ស្នងការដ្ឋានខេត្តកំពង់ឆ្នាំង បំភ្លីជុំវិញការចុះអនុវត្តច្បាប់ចរាចរណ៍នៅលើផ្លូវជាតិលេខ៥

អ្នកនាំពាក្យនៃស្នងការដ្ឋាននគរបាលខេត្តកំពង់ឆ្នាំង ឆ្លើយបំភ្លីជូនសាធារណ:ជន ដែលប្រើប្រាស់បណ្តាញ សង្គម Facebook និងTikTok កុំឲ្យមានការភាន់ច្រឡំ កាលពីថ្ងៃទៅ២៣ ខែកុម្ភៈ ឆ្នំា២០២៦ កម្លាំងការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំង បានចុះអនុវត្តច្បាប់ស្ដីពីចរាចរណ៍ ផ្លូវគោក (គោលដៅត្រួតពិនិត្យល្បឿន) នៅលើផ្លូវជាតិលេខប្រាំ ចន្លោះគីឡូម៉ែត្រលេខ ១០៩-១១០ ស្ថិត នៅភូមិថ្មី ឃុំផ្សារ ស្រុកបរិបូណ៌ ខេត្តកំពង់ឆ្នាំង។ 

ក្រោយមកក៏ទទួលបានព័ត៌មានពីតាមរយៈបណ្ដាញសង្គមហ្វេសប៊ុក Facebook និងTikTok បានបង្ហោះវីដេអូ ករណីបើកបររថយន្តលើសល្បឿនកំណត់ និងធ្វើការពិន័យ កម្លាំងការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំង ចុះអនុវត្តច្បាប់ស្តីពីចរាចរណ៍ផ្លូវគោក។ កម្លាំងការិយាល័យ​នគរបាលចរាចរណ៍ផ្លូវគោកខេត្តកំពង់ឆ្នាំង​ ធ្វើការអនុវត្តច្បាប់ស្ដីពីចរាចរណ៍ផ្លូវគោកនៅត្រង់ចំណុចប្រឈមគ្រោះថ្នាក់​ចរាចរណ៍​ ដើម្បីរួមគ្នាកាត់បន្ថយគ្រោះថ្នាក់ចរាចរណ៍កើតឡើងបណ្ដាលឲ្យ មានមនុស្ស ស្លាប់​ របួស​ ពិការ​ និងខូចខាតទ្រព្យសម្បត្តិនា​នា ដោយជាយកថាហេតុ។

ក្នុងករណីត្រួតពិនិត្យល្បឿននេះ អនុវត្តទៅតាមស្លាកសញ្ញាចរាចរណ៍(៩០Km/h) មិនមែនក្រោមស្លាកសញ្ញាចរាចរណ៍(៩០Km/h)នោះទេ បើយោងតាមច្បាប់ចរាចរណ៍មាត្រា៧ ក្នុងអនុក្រឹត្យស្តីពីការពិន័យអន្តរកាណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក តាមអនុក្រឹត្យលេខ ៣៩ អនក្របក ចុះថ្ងៃទី១៧ ខែមីនា ឆ្នាំ២០២០។

ក្នុងករណីអ្នកបើកបរល្មើសច្បាប់បើកបរលើសល្បឿនកំណត់កម្លាំងសមត្ថកិច្ចនិងធើ្វការផាកពិនិត្យដូចខាងក្រោម ១.បើកបរលើសល្បឿនចាប់ពី ១ ដល់ ១៩ Km/h ពិន័យចំពោះយានយន្តធុនស្រាល ១២០.០០០៛ ចំពោះយានយន្តធុនធ្ងន់ ២២៥.០០០៛, ២.បើកបរលើសលើសល្បឿនចាប់ពី ២០ ដល់ ២៩ Km/h ពិន័យចំពោះយានយន្តធុនស្រាល ១៥០.០០០៛ ចំពោះយានយន្តធុនធ្ងន់ ៣០០.០០០៛, 3.បើកបរលើសលើសល្បឿនចាប់ពី ៣០ ដល់ ៣៩ Km/h ពិន័យចំពោះយានយន្តធុនស្រាល ១៨០.០០០៛ ចំពោះយានយន្តធុនធ្ងន់ ៣៧៥.០០០៛ ,4.បើកបរលើសលើសល្បឿនចាប់ពី ៤០ Km/h ឡើងទៅ ពិន័យចំពោះយានយន្តធុនស្រាល ៣០០.០០០៛ ចំពោះយានយន្តធុនធ្ងន់ ៦២៥.០០០៛។

ឧទាហរណ៍ ចំពោះយានយន្តបើកបរក្នុងល្បឿន ១២៩ Km/h មានន័យថា យានយន្តល្មើសនោះ លើសល្បឿន ៣៩ Km/h ត្រូវពិន័យចំពោះយានយន្តធុនស្រាល ១៨០.០០០៛ ចំពោះយានយន្តធុនធ្ងន់ ៣៧៥.០០០៛

ជាមួយគ្នាផងដែរ កម្លាំងនរគបាលខេត្តកំពង់ឆ្នាំង សូមអំពាវនាវដល់ប្រជាពលរដ្ឋទាំងអស់ មេត្តាចូលរួមអនុវត្តតាមគោរពច្បាប់ ស្តីពីចរាចរណ៍ផ្លូវគោក (គិតពីខ្លួនអ្នក គ្រួសារ និងអ្នកដទៃ សូមកុំបើកបរហួសល្បឿនកំណត់)៕