កម្ពុជា នាំចេញទំនិញទៅវៀតណាម​សម្រេចបានជាង ២៧០លានដុល្លារ ក្នុងខែមេសា

កម្ពុជា បាននាំទំនិញចេញទៅប្រទេសវៀតណាម សម្រេចបានទឹកប្រាក់ប្រមាណ ២៧១លានដុល្លារ កើនឡើង ២៤.៤ភាគរយ បើធៀបនឹងរយៈពេលដូចគ្នា កាលពីឆ្នាំ ២០២២ សម្រេចបានតែជាង ២១៨លានដុល្លារប៉ុណ្ណោះ។ កំណើននៃការនាំចេញនេះ នាំឱ្យវៀតណាម ជាប់ចំណាត់ថ្នាក់លេខ២ បន្ទាប់ពីអាមេរិក ដែលទទួលទិញទំនិញ​របស់កម្ពុជា ច្រើនជាងគេ នៅក្នុងខែមេសាកន្លងទៅ។ នេះបើតាមស្ថិតិពាណិជ្ជកម្មនាំចេញ​ទំនិញរបស់អគ្គនាយក​ដ្ឋានគយ និងរដ្ឋាករកម្ពុជា។

ដោយឡែករយៈពេល ៤ខែ ចាប់ពីខែ មករា ដល់មេសា​ ឆ្នាំ ២០២៣ ប្រទេសទាំងពីរ បានដោះដូរទំនិញគ្នា គិតជាទឹកប្រាក់ប្រមាណជាង ២.៤ពាន់លានដុល្លារ កើនឡើង ៥.៦ភាគរយ ក្នុងនោះ កម្ពុជា នាំចេញមានតម្លៃជាង ១.១ពាន់លានដុល្លារ ខណៈវៀតណាម នាំទំនិញចូលមកវិញមានតម្លៃជាង ១.២ពាន់លានដុល្លារ។

សម្រាប់ទំនិញ​ចម្បង​គេ​ដែល​កម្ពុជា​នាំទៅ​វៀតណាម គឺ​ផលិតផល​កសិកម្ម រួមមាន ​(​ស្រូវ​, កៅស៊ូ​, ស្វាយចន្ទី​, ដំឡូង​មី ជាដើម​), ចំណែក​ផលិតផល​វៀតណាម​នាំមក​កម្ពុជា មានដូចជា ដែក សម្ភារ​សំណង់ ប្រេង បន្លែ ផ្លែឈើ ជី និង​គ្រឿងយន្ត​ ជាដើម។​

សូបញ្ជាក់ថា ក្នុង​ឆ្នាំ​ ២០២២ ពាណិជ្ជកម្ម​ទ្វេភាគី​កម្ពុជា​-​វៀតណាម សម្រេចបាន​ទឹកប្រាក់​សរុបជាង ៦.១ ពាន់​លាន​ដុល្លារ កើនឡើង ១៩,៦ ​ភាគរយ​បើ​ធៀប​ឆ្នាំ ​២០២១​។ ក្នុងនោះ​កម្ពុជា​នាំ​ទំនិញ​ទៅ​វៀតណាម មាន​ទឹកប្រាក់ជាង ២.១ពាន់លាន​ដុល្លារ កើន ៩,២​ ភាគរយ និង​ទំនិញ​វៀតណាម​នាំមក​កម្ពុ​ជាមាន​ចំនួនជាង ៣.៩ពាន់​លាន​ដុល្លារ កើនឡើង ២៦,២​ ភាគរយ​។ នេះ​បើយោងតាម​អគ្គ​នា​​យក​ដ្ឋា​ន​គយ និង​រដ្ឋាករ​កម្ពុជា​៕