ចាប់ផ្ដើមដំណើរការកែសន្លឹកកិច្ចការបេក្ខជន ប្រឡងចូលបម្រើការងារក្នុងក្របខណ្ឌក្រសួង-ស្ថាប័នចំនួន ៣

បន្ទាប់ពីបញ្ចប់ដំណើរការប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌក្រសួង-ស្ថាប័នចំនួន ៣ ដោយជោគជ័យមក, ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង នាព្រឹកថ្ងៃទី ៦ ខែមីនា ឆ្នាំ ២០២៤នេះ បានអញ្ជើញជាអធិបតីក្នុងពិធីបើកសោសៀលទ្វារតម្កល់ឯកសារសន្លឹកកិច្ចការរបស់បេក្ខជន ដើម្បីចាប់ផ្ដើមដំណើរការកែសន្លឹកកិច្ចការប្រឡងជ្រើសរើសមន្ត្រីរាជការចូលបម្រើការងារក្នុងក្របខណ្ឌក្រសួង-ស្ថាប័នទាំង ៣នោះ។

ក្នុងពិធីនេះ ក៏មានការអញ្ជើញចូលរួមពីលោក ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ, តំណាងក្រសួងសាធារណការ និងដឹកជញ្ជូន និងតំណាងក្រសួងកសិកម្ម រុក្ខាប្រមាញ់ និងនេសាទ ហើយពិធីនេះធ្វើឡើងនៅមណ្ឌលកំណែ នៃសាលាភូមិន្ទរដ្ឋបាល។

បន្ទាប់ពីបើកសោសៀលទ្វារតម្កល់ឯកសារសន្លឹកកិច្ចការរបស់បេក្ខជនហើយ, ឯកឧត្ដម ហ៊ុន ម៉ានី និងតំណាងក្រសួង-ស្ថាប័នពាក់ព័ន្ធ បានបន្តត្រួតពិនិត្យការកាត់ក្បាលសន្លឹកកិច្ចការរបស់បេក្ខជន ដែលបានចូលរួមប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្រសួង-ស្ថាប័នចំនួន ៣ទាំងនោះ មុននឹងបញ្ជូនឲ្យអ្នកកំណែកិច្ចការ។

សន្លឹកកិច្ចការរបស់បេក្ខជន ដែលចូលរួមប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្រសួង-ស្ថាប័នទាំង ៣នោះ ត្រូវបានចាប់ផ្ដើមធ្វើកំណែ ចាប់ពីថ្ងៃទី ៦ ខែមីនា ឆ្នាំ ២០២៤នេះ ហើយគ្រោងនឹងបញ្ចប់ក្នុងរយៈពេល ១សប្ដាហ៍។

សូមជម្រាបថា ក្រសួងមុខងារសាធារណៈ បានរៀបចំដំណើរការប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌក្រសួង-ស្ថាប័នចំនួន ៣ ដែលធ្វើឡើងរយៈពេល ៣ថ្ងៃជាប់គ្នា ចាប់ពីថ្ងៃទី ៣ ដល់ថ្ងៃទី ៥ ខែមីនា ឆ្នាំ ២០២៤។ ក្រសួង-ស្ថាប័នទាំង ៣នោះ រួមមាន៖ អង្គភាពប្រឆាំងអំពើពុករលួយ, ក្រសួងសាធារណការ និងដឹកជញ្ជូន និងក្រសួងកសិកម្ម រុក្ខាប្រមាញ់ និងនេសាទ។

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានបង្ហោះសារនៅលើទំព័រហ្វេសប៊ុក កាលពីថ្ងៃទី ៥ ខែមីនា ថា រយៈពេល ៣ថ្ងៃ នៃការប្រឡងប្រជែងជ្រើសរើសមន្ត្រីរាជការស៊ីវិលចំនួន ៣ ក្រសួង-ស្ថាប័ន បានបញ្ចប់ទៅប្រកបដោយក្តីមោទនៈ មានរបៀបរៀបរយ មានសណ្តាប់ធ្នាប់ និងគោរពតាមគោលការណ៍ដូចការគ្រោងទុក។

ឯកឧត្តម ហ៊ុន ម៉ានី បានសរសេរបន្តថា អ្វីដែលគួរឲ្យកត់សម្គាល់លើសពីដំណើរការ និងបច្ចេកទេសនៃការប្រឡង តាមការសង្កេតជាប្រចាំ គឺឯកឧត្ដមបានវាយតម្លៃខ្ពស់ចំពោះការខិតខំប្រឹងប្រែង និងស្មារតីទទួលខុសត្រូវ ប្រកប​ដោយវិជ្ជាជីវៈរបស់ថ្នាក់ដឹកនាំ និងក្រុមការងារគ្រប់ៗរូប នៃក្រសួងមុខងារសាធារណៈ រួមជាមួយស្ថាប័នពាក់ព័ន្ធទាំងអស់។ 

ឯកឧត្តមឧបនាយករដ្ឋមន្ត្រី បានលើកឡើងថា «ទាំងនេះ គឺជាការចូលរួមប្រែក្លាយទស្សនវិស័យរបស់សម្តេចធិបតី នាយករដ្ឋមន្ត្រី ឲ្យក្លាយជាការពិត ក្នុងបេសកកម្មកែទម្រង់រដ្ឋបាលសាធារណៈរបស់រាជរដ្ឋាភិបាល អាណត្តិទី ៧ ពោល គឺកែលម្អប្រព័ន្ធជ្រើសរើសមន្ត្រីរាជការស៊ីវិល»៕