ព័ត៌មានជាតិ

ក្រសួងស្ថាប័នចំនួន៧ប្រកាសជ្រើសរើសមន្ត្រីក្របខ័ណ្ឌចំនួន២៣០កន្លែងសម្រាប់ឆ្នាំ២០២១

បានផុស

៥ years មុន

នៅ

ថ្ងៃពុធ ៣ កុម្ភៈ ២០២១

ដោយ

ក្រសួងស្ថាប័នចំនួន៧បានប្រកាសជ្រើសរើសក្របខ័ណ្ឌមន្ត្រីរាជការស៊ីវិលចំនួន២៣០កន្លែងឲ្យចូលបម្រើការងារក្របខ័ណ្ឌសម្រាប់ឆ្នាំ២០២១នេះ។

យោងតាមឯកសារមន្ត្រីសាធារណៈចុះថ្ងៃ០៣ ខែកុម្ភៈឆ្នាំ២០២១នេះបានឲ្យដឹងថា ក្រសួងស្ថាប័នចំនួន៧ដែលត្រូវការជ្រើសរើសមន្ត្រីក្របខ័ណ្ឌនោះរួមមានក្រសួងមុខងារសាធារណៈជ្រើសរើស៨កន្លែង ក្រសួងទំនាក់ទំនងរដ្ឋសភានិងព្រឹទ្ធសភានិងអធិការកិច្ចចំនួន៥កន្លែង ក្រសួងកសិកម្មរុក្ខាប្រមាញ់និងនេសាទចំនួន១៣៣កន្លែង ក្រសួងធនធានទឹកនិងឧត្តុនិយមចំនួន២៨កន្លែង ក្រសួងពាណិជ្ជកម្មចំនួន៣៦កន្លែង ក្រសួងរ៉ែនិងថាមពល៨កន្លែង និងរដ្ឋលេខាធិការដ្ឋានអាកាសចរស៊ីវិលចំនួន១២កន្លែង។

ចំពោះការទទួលពាក្យនៅតាមក្រសួងស្ថាប័នទាំង៧ខាងលើ នឹងឈប់ទទួលពាក្យនៅថ្ងៃទី៥ខែមីនាឆ្នាំ២០២១ខាងមុខ និងការបរិច្ឆេទនៃការប្រឡងនឹងជួនដំណឹងនៅពេលក្រោយ។

គួរបញ្ជាក់ថាឆ្នាំ២០២១រដ្ឋាភិបាលជ្រើសរើសមន្ត្រីក្របខ័ណ្ឌចំនួន៦១០៦នាក់ ក្នុងនោះក្រសួងចំនួនពីរត្រូវការច្រើនជាងគេរួមមានក្រសួងសុខាភិបាលត្រូវការ១៣០០នាក់ និងក្រសួងអប់រំយុវជននិងកីឡាត្រូវការចំនួន៣៦០០នាក់។

ការជ្រើសរើសក្របខ័ណ្ឌថ្មីឆ្នាំ២០២១នេះគ្រប់ក្រសួងស្ថាប័នត្រូវអនុវត្តផ្អែកត្រឹមចំនួនផែនការក្នុងឆ្នាំ២០២០ដែលបានផ្អាកកន្លងមកតែប៉ុណ្ណោះលើកលែងក្រសួងស្ថាប័នចំនួន៣រួមមានក្រសួងរៀបចំដែនដីនគររូបនីយកម្មនិងសំណង់ ក្រសួងការបរទេសនិងសហប្រតិបត្តិការអន្តរជាតិនិងរាជបណ្ឌិត្យសភាកម្ពុជា នៃទីស្តីការគណៈរដ្ឋមន្ត្រីដែលបានអនុវត្តជ្រើសរើសរួចហើយមិនអាចជ្រើសរើសក្របខ័ណ្ឌថ្មីបន្ថែមក្នុងឆ្នាំ២០២១ឡើយ៕

អត្ថបទ ៖ សំអឿន

Related Topics:ជ្រើសរើសមន្ត្រីក្របខ័ណ្ឌ