ការជិះទូកកម្សាន្តតាមដងទន្លេ នៅតែជាទីពេញនិយមសម្រាប់ភ្ញៀវជាតិ និងអន្តរជាតិ

ការជិះទូកកម្សាន្ត នៅតាមដងទន្លេមេគង្គ និងមុខព្រះបរមរាជវាំង នៅតែមានការចាប់អារម្មណ៍ ពីសំណាក់ភ្ញៀវទេសចរជាតិ និងអន្តរជាតិ បន្ទាប់ពីពួកគេសម្រាកពីការងារ ការសិក្សា និងការប្រកបមុខរបរ។

អ្នកស្រី គួយ សៀកហេង ម្ចាស់អាជីវកម្មសិត្បូ កាណូត​ទេសចរណ៍ នៅមុខផ្សាររាត្រី បានប្រាប់កម្ពុជាថ្មីថា អ្នកស្រីមានទូក ឬកាណូត ចំនួន ៥គ្រឿង សម្រាប់ជួលឲ្យភ្ញៀវទេសចរជាតិ និងអន្តរជាតិ អាចទាក់ទងជួលជាលក្ខណៈគ្រួសារ ឬអាចជួលជាសាធារណៈក៏បានដែរ។ អ្នកស្រីបន្ថែមទៀតថា តម្លៃសំបុត្រសម្រាប់ភ្ញៀវបរទេសក្នុងម្នាក់តម្លៃ ៥ដុល្លារ ថែមជូនភេសជ្ជៈ ១កំប៉ុង និងសម្រាប់ភ្ញៀវជាតិក្នុងម្នាក់តម្លៃសំបុត្រ ៥០០០រៀល ចំពោះក្មេងវិញក្រោមអាយុ ៨ឆ្នាំ គឺមិនត្រូវបានគិតប្រាក់នោះឡើយ។

អ្នកស្រី គួយ សៀកហេង បញ្ជាក់ថា អាជីវកម្មទូក ឬកាណូត ដឹកភ្ញៀវទេសចររបស់អ្នកស្រី មុនពេលជំងឺកូវីដ-១៩ រាតត្បាត គឺមានដំណើរការយ៉ាងល្អ ដោយមានភ្ញៀវទេសចរជាតិ និងអន្តរជាតិមកពីគ្រប់ទិសទី តែងតែមកជិះទូកដើម្បីកម្សាន្តលំហែអារម្មណ៍ នៅពេលរាត្រី។

ប៉ុន្តែក្រោយមកមានការផ្ទុះនូវជំងឺកូវីដ-១៩ ទើបធ្វើឲ្យអាជីវកម្មរបស់អ្នកស្រី ត្រូវថយចុះនៃចំនួនភ្ញៀវទេសចរយ៉ាងច្រើន។ អ្នកស្រី និយាយបន្តទៀតថា សម្រាប់ពេលបច្ចុប្បន្ននេះ បន្ទាប់ពីជំងឺកូវីដ-១៩​ បានធូរស្បើយ អ្នកស្រីសង្កេតឃើញថា ចំនួនភ្ញៀវទេសចរណ៍ជាតិ និងអន្តរជាតិចាប់ផ្ដើមកើនវិញបណ្ដើរៗហើយ គ្រាន់តែមិនទាន់ដូចកាលពីមុនដំបូងក្នុងចុងឆ្នាំ ២០១៩។

កញ្ញា ប៊ុន ស្រីម៉ុច និស្សិតឆ្នាំទី ៣ ជំនាញនីតិសាស្រ្ត នៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច បានប្រាប់កម្ពុជាថ្មីថា កញ្ញា និងមិត្តភក្តិ នៅពេលដែលទំនេរពីការសិក្សា និងការងារ ជម្រើសទី ១ គឺការជិះទូកកម្សាន្ត នៅតាមដងទន្លេមុខព្រះបរមរាជវាំង។ កញ្ញា បន្ថែមថា ការជិះទូកកម្សាន្តនេះ អាចជួយឲ្យកញ្ញា និងមិត្តភក្តិ មានអារម្មណ៍ថាស្រស់ថ្លា កាត់បន្ថយភាពតាងតឹង និងរឿងស្មុគស្មាញ បន្តពីម៉ោងសិក្សា និងម៉ោងការងារ។ កញ្ញា ប៊ុន ស្រីម៉ុច បញ្ជាក់ថា កញ្ញាមកជិះទូកលេងនៅទីនេះ គឺជាលើកទី ២ ហើយនឹងបន្តមកជិះទៀតនៅលើកក្រោយទៀត ប្រសិនបើកញ្ញាទំនេរពីការសិក្សា និងការងារប្រចាំថ្ងៃ។

លោក Sebastián ភ្ញៀវទេសចរជនជាតិអាឡឺម៉ង់ បានប្រាប់កម្ពុជាថ្មីថា លោកទើបតែមកលេងប្រទេសកម្ពុជាលើកទី ១ ហើយលោកពិតជាចាប់អារម្មណ៍ ការជិះទូកកម្សាន្តនៅតាមដងទន្លេនេះយ៉ាងខ្លាំង។ ពីព្រោះតែ ការជិះទូកវាធ្វើឲ្យលោកបានលំហែខួរក្បាល និងបានស្រូបយកខ្យល់អាកាសបរិសុទ្ធ នៅតាមដងទន្លេ ពិសេសទៀតនោះគឺ ទេសភាពនៅមុខព្រះបរមរាជវាំង នៅពេលរាត្រី ពិតជាអស្ចារ្យបំផុតសម្រាប់អារម្មណ៍របស់គាត់។

ចំណែកឯ លោក ម៉ាទីន (Martin) ភ្ញៀវទេសចរជនជាតិអាឡឺម៉ង់មួយរូបទៀត បង្ហាញពីចំណាប់អារម្មណ៍ពីការជិះទូកថា លោកទើបតែបានជិះទូកលើកដំបូង។ លោកបន្ថែមថា ក្រៅពីទេសភាពស្រស់ស្អាត និងខ្យល់អាកាសបរិសុទ្ធ លោកក៏ចាប់អារម្មណ៍មួយផ្នែកទៀតនោះ គឺម្អូបអាហារដ៏ឈ្ងុយឆ្ញាញ់ដែលចម្អិនដោយស្នាដៃចុងភៅរបស់ខ្មែរ ហើយជាក់ស្ដែងនោះ គឺទាំងតម្លៃក៏សមរម្យអាចទទួលយកបាន ដែលធ្វើឲ្យលោកអារម្មណ៍ថា មិនអាចបំភ្លេចបានឡើយ៕

អត្ថបទ៖ សួស សិត