ទណ្ឌិតជាង៩០០នាក់ គ្រោងស្នើបន្ធូរបន្ថយ និងលើកលែងទោសក្នុងបុណ្យឯករាជ្យជាតិ និងបុណ្យអុំទូក

នៅក្នុងឱកាសបុណ្យឯករាជ្យជាតិ ៩វិច្ឆិកា និងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាពេលខាងមុខ ទណ្ឌិតចំនួនប្រមាណជាង៩០០នាក់ ដែលកំពុងជាប់ឃុំនៅតាមពន្ធនាគារទូទាំងប្រទេស គ្រោងស្នើសុំបន្ធូរបន្ថយទោស និងលើកលែងទោស។

បើតាមសេចក្ដីជូនដំណឹងរបស់ក្រសួងយុត្តិធម៌ នៅព្រឹកថ្ងៃទី៧ ខែវិច្ឆិកា ឆ្នាំ២០២៣ ស្អែកនេះ នាទីស្តីការក្រសួងយុត្តិធម៌ នឹងមានរៀបចំកិច្ចប្រជុំពិនិត្យរបស់គណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស ដើម្បីពិនិត្យលើសំណើរសុំបន្ធូរបន្ថយទោស និងលើកលែងទោសសម្រាប់ឱកាសនៃពិធីបុណ្យឯករាជ្យជាតិ  ៩ វិច្ឆិកា និងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកខាងមុខនេះ។

គណៈកម្មការជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស បានទទួលសំណើរពីគណៈកម្មការរាជធានី-ខេត្ត គឺពន្ធនាគាររាជធានី-ខេត្ត ចំនួន២៣ និងពីគណៈកម្មការក្រសួងមហាផ្ទៃ គឺមណ្ឌលអប់រំកែប្រែទាំង៤ បានស្នើសុំបន្ធូរបន្ថយទោស និងលើកលែងទោសដល់ទណ្ឌិតនាឱកាសនៃពិធីបុណ្យទាំងពីរនេះសរុបចំនួន ៩០២ នាក់ (ស្រី ៦១នាក់)។ នៅក្នុងនោះ ពិធីបុណ្យឯករាជ្យជាតិ  (៩ វិច្ឆិកា) មានទណ្ឌិតចំនួន ៤៦៤ នាក់ (ស្រី ៣៤ នាក់) ដោយស្នើសុំបន្ធូរបន្ថយទោសចំនួន ៤៣២ នាក់ (ស្រី ២៩ នាក់) និងស្នើសុំលើកលែងទោស ចំនួន ៣២ នាក់  (ស្រី ០៥ នាក់) ។

ចំណែក ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មានបញ្ជីទណ្ឌិតចំនួន ៤៣៨ នាក់ (ស្រី ២៧ នាក់) ដោយស្នើសុំបន្ធូរបន្ថយទោស ចំនួន ៤១៨ នាក់ ( ស្រី ២៦ នាក់) និងស្នើសុំលើកលែងទោស ចំនួន ២០ នាក់ ( ស្រី ០១ នាក់)៕