Update៖ គិតត្រឹមម៉ោង០១និង៥៥នាទីរសៀល អគ្គិភ័យឆេះរោងចក្រនៅក្រុងបាវិតគ្រប់គ្រងបាន៩០ភាគរយ

គឹតត្រឹមម៉ោង០១និង៥៥នាទីរសៀល ថ្ងៃទី២៩ឧសភា ករណីអគ្គិភ័យឆេះរោងចក្រនៅតំបន់តាយសេង២ក្រុងបាវិត ខេត្តស្វាយរៀង គ្រប់គ្រងបាន៩០ភាគរយហើយ ខណៈមន្ត្រីជំនាញប្រើប្រាស់រថយន្ដពន្លត់អគ្គិភ័យរបស់ស្នងការដ្ឋាននគរបាលខេត្តចំនួន១៥គ្រឿង និងប្រើប្រាស់ទឹកបាញ់ពន្លត់សរុបចំនួន ៤៣រថយន្ដ។ នេះបើតាមការបញ្ជាក់ពីនាយការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលខេត្តស្វាយរៀង។

លោកនាយការិយាល័យបញ្ជាក់ថា គិតមកដល់ពេលនេះ អណ្ដាតភ្លើងត្រូវបានគ្រប់គ្រងទាំងស្រុងហើយ នៅឡើយតែផ្សែងហុយនៅផ្នែកខាងក្នុងខ្លះៗ ខណៈកម្លាំងជំនាញក៏កំពុងបន្តបាញ់ទឹកបន្ថែម ដើម្បីប្រាកដថា ភ្លើងត្រូវបានគ្រប់គ្រងទាំងស្រុង។

សូមជម្រាបថា ករណីអគ្គិភ័យឆេះរោងចក្រនេះ បានកើតឡើងនាវេលាម៉ោង១១ព្រឹកថ្ងៃសុក្រ ទី២៩ឧសភានេះ នៅតំបន់តាយសេង២ ក្នុងក្រុងបាវិត​ ខេត្តស្វាយរៀង។

បើតាមលោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងនៅរសៀលថ្ងៃដដែលនេះថា អគាររោងចក្រដែលត្រូវអគ្គិភ័យឆាបឆេះនេះមានឈ្មោះ យីង ហាយ ខូតធីង (ខេមបូឌា) ឯ.ក សកម្មភាពអាជីវកម្មចម្បង ផលិត​សម្ភារ​សម្រាប់​ផ្គត់ផ្គង់ឱ្យរោងចក្រដំឡើងទោចក្រយាន (ទឹកថ្នាំបាញ់កង់) ស្ថិតនៅតំបន់សេដ្ឋកិច្ចពិសេស តាយ សេង បាវិត ក្រុងបាវិត ខេត្តស្វាយរៀង។ បើតាមអ្នកនាំពាក្យរូបនេះ មូលហេតុនៃការឆេះ នៅមិនទាន់កំណត់បាននៅឡើយ៕

អត្ថបទ៖ សុខុម