អភិបាលស្រុកសំរោងជួបសំណេះសំណាល និងជូនម្សៅទឹកដោះគោដល់ស្ត្រីមានកូនខ្ចី

ម្សៅទឹកដោះគោ ហ្វង់ បេបេ ១ (france B’e B’e 1) ចំនួន២០០កំប៉ុង និងទឹកលីយ៉ង់ចំនួន២០០ដប ត្រូវបានលោក កេត ម៉ៅ អភិបាលស្រុកសំរោង ខេត្តតាកែវ ចែកជូនដល់អាណាព្យាបាលដែលមានទារកអាយុពី០ខែ ដល់០៦ខែ នៅទូទាំងឃុំសំរោង។                                                           

ក្នុងនាមជាមន្ត្រីមូលដ្ឋាននៅជាប់ផ្ទាល់ជាមួយប្រជាពលរដ្ឋ តែងតែយកចិត្តទុកដាក់មើលការខុសត្រូវដឹងសុខទុក្ខពលរដ្ឋ ជាក់ស្តែងនៅព្រឹកថ្ងៃទី០២ ខែមីនា ឆ្នាំ២០២៣ នៅស្នាក់ការគណបក្សប្រជាជនកម្ពុជាឃុំសំរោង លោក កេត ម៉ៅ អភិបាលនៃគណ:អភិបាលស្រុកសំរោង និងជាប្រធានគណ:កម្មាធិការនៃគណបក្សប្រជាជនកម្ពុជា ស្រុកសំរោង រួមជាមួយលោក ហ៊ត សិត អភិបាលរងស្រុក អនុប្រធានក្រុមការងារថ្នាក់ជាតិចុះជួយឃុំ និងសហការីបានអញ្ជើញជួបសំណេះសំណាលជាមួយអាណាព្យាបាលទារកដែលមានអាយុពី០ខែ ដល់០៦ខែ ចំនួន៦៦នាក់ទូទាំងឃុំសំរោង។

ក្នុងនោះលោកអភិបាលស្រុកសំរោង បានចែកជូនម្សៅទឹកដោះគោដែលជាអំណោយរបស់លោក ហង់ បូ ជូនដល់បងប្អូនដែលមានកូនអាយុចាប់ពី០ខែ ដល់០៦ខែ ក្នុងឃុំសំរោង ដោយអាណាព្យាបាលម្នាក់ៗទទួលបានទឹកដោះគោ២កំប៉ុង ទឹកសុទ្ធ២ដប។ 

ឈ្លៀតក្នុងឱកាសនោះផងដែរ លោក កេត ម៉ៅ អភិបាលស្រុក បានជម្រាបប្រជាពលរដ្ឋទាំងអស់ត្រូវត្រៀមខ្លួនពិនិត្យឯកសារពាក់ព័ន្ធ ដើម្បីទៅចូលរួមបោះឆ្នោតនៅពេលដ៏ខ្លីខាងមុខនេះឲ្យបានគ្រប់ៗគ្នា៕

អត្ថបទ៖ វីរៈ