ថ្នាក់ដឹកនាំបក្សកាន់អំណាច កម្ពុជា-វៀតណាម-ឡាវ ប្ដេជ្ញាបន្តពូនជ្រុំទំនាក់ទំនងប្រទេសទាំងបី

ថ្នាក់ដឹកនាំគណបក្សកាន់អំណាច កម្ពុជា-ឡាវ-វៀតណាម បានប្ដេជ្ញាចិត្តរួមគ្នារក្សា និងបន្តពូនជ្រុំទំនាក់ទំនងមិត្តភាពជាប្រពៃណីរវាងប្រទេសទាំងបី។ ការប្ដេជ្ញាចិត្តនេះ ធ្វើឡើងក្នុងជំនួបកំពូលរវាងសម្តេចតេជោ ហ៊ុន សែន ប្រធានគណបក្សប្រជាជនកម្ពុជា លោក ង្វៀន ហ្វូចុង អគ្គលេខាធិការគណៈកម្មាធិការមជ្ឈិមបក្សកុម្មុយនីស្តវៀតណាម និងលោក ថងលុន ស៊ីសុលីត អគ្គលេខាធិការគណៈកម្មាធិការមជ្ឈិមបក្សប្រជាជនបដិវត្តន៍ឡាវ កាលពីថ្ងៃទី៦ ខែកញ្ញា នារដ្ឋធានីហាណូយ។

ព្រឹត្តិការណ៍នេះដ៏មានអត្ថន័យយ៉ាងសំខាន់នេះ ក្នុងបំណងពង្រឹង និងពង្រីកទំនាក់ទំនងរវាងបក្ស និងប្រជាជនប្រទេសទាំងបី កម្ពុជា-ឡាវ-វៀតណាម ក្នុងបរិបទតំបន់ និងពិភពលោក ដែលកំពុងមានការប្រែប្រួលយ៉ាងស្មុគស្មាញ ស្របពេលដែលបក្សទាំងបី និងប្រទេសទាំងបីកំពុងឈានចូលដំណាក់កាលអភិវឌ្ឍន៍ថ្មី។

បើតាមសេចក្ដីប្រកាសព័ត៌មានរបស់គណបក្សប្រជាជនកម្ពុជា នៅក្នុងជំនួបនោះ សម្តេចតេជោ ហ៊ុន សែន លោក ង្វៀន ហ្វ៊ីចុង និងលោក ថងលុន ស៊ីសុលីត បានលើកឡើងអំពីស្ថានភាពរបស់បក្សនីមួយៗ និងប្រទេសនីមួយៗ ជាពិសេសគឺការកសាងបក្ស និងការអភិវឌ្ឍសេដ្ឋកិច្ចសង្គម ស្ថានភាពតំបន់ និងពិភពលោក ដែលកំពុងកើតមានឡើងនាពេលថ្មីៗនេះ ។ ថ្នាក់ដឹកនាំទាំងបី ក៏បានយកចិត្តទុកដាក់ និងបានវាយតម្លៃចំពោះលទ្ធផលនៃកិច្ចសហប្រតិបត្តិការរវាងបក្សទាំងបី និងប្រទេសទាំងបីក្នុងរយៈពេលកន្លងមក។ ថ្នាក់ដឹកនាំ បានឯកភាពគ្នាលើការតម្រង់ទិសសំខាន់ៗសម្រាប់ទំនាក់ទំនង និងកិច្ចសហប្រតិបត្តិការរវាងបក្សទាំងបី និងប្រទេសទាំងបីលើវិស័យផ្សេងៗ ដែលជាផលប្រយោជន៍រួមសម្រាប់ជាតិ និងប្រជាជន នៅពេលអនាគត។

ថ្នាក់ដឹកនាំ ក៏បានអបអរសាទរចំពោះសមិទ្ធិផលសំខាន់ៗគ្រប់ជ្រុងជ្រោយ ដែលប្រទេសទាំងបីសម្រេចបាន ហើយបានសម្តែងនូវសេចក្តីរីករាយ និងកោតសរសើរចំពោះទំនាក់ទំនងល្អរវាងបក្ស និងប្រជាជននៃប្រទេសទាំងបី ដែលមានការវិវឌ្ឍជាវិជ្ជមានកាន់តែរីកចម្រើនស៊ីជម្រៅលើគ្រប់វិស័យ ក្នុងនោះរួមមាន ទំនាក់ទំនងនយោបាយ កិច្ចសហប្រតិបត្តិការការពារជាតិនិងសន្តិសុខ សេដ្ឋកិច្ច វប្បធម៌ វិទ្យាសាស្ត្រ អប់រំ និងបច្ចេកទេស។

ទន្ទឹមនេះ ថ្នាក់ដឹកនាំបក្សទាំងបី បានសង្កត់ធ្ងន់អំពីប្រពៃណីសាមគ្គីភាពជិតស្និទ្ធជាប្រវត្តិសាស្ត្រក្នុងការជួយគ្នាទៅវិញទៅមករវាងបក្ស និងប្រជាជននៃប្រទេសទាំងបី គឺជាទ្រព្យសម្បត្តិដ៏មានតម្លៃ និងជាកត្តាដ៏សំខាន់បំផុត ដែលជាប្រភពកម្លាំងដ៏ខ្លាំងក្លាក្នុងបុព្វហេតុតស៊ូរំដោះជាតិ និងដណ្តើមឯករាជ្យក្នុងអតីតកាល ក៏ដូចជាក្នុងកិច្ចការការពារ និងកសាងប្រទេសរៀងៗខ្លួនរហូតដល់សព្វថ្ងៃនេះ។

សម្ដេចប្រធានគណបក្សប្រជាជនកម្ពុជា អគ្គលេខាធិការបក្សកុម្មុយនីស្តវៀតណាម និងអគ្គលេខាធិការបក្សប្រជាជនបដិវត្តន៍ឡាវ បានឯកភាពគ្នាថា ក្នុងសភាពការណ៍បច្ចុប្បន្នបក្ស និងប្រជាជនប្រទេសទាំងបី ត្រូវពង្រឹងសាមគ្គីភាព សហការជិតស្និទ្ធ និងគាំទ្រគ្នាទៅវិញទៅមក។ ទំនាក់ទំនងរវាងបក្សទាំងបី ជាមូលដ្ឋានគ្រឹះសម្រាប់តម្រង់ទិសទំនាក់ទំនងស្អិតរមួតរវាងប្រទេសទាំងបី ពង្រឹងសសរស្តម្ភលើវិស័យការពារជាតិ និងសន្តិសុខ ពង្រឹងកិច្ចសហប្រតិបត្តិការលើវិស័យការបរទេស ជំរុញថែមទៀតនូវកិច្ចសហប្រតិបត្តិការសេដ្ឋកិច្ច វប្បធម៌ អប់រំ វិទ្យាសាស្ត្រ បច្ចេកវិទ្យា ទេសចរណ៍ និងកសិកម្ម ជំរុញកិច្ចសហប្រតិបត្តិការរវាងស្ថាប័នរបស់បក្ស រដ្ឋ រណសិរ្ស អង្គការមហាជន និងថ្នាក់ក្រោមជាតិនៃ ប្រទេសទាំងបី ដោយឈរលើមូលដ្ឋាននៃសក្ដានុពល និងភាពខ្លាំងរបស់ប្រទេសនីមួយៗ។

ភាគីទាំងបីបានឯកភាពបន្តលើកកម្ពស់យន្តការដែលមានស្រាប់ប្រកបដោយប្រសិទ្ធភាព និងស្រាវជ្រាវ បង្កើតយន្តការកិច្ចសហប្រតិបត្តិការថ្មីមួយចំនួន ដើម្បីពង្រឹងកិច្ចសហប្រតិបត្តិការរវាងបក្ស និងប្រជាជន នៃប្រទេសទាំងបី សម្រាប់ជាផលប្រយោជន៍របស់ប្រជាជន ការកសាងនិងការពារសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់ និងពិភពលោក៕