំទ្រពីដៃគូសហការនានា ព្រមទាំងសិស្សានុសិស្ស និងអាណាព្យាបាល គឺបានត្រួសត្រាយផ្លូវឆ្ពោះទៅកាន់អនាគតដែលរីកចម្រើនសម្រាប់សិស្ស និស្សិតជាច្រើននាក់ក្នុងប្រទេសកម្ពុជា និងនៅលើពិភពលោក។

លោកបានបន្តថា ពិព័រណ៍នេះមានការចូលរួមពីស្ថាប័នអប់រំមកពីចក្រភពអង់គ្លេស និងប្រទេសអៀរឡង់ចាប់ពីកម្រិត​វិទ្យាល័យ ថា្នក់ជំនាញ និងសាកលវិទ្យាល័យក្នុងនោះក៏មានការចូលរួមពីមជ្ឍមណ្ឌលអូស្ត្រាលីសម្រាប់ការបណ្តុះបណ្តាល ACEនិងតេស្ត IELTS របស់ IDPដែលជាតេស្តសមត្ថភាពភាសាអង់គ្លេសទទួលស្គាល់ជាសាកល។
ក្នុងនោះក៏មានការចូលរួមពីអ្នកផ្តល់អាហារូបករណ៍ជាច្រើន ដូចជា Chevening ជាដើម បានទទួលស្វាគមន៍នូវរាល់សំនួរថាតើរដ្ឋាភិបាលអង់គ្លេសគាំទ្រ និងឧបត្ថមដល់សិស្ស និស្សិតកម្ពុជាទៅរៀននៅចក្រភពអង់គ្លេសតាមវិធីណាខ្លះ។

គួរបញ្ជាក់ថា ស្ថាប័ន IDP Education ត្រូវបានបង្កើតឡើងដោយរដ្ឋាភិបាលអូស្ត្រាលីតាំងពីឆ្នាំ ១៩៦៩ ជាស្ថាប័ន​ឈានមុខលើពិភពលោករួមមានបុគ្គលិកប្រមាណ ៥០០០នាក់ក្នុងការផ្តល់ប្រឹក្សា និងបញ្ចូនសិស្ស និស្សិតទៅសិក្សានៅបរទេស។ បច្ចុប្បន្នIDP Education ដំណើរការជាង ១៥៧ ការិយាល័យ ក្នុង ៦០ប្រទេសជុំវិញពិភពលោក រួមមាន ចក្រភពអង់គ្លេស អៀរឡង់ អូស្ត្រាលីណូវែលហ្សេឡង់ កាណាដា និងសហរដ្ឋអាមេរិក។ ២០២២ក៏ជាឆ្នាំប្រារព្ធខួបអបអរសាទរទី ៣០ របស់ស្ថាប័ន IDPដែលបានដំណើរការនៅក្នុងប្រទេសកម្ពុជាផងដែរ។

ចំពោះសេវាកម្មចុះឈ្មោះ និងការបញ្ជូនសិស្សទៅសិក្សានៅបរទេសរបស់ស្ថាប័នអប់រំIDP គឺផ្តល់ជូនដោយឥតគិតថ្លៃ រួមជាមួយនឹងកម្មវិធី IDP FastLane សិស្សនិស្សិតនឹងកាន់តែមានភាពងាយស្រួលនិងទទួលបានបទពិសោធន៍ដ៏ល្អឥតខ្ចោះក្នុងការស្វែងរកមុខវិជ្ជាសិក្សានិងទទួលបានឱកាសខ្ពស់ក្នុងការចូលរៀននៅស្ថាប័នអប់រំក្រៅប្រទេសដែលខ្លួនប្រាថ្នា៕

អត្ថបទ៖ សំអឿន