តើអ្វីទៅជាឧស្សាហូបនីយកម្ម ?

ឧស្សាហូបនីយកម្ម សំដៅទៅលើដំណើរការដែលសង្គម ឬរដ្ឋផ្លាស់ពីសេដ្ឋកិច្ចកសិកម្មទៅសេដ្ឋកិច្ចឧស្សាហកម្ម។ មួយវិញទៀត ឧស្សាហូបនីយកម្មត្រូវបានបង្កើតឡើងនៅក្នុងវិស័យជាក់លាក់មួយ​ហើយផ្អែកលើការអភិវឌ្ឍគ្រឿង​ម៉ាស៊ីនបច្ចេកទេស និងដំណើរការការងារដើម្បីផលិតឱ្យបានច្រើនក្នុងរយៈពេលខ្លី ក៏ដូចជាកំណើនសេដ្ឋកិច្ច ដែលស្វែងរកផលចំណេញ និងលទ្ធផលនៃផលិតផលក្នុងស្រុកសរុប។

សម្រាប់កម្ពុជា ឧស្សាហូបនីយកម្មនៅមានលំនាំដូចប្រទេសកំពុងអភិវឌ្ឍជាច្រើន ដោយចាប់ផ្តើមពី​ឧស្សាហកម្ម​ធុនស្រាល ដូចជាវាយនភ័ណ្ឌ ការកាត់ដេរសំលៀកបំពាក់ និងការកែច្នៃផលិតផលកសិកម្មរួមមាន ការកិនស្រូវ និងការកែច្នៃម្ហូបអាហារ ជាដើម។ ឧស្សាហូបនីយកម្មនេះ បាននិងកំពុងឈានបន្តិចម្ដងៗទៅរកឧស្សាហកម្មធុនធ្ងន់ ដូចជាអាជីវកម្មរ៉ែ ការរុករកប្រេងនិងឧស្ម័ន វិស័យកម្មន្តសាល និងសំណង់។ យោងតាមសៀវភៅវ​សេដ្ឋកិច្ចនៃប្រទេស​កម្ពុជា។

នាពេលបច្ចុប្បន្ននេះ មានក្រុមហ៊ុនជាច្រើនបានបង្កើតរោងចក្រដំឡើងម៉ូតូ និងខ្លះទៀតដំឡើងឡាននៅកម្ពុជា។ នៅពេលដែលចំណូលក្នុងប្រជាជនម្នាក់ៗកើនឡើង ហេដ្ឋារចនាសម្ព័ន្ធរូបវន្ត និងគុណភាពនៃកម្លាំងពលកម្មបកម្ពុជា នឹងត្រូវបានកែលម្អ។

ស្របពេលដែលកម្ពុជា នឹងធ្វើពិពិធកម្មឧស្សាហកម្មរបស់ខ្លួនខាងផ្នែកព័ត៌មានវិទ្យា និងការដំឡើងផលិតគ្រឿងអគ្គិសនី និងឧបករណ៍អេឡិចត្រូនិក ក្នុងរយៈពេលមធ្យមមួយ៕

អត្ថបទ៖ ផល ធារិត