​​ទំហំបរធនបាលកិច្ចបង្កើត និងចុះបញ្ជី​ស្របច្បាប់ រំពឹងកើនខ្ពស់ជាង ១ពាន់​លានដុល្លារ​ ត្រឹមចុងឆ្នាំនេះ

លោក សុខ ដារ៉ា អគ្គនាយកនៃនិយ័តករបរធនបាលកិច្ច បានលើកឡើងថា ចំនួនបរធនបាលកិច្ច ដែលបាន​ចុះបញ្ជីកើន​ឡើងដល់ ៥១២ករណី ក្នុងនោះចំនួនទំហំបរធនបាល ដែលស្ថិតនៅក្នុងប្រតិបត្តិការនេះ កើនឡើងដល់ ៧៤៥​លានដុល្លារអាមេរិក នេះបើគិតទាំងទំហំដើមដែលបានចុះបញ្ជី។

លោក បានគូសបញ្ជាក់ទៀតថា ជាមួយនឹងការធ្វើបច្ចុប្បន្នភាពបរធនបាលកិច្ច តាមស្ថានភាពទីផ្សារជាក់ស្តែង គឺអាចកើនឡើងដល់ ៩៤០ដុល្លារ នៅដើមឆ្នាំ ២០២៣​នេះ។ ​ជាគោលដៅ លោក សុខ ដារ៉ា រំពឹងថា នៅចុងឆ្នាំនេះ នឹងកើនលើស ១ពាន់លានដុល្លារ ពោលគឺខ្ពស់ជាង ៤ភាគរយ នៃផលិតផលក្នុងស្រុកសរុប។ លោក សុខ ដារ៉ា លើកឡើងបែបនេះ ក្រោយបិទបញ្ចប់សិក្ខាសាលាស្តីពី «យន្តការប្រតិបត្តិការ និងវាក្យសព្ទគន្លឹះ» នាថ្ងៃទី ០៤ មេសា។

បើតាមអគ្គនាយកនៃនិយ័តករបរធនបាលកិច្ច បានកត់សម្គាល់ថា វិស័យនេះ បាននិងកំពុងចូលរួមអភិវឌ្ឍដំណើរ​ការសេដ្ឋកិច្ចកម្ពុជា លើបីចំណុចសំខាន់ៗ ទី១ បង្កើត និងបង្កើន ក៏ដូចជាទាក់ទាញទំនុកចិត្តពីអ្នកវិនិយោគ ពិសេស​វិនិយោគិនបរទេស, ទី២ យន្តការរបស់បរធនបាលកិច្ច ជាយន្តការតាមដានត្រួតពិនិត្យអនុលោមភាពតាមច្បាប់ ក៏ដូចជាបញ្ចៀសហានិភ័យប្រតិបត្តិការលំហូរមូលធនពីវិស័យពាក់ព័ន្ធនានា, និងទី៣ យន្តការនេះ មានភាពទន់ភ្លន់ បទបែន និងមានប្រសិទ្ធភាពអនុវត្ត ដែលអាចអនុញ្ញាតឱ្យវិនិយោគិនបរទេសមានការជ្រើសរើសប្រកបដោយទំនុកចិត្ត។

លោក សុខ ដារ៉ា មានសុទិដ្ឋិនិយមថា វិស័យបរធនបាលកិច្ច មានអត្រាកំណើនខ្ពស់ និងបានកើនឡើងក្នុងរយៈពេល​ដ៏ខ្លី។​ លោក លើកឡើងថា កត្តាដែលជួយឱ្យវិស័យបរធនបាលកិច្ចរីកចម្រើនលឿនក្នុងរយៈពេលដ៏ខ្លី រួមមាន កត្តាស្ថានភាពកម្ពុជាទាំងមូល មានសន្តិភាព ស្ថេរភាពនយោបាយ ស្ថេរភាពសេដ្ឋកិច្ច និងទំនុកចិត្តពីបរទេស ក្រោមការដឹក​នាំរបស់សម្តេចតេជោ ហ៊ុន សែន។ ជាមួយគ្នានេះ ការចូលរួមរបស់ភាគីពាក់ព័ន្ធ វិស័យឯកជន និងអ្នកសារព័ត៌មាន ក៏បានរួមចំណែកផ្សព្វផ្សាយអំពីកិច្ចដំណើរការរបស់បរធនបាលកិច្ចក្នុងគ្រប់ដំណាក់កាល ដល់សាធារណជន វិនិយោគិន និងទៅដល់អ្នកពាក់ព័ន្ធ។​ លើសពីនេះទៀត វិស័យបរធនបាលកិច្ច មានគុណប្រយោជន៍ និងតួនាទីគន្លឹះ ដែលឆ្លើយតប​នឹងសេចក្តីត្រូវការ និងនិន្នាការចង់បានរបស់ទីផ្សារ ពិសេសវិនិយោគិន ដែលសម្លឹងឃើញថា បរធនបាលកិច្ចនេះ ផ្តល់បន្ថែមពីយន្តការដែលមានស្រាប់ នៃការវិនិយោគចេញពីទ្រព្យសម្បត្តិរបស់ពួកគេ។

មូលហេតុនេះ ដែលជំរុញឱ្យមានកំណើនកាន់តែខ្ពស់នៃយន្តការបរធនបាលកិច្ច ក្នុងការវិនិយោគវិស័យសេដ្ឋកិច្ច និងសង្គម​របស់កម្ពុជា ជាពិសេសលើវិស័យអចលទ្រព្យ វិស័យធនាគារ និងវិស័យហិរញ្ញវត្ថុមិនមែនធនាគារផ្សេងទៀត។

​សូមបញ្ជាក់ថា បរធនបាលកិច្ច គឺជាសេវាហិរញ្ញវត្ថុមួយមិនមែនធនាគារ មានតួនាទីគ្រប់គ្រង មើលថែរក្សា ឬចាត់ចែក​ទ្រព្យសម្បត្តិរបស់បុគ្គល ឬក្រុមហ៊ុនណាមួយ សម្រាប់ជាប្រយោជន៍ដល់ក្រុមគោលដៅណាមួយ ដែលស្ថិតក្នុង​អនុលោមតាមលិខិតបរធនបាលកិច្ច ឬបទប្បញ្ញត្តិជាធរមាន។ បរធនបាលកិច្ចនេះ ជាវិស័យមួយ​ដែលជួយដល់ការ​អភិវឌ្ឍវិស័យពាណិជ្ជកម្ម និងសង្គមជាតិ តាមរយៈការទាក់ទាញនូវមូលនិធិសង្គមនានា និង​លំហូរទុនវិនិយោគទាំងក្នុង និងក្រៅប្រទេស៕