សេដ្ឋកិច្ច

ទំហំពាណិជ្ជកម្មទ្វេភាគីកម្ពុជា-ថៃ ធ្លាក់ចុះជិត ៤០% នៅត្រីមាសទី១

បានផុស

៣ ខែ មុន

នៅ

ថ្ងៃចន្ទ ២០ មេសា ២០២៦

ដោយ

ការដោះដូរទំនិញរវាងកម្ពុជា និងប្រទេសថៃ សម្រេចបាននូវទំហំទឹកប្រាក់ចំនួន ៦៩៦ លានដុល្លារ នៅក្នុងរយៈពេល ៣ ខែ ឆ្នាំ ២០២៦ ធ្លាក់ចុះ ៣៩,៤% ប្រៀបធៀបនឹងរយៈពេលដូចគ្នានៅក្នុងឆ្នាំ ២០២៥។ នេះបើយោងតាមរបាយការណ៍របស់អគ្គនាយករដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ GDCE បង្ហាញថា ចាប់ពីខែមករា ដល់ខែមីនា ២០២៦ ទំហំពាណិជ្ជកម្មទ្វេភាគីកម្ពុជា-ថៃ សម្រេចបាននូវទឹកប្រាក់ ៦៩៦ លានដុល្លារ ក្នុងនោះកម្ពុជានាំចេញទៅប្រទេសថៃ មានតម្លៃ ១៨១ លានដុល្លារ ធ្លាក់ចុះ ២៩% ចំណែកឯថៃនាំចូលមកវិញមានតម្លៃជិត ៥១៥ លានដុល្លារ ធ្លាក់ចុះ ៤២,៤%។

លោកបណ្ឌិត គុណ ញឹម មានប្រសាសន៍កាលពីពេលថ្មីៗនេះថា ការដោះដូរទំនិញទ្វេភាគីកម្ពុជា-ថៃ បានធ្លាក់ចុះយ៉ាងគំហុក បន្ទាប់ពីមានការបិទព្រំដែនគោក និងការផ្ទុះសង្គ្រាម។ ទំនិញដែលនៅបន្តនាំចូលពីប្រទេសថៃ មានទំនិញប្រើប្រាស់ប្រចាំថ្ងៃ និងផលិតផលកម្មន្តសាល។

លោកបណ្ឌិត គុណ ញឹម បញ្ជាក់ថា៖ «ទំនិញដែលនាំចូលមកប្រើប្រាស់មានការធ្លាក់ចុះជាបន្តបន្ទាប់ ទំនិញដែលហាមឃាត់ធ្លាក់ចុះដល់សូន្យ ប្រេងឥន្ធនៈ និងឧស្ម័នគឺធ្លាក់ចុះដល់សូន្យតែម្ដង»។

ប្រភេទទំនិញមួយក្រុមទៀត ដូចជា គ្រឿងម៉ាស៊ីន និងធាតុចូលផលិតកម្ម ដូចជាគ្រឿងចក្រ គ្រឿងយន្តកសិកម្ម ដែលជាមធ្យោបាយផលិតកម្ម ដែលមានត្រាក់ទ័រ គោយន្ត ម៉ាស៊ីនច្រូត គឺនៅមានការនាំចូលដើម្បីបម្រើវិស័យរបស់យើង ដែលជាធាតុចូលផលិតកម្មរបស់ក្រុមហ៊ុនវិនិយោគធំៗ មួយចំនួន ដូចជាក្រុមហ៊ុនមេនីបៀ ក្រុមហ៊ុន DENSO ជាដើម ដែលមិនមែនជាទំនិញប្រើប្រាស់ប្រចាំថ្ងៃនោះទេ។

នៅក្នុងឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-ថៃ សម្រេចបាននូវទំហំទឹកប្រាក់ ៣,៦៥ ពាន់លានដុល្លារ ធ្លាក់ចុះ ១៤,៨៦% ធៀបនឹងឆ្នាំ ២០២៤ ក្នុងនោះកម្ពុជានាំចេញទៅថៃ ៧៣២ លានដុល្លារ ធ្លាក់ចុះ ១៤,១៥% ចំណែកថៃនាំចូលមកវិញមានតម្លៃ ២,៩ ពាន់លានដុល្លារ ធ្លាក់ចុះ ១៥%។ នេះបើយោងតាមក្រសួងពាណិជ្ជកម្ម៕

អត្ថបទ៖ ឡេង ដេត