ក្រសួងកសិកម្ម នឹងរៀបចំស្ដង់ដារគុណភាពផលិតផលកសិកម្មថែមទៀត ធានាសុវត្ថិភាពអាហារ

អ្នកនាំពាក្យក្រសួងកសិកម្ម កញ្ញា អ៊ឹម រចនា បានថ្លែងឱ្យថា បន្ថែមពីលើការអនុវត្តស្ដង់ដារគុណភាពផលិតផលជល ផល ក្រសួង ក៏កំពុងរៀបចំស្ដង់ដារដូចគ្នានេះសម្រាប់ផលិតផលកសិកម្មផ្សេងទៀត ជាអាទិ៍ បន្លែ ផ្លែឈើ និងស្រូវអង្ករ។ អ្នកនាំពាក្យរូបនេះ បញ្ជាក់ថា ការរៀបចំឱ្យមានការអនុវត្តស្ដង់ដារគុណភាពផលិតផលនេះ សំដៅធានាដល់សុវត្ថិភាពចំណីអាហារ និងដើម្បីជំរុញការប្រកួតប្រជែងទីផ្សារទាំងក្នុងស្រុក និងអន្តរជាតិ។

ថ្លែងប្រាប់ក្រុមអ្នកសារព័ត៌មាន នាល្ងាចថ្ងៃទី២០ ខែកញ្ញា ឆ្នាំ២០២៣ ក្នុងឱកាសចុះទស្សនកិច្ចនៅសិប្បកម្មផលិតទឹកត្រីមួយកន្លែង ក្នុងរាជធានីភ្នំពេញ កញ្ញា អ៊ឹម រចនា បានលើកឡើងនូវអត្ថប្រយោជន៍នៃការអនុវត្តស្ដង់ដារនិមិត្តសញ្ញាគុណភាពផលិតផលជលផលកម្ពុជា (CQS)។ កញ្ញា លើកឡើងថា វិញ្ញាបនបត្រនិមិត្តសញ្ញាគុណភាពផលិតផលជលផលកម្ពុជា CQS) បានផ្ដល់ផលប្រយោជន៍ជាច្រើនដល់សហគ្រាសកែច្នៃខ្នាតតូច និងមធ្យម ដោយក្នុងនោះ ជួយកាត់បន្ថយការចំណាយថ្លៃដើម ជំរុញការកែច្នៃផលិតផលឱ្យមានគុណភាពខ្ពស់ប្រកបដោយស្ដង់ដារបច្ចេកទេស ហើយនៅពេលដាក់លក់លើទីផ្សារមានតម្លៃទ្វេដងជាងផលិតផលកែច្នៃធម្មតា។

កញ្ញា អ៊ឹម រចនា បន្តថា មិនត្រឹមតែផ្ដល់ប្រាក់ចំណេញបន្ថែមសម្រាប់ម្ចាស់សហគ្រាសប៉ុណ្ណោះទេ តែវិញ្ញាបនបត្រនិមិត្តសញ្ញាគុណភាពផលិតផលជលផលកម្ពុជា (CQS) ក៏បានរួមចំណែកជះឥទ្ធិពលដល់សុខមាលភាពរបស់បរិភោគផងដែរ ។ បើតាមអ្នកនាំពាក្យរូបនេះ ប្រព័ន្ធ CQS ជាស្ដង់ដារសម្រាប់ផ្ដល់ឱ្យដល់សហគ្រាសកែច្នៃផលិតផលដែលមានការធានាដល់សុវត្ថិភាពចំណីអាហារ មានអនាម័យល្អ ដើម្បីធានាថាមិនមានហានិភ័យ ឬផលប៉ះពាល់ណាមួយដល់សុខភាពអ្នកបរិភោគ។

ត្រង់ចំណុចនេះ កញ្ញា អ៊ឹម រចនា សង្កត់ធ្ងន់ថា បញ្ហាសុវត្ថិភាពចំណីអាហារ ជាអ្វីដែលរាជរដ្ឋាភិបាលកម្ពុជាតែងតែយកចិត្តទុកដាក់ខ្ពស់ ហើយតាមរយៈយន្តការនៃការអនុវត្តស្ដង់ដារ CQS នេះ ក៏ជាឧទាហរណ៍មួយក្នុងចំណោមឧទាហរណ៍ជាច្រើនទៀតដែលមានក្រសួងកសិកម្ម ក្នុងនាមជាសេនាធិការរបស់រាជរដ្ឋាភិបាល បានកំពុងធ្វើ និងគិតគូរលើសុវត្ថិភាព ចំណីអាហារ ក៏ដូចជាសុខមាលភាពរបស់ពលរដ្ឋ។ កញ្ញា បញ្ជាក់ដែរថា ជាជំហានបន្ទាប់ ក្រសួងកសិកម្ម រុក្ខាប្រមាញ់ និងនេសាទ ក៏កំពុងគ្រោងរៀបចំឱ្យមានប្រព័ន្ធស្ដង់ដារគុណភាពដូចគ្នានេះបន្ថែមទៀតសម្រាប់ការទទួលស្គាល់លើនិមិត្តសញ្ញាគុណភាពផលិតផលកសិកម្ម ដូចជា បន្លែ ផ្លែឈើ និងស្រូវអង្ករ ផងដែរ៕