ព័ត៌មានជាតិ

ចំណូលពលរដ្ឋខេត្តស្វាយរៀងកើនឡើង ២៦៧ ដុល្លារ រហូតដល់ ១ ៥៥៩ ដុល្លារអាមេរិក

បានផុស

៣ years មុន

នៅ

ថ្ងៃព្រហស្បតិ៍ ២៧ មេសា ២០២៣

ដោយ

ក្នុងសន្និសីទសារព័ត៌មានស្តីពី «ភាពជោគជ័យរយៈពេល ៥ ឆ្នាំកន្លងមករបស់រដ្ឋបាលខេត្តស្វាយរៀង» លោក ម៉ែន វិបុល អភិបាលនៃគណៈអភិបាលខេត្តបានគូសបញ្ជាក់ឱ្យដឹងថា GDP របស់ប្រជាពលរដ្ឋនៅក្នុងខេត្តស្វាយរៀងសម្រាប់មនុស្សម្នាក់ទទួលបានចំណូលមធ្យម ១ ៥៥៩ ដុល្លារអាមេរិកគឺកើនឡើង ២៦៧ដុល្លារ បើធៀបឆ្នាំ២០១៨។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាព្រឹកថ្ងៃទី២៧ ខែមេសា ឆ្នាំ២០២៣នេះ លោក ម៉ែន វិបុល បានមានប្រសាសន៍ថា ខេត្តស្វាយរៀងស្ថិតនៅប៉ែកអាគ្នេយ៍ដែលមានចម្ងាយ ១២៥ គីឡូម៉ែត្រពីរាជធានីភ្នំពេញ។

ខេត្ដស្វាយរៀងមានកំណើនសេដ្ឋកិច្ច ៥,៦% ក្នុងនោះបានចូលរួមចំណែកពីវិស័យកសិកម្មប្រមាណជា ៤៣,៧៦% វិស័យឧស្សាហកម្ម ប្រមាណជា ៣៨,១២% និងវិស័យសេវាកម្មប្រមាណជា ១៨,១២%។

លោកបន្តថា សម្រាប់ចំណូលមធ្យមមនុស្សម្នាក់មានប្រមាណ ១.៥៩៥ដុល្លារអាម៉េរិក កើនឡើង ២៦៧ដុល្លារ បើប្រៀបធៀបនឹងឆ្នាំ២០១៨។ ចំពោះទំហំសេដ្ឋកិច្ច (GDP) ខេត្តស្វាយរៀង មានចំនួន ១.០៩៤.៦១៦.៩២៥ដុល្លារ នៅឆ្នាំ២០២២។

ខេត្តស្វាយរៀងជាខេត្តដែលមានភូមិសាស្រ្តជាប់ប្រទេសវៀតណាម មានផ្ទៃដីសរុប ២.៩៦៦,៤០ គីឡូម៉ែត្រក្រឡា ចែកចេញជា ២ក្រុង ៦ស្រុក ៦៨ឃុំ ១២សង្កាត់ ៦៩០ភូមិ មានប្រជាពលរដ្ឋសរុបចំនួន ៦៧៤.៦៣៥នាក់។ ប្រជាពលរដ្ឋអាយុ ១៨ឆ្នាំឡើងមាន ៤៣៨.០៩៥នាក់ ហើយប្រជាជនអាយុ ១៨ឆ្នាំឡើងដែលមានការងារធ្វើមានចំនួន ៩២,៦%។

ខេត្តមានទំនាក់ទំនងសេដ្ឋកិច្ចជាមួយប្រទេសវៀតណាមតាមច្រកទ្វារព្រំដែនចំនួន ៨ កន្លែង រួមមាន ច្រកទ្វារព្រំដែនអន្តរជាតិ ២កន្លែង ច្រកទ្វារព្រំដែនទ្វេភាគី ២កន្លែង និងច្រកទ្វារតំបន់ព្រំដែន ៤កន្លែង និងមានកំពង់ផែ ០១កន្លែង ដែលកំពុងដើរតួនាទីយ៉ាងសំខាន់ក្នុងការជួយសម្រួលដល់ការដោះដូរពាណិជ្ជកម្ម កសិផលផ្សេងៗ និងការធ្វើដំណើរឆ្លងកាត់ព្រំដែន របស់ប្រជាពលរដ្ឋ ភ្ញៀវជាតិ អន្ដរជាតិ ។ រដ្ឋបាលខេត្តក៏គ្រោងរៀបចំសំណើទៅរាជរដ្ឋាភិបាល ដើម្បីស្នើសុំបង្កើតច្រកទ្វារតំបន់ព្រំដែនមួយកន្លែងទៀត គឺច្រកទ្វារតំបន់ព្រំដែនក្រសាំងជ្រំ ស្ថិតនៅភូមិក្រសាំងជ្រំ ឃុំគ្រួស ស្រុកស្វាយជ្រំ៕