នគរបាលខេត្តកំពង់ឆ្នាំងត្រៀមកម្លាំងជាង៦០០​នាក់​ដើម្បីការពារសន្តិសុខសណ្ដាប់ធ្នាប់ក្នុងពិធីដង្ហែព្រះអគ្គិជ័យកីឡាស៊ីហ្គេម

លោកឧត្តមសេនីយ៍ត្រី អៀ ប៊ុនធឿន អ្នកនាំពាក្យស្នងការដ្ឋាននគរបាលខេត្តកំពង់ឆ្នាំង នៅព្រឹកថ្ងៃទី២៧ ខែមេសាឆ្នាំ២០២៣ បានឲ្យដឹងថា នៅថ្ងៃទី២៩ និងថ្ងៃទី៣០ ខែមេសា សមត្ថកិច្ចនគរបាលខេត្តកំពង់ឆ្នាំង នឹងដាក់ពង្រាយកងកម្លាំងប្រមាណជាង៦០០នាក់ តាមបណ្តោយផ្លូវជាតិលេខ៥ ចាប់ពីព្រំប្រទល់ស្រុកឧដុង្គជាប់ខេត្តកំពង់ឆ្នាំង រហូតដល់ឃុំត្រពាំងចាន់ ព្រំប្រទល់កំពង់ឆ្នាំងជាមួយខេត្តពោធិ៍សាត់ ដើម្បីការពារសន្តិសុខ និងសណ្តាប់ធ្នាប់នៅក្នុងពិធីដង្ហែព្រះអគ្គិជ័យកីឡាស៊ីហ្គេម ឆ្លងកាត់ខេត្តកំពង់ឆ្នាំងក្នុងថ្ងៃទី ២៩-៣០ ខែមេសា ខាងមុខនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីណែនាំរបស់រដ្ឋបាលខេត្តកំពង់ឆ្នាំង បានឲ្យដឹងថា នៅក្នុងពិធីដង្ហែក្បួនព្រះអគ្គិជ័យកីឡាស៊ីហ្គេមអាស៊ីអាគ្នេយ៍ខាងលើនេះ រដ្ឋបាលខេត្តកំពង់ឆ្នាំង នឹងរៀបចំកម្លាំងប្រជាពលរដ្ឋ ព្រះសង្ឃ មន្ត្រីរាជការសិស្សានុសិស្សចូលរួមដង្ហែរយៈពេលពីរថ្ងៃ គឺថ្ងៃទី២៩ និងថ្ងៃទី៣០ឆ្លងកាត់ទឹកដីខេត្តកំពង់ឆ្នាំង ដែលមានការចូលរួមទទួល និងដង្ហែចំនួន៣០​គោលដៅ និងមានមនុស្សចូលរួមជាង១៨.០០០ នាក់។

កម្មវិធីជាប្រវត្តិសាស្ត្រខាងលើនេះ នៅថ្ងៃទី២៩ ក្បួនដង្ហែព្រះអគ្គីជ័យកីឡាស៊ីហ្គេមនឹងទទួលក្បួនដង្ហែចេញពីចំណុចព្រំប្រទល់ស្រុកឧដុង្គខេត្តកំពង់ឆ្នាំង មកកាន់ក្រុងកំពង់ឆ្នាំង តាមបណ្ដាផ្លូវនានាក្នុងក្រុង ហើយក្បួនដង្ហែព្រះអគ្គិជ័យកីឡាត្រូវស្នាក់នៅមួយយប់ក្នុងវត្តអារញ្ញការាម ដើម្បីប្រារព្ធធ្វើពិធីសាសនា។​ ហើយនៅព្រឹកឡើងថ្ងៃ៣០ និងដង្ហែចេញពីវត្តអារញ្ញការាម ទៅកាន់ឃុំត្រពាំងចាន់ ព្រំប្រទល់ខេត្តកំពង់ឆ្នាំងជាមួយខេត្តពោធិ៍សាត់ ដែលក្នុងរយៈពេលដង្ហែក្បួនព្រះអគ្គីជ័យកីឡាស៊ីហ្គេមជាប្រវត្តិសាស្ត្ររបស់ជាតិខាងលើនេះ នឹងមានព្រះសង្ឃ១៥០អង្គ និងប្រជាពលរដ្ឋ មន្ត្រីរាជការលោកគ្រូអ្នកគ្រូ និងសិក្សានុសិស្សចូលរួមប្រមាណ១ម៉ឺន៧ពាន់នាក់៕

អត្ថបទ៖ ឈៀងថារិទ្ធ