ក្រសួងបរិស្ថានជ្រើសរើសមន្ត្រីក្របខណ្ឌក្រសួងចំនួន៣១កន្លែងសម្រាប់ឆ្នាំ២០២៣

ក្រសួងបរិស្ថាន បានប្រកាសបើកការប្រឡងជ្រើសរើសចូលបម្រើការងារ ជាមន្ត្រីរាជការក្របខណ្ឌក្រសួងប្រភេទ​«ក»ចំនួន ៣១កន្លែង។ ក្នុងនោះ មន្ត្រីរាជការបម្រើការងារនៅទីស្ដីការក្រសួងចំនួន១៧កន្លែង និងបម្រើការនៅតាមមន្ទីរបរិស្ថានខេត្តចំនួន១៤កន្លែង។

សេចក្ដីជូនដំណឹងរបស់ក្រសួងបរិស្ថាន បានឲ្យដឹងថា៖«ក្នុងឆ្នាំ២០២៣ ក្រសួងបរិស្ថានមានការប្រឡងជ្រើសរើសចូលបម្រើការងារជាមន្ត្រីរាជការក្នុងក្របខណ្ឌក្រសួងបរិស្ថានចំនួន៣១កន្លែង»។ សម្រាប់លក្ខខណ្ឌនៃប្រឡងជ្រើសរើស គឺក្រសួងតម្រូវឲ្យបេក្ខជន-បេក្ខនារីទាំងអស់ត្រូវមានសញ្ជាតិខ្មែរ មានសញ្ញាបត្រថ្នាក់បរិញ្ញាបត្រ ហើយត្រូវមានអាយុមិនឲ្យលើសពី៣៥ឆ្នាំ (គិតត្រឹមថ្ងៃប្រឡង)។ សម្រាប់បេក្ខជន-បេក្ខនារី ដែលត្រូវមានសញ្ញាបត្រថ្នាក់បរិញ្ញាបត្រជាន់ខ្ពស់ ឬសញ្ញាបត្រសមមូល ត្រូវមានអាយុមិនឲ្យលើសពី៤០ឆ្នាំ (គិតត្រឹមថ្ងៃប្រឡង)។ ដោយឡែក បេក្ខជន-បេក្ខនារី ដែលមានសញ្ញាបត្រថ្នាក់បណ្ឌិត ឬសញ្ញាបត្រសមមូល ត្រូវបានលើកលែងលក្ខខណ្ឌអាយុ។

ទាក់ទិននឹងវិញ្ញាសាប្រឡង គឺមាន៣វិញ្ញាសា រួមមាន៖ ១.វិញ្ញាសាចំណេះដឹងទូទៅ ២.វិញ្ញាសាជំនាញឯកទេសបរិស្ថាន និង៣.វិញ្ញាសាភាសាអង់គ្លេស។ រីឯកាលបរិច្ឆេទប្រឡង និងទីកន្លែងប្រឡង គឺក្រសួងបានកំណតយកថ្ងៃទី១៥ ខែឧសភា ឆ្នាំ២០២៣ នៅទីស្តីការក្រសួងបរិស្ថាន (សាលប្រជុំ ម៉ុក ម៉ារ៉េត)។

បន្ថែមពីនេះ ក្រសួងបរិស្ថាន បានបញ្ជាក់ដែរថា បេក្ខជន-បេក្ខនារីដែលមានចំណាប់អារម្មណ៍ អាចមកដាក់ពាក្យសុំសិទ្ធិប្រឡងចាប់ពីថ្ងៃជូនដំណឹងនេះតទៅរៀងរាល់ម៉ោងធ្វើការ ដោយពេលព្រឹក ចាប់ពីម៉ោង៨ព្រឹក ដល់ម៉ោង១១ថ្ងៃ និងពេលរសៀលចាប់ពីម៉ោង១៤ ដល់ម៉ោង១៧ល្ងាច នៅនាយកដ្ឋានធនធានមនុស្ស និងនៅមន្ទីរបរិស្ថានរាជធានី-ខេត្ត ចាប់ពីថ្ងៃផ្សាយដំណឹងនេះរហូតដល់ថ្ងៃទី៥ ខែឧសភា ឆ្នាំ២០២៣។ ទន្ទឹមនេះ សំណុំលិខិតដែលត្រូវភ្ជាប់មកជាមួយក្នុងការដាក់ពាក្យប្រឡង រួមមាន៖ ពាក្យសុំចុះឈ្មោះប្រឡង រូបថតថ្មីថតចំពីមុខ(៤ x ៦) សលាកបត្រឯកត្តជន សេចក្តីចម្លងសញ្ញា បត្រដោយមានបញ្ជាក់ជាផ្លូវការ ជីវប្រវត្តិសង្ខេបមានបិទរូបថត(៤ x ៦) បង្កាន់ដៃបង់ប្រាក់សុំសិទ្ធិប្រឡង កិច្ចសន្យាបម្រើការងារក្រសួង សេចក្តីចម្លងសំបុត្រកំណើត ថតចម្លងសៀវភៅស្នាក់នៅ ឬសៀវភៅគ្រួសារ ជាដើម៕

ដោយ៖ ធឿន វ៉ាន់សុង