ទណ្ឌិត១២៥៤នាក់មានឈ្មោះក្នុងបញ្ជីសុំបន្ធូរបន្ថយ និងលើកលែងទោស ថ្ងៃបុណ្យចូលឆ្នាំខ្មែរ និងវិសាខបូជា

ទណ្ឌិតចំនួន១២៥៤នាក់ ដែលកំពុងទទួលការអនុវត្តទោសក្នុងពន្ធនាគាររាជធានីខេត្តចំនួន ២៤ និងមណ្ឌលអប់រំកែប្រែចំនួន ៤ មានឈ្មោះក្នុងបញ្ជីទណ្ឌិតសម្រាប់ការស្នើសុំអនុគ្រោះទោសក្នុងឱកាសពិធីបុណ្យចូលឆ្នាំប្រពៃណីជាតិ និងពិធីបុណ្យវិសាខបូជា ឆ្នាំ២០២៦ បន្ទាប់ពីគណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស បានបើកកិច្ចប្រជុំ នៅថ្ងៃទី៣១ ខែមីនា ឆ្នាំ២០២៦ នេះ។

ក្រោយកិច្ចប្រជុំ ក្រសួងយុត្តិធម៌ ផ្សព្វផ្សាយឱ្យដឹងថា ក្នុងពិធីបុណ្យចូលឆ្នាំថ្មីប្រពៃណីជាតិខ្មែរមានទណ្ឌិតចំនួន ៦៦៨ នាក់ (ស្រី ៥៣ នាក់) និងសម្រាប់ពិធីបុណ្យវិសាខបូជាមានទណ្ឌិតចំនួន ៥៨៦ នាក់ ដែលត្រូវស្នើសុំបន្ធូរបន្ថយទោស និងលើកលែងទោស។

ក្នុងចំណោមទណ្ឌិតសរុបចំនួន ១២៥៤ នាក់ នេះ គឺមានទណ្ឌិតចំនួន ៩៧៣នាក់ ត្រូវស្នើសុំបន្ធូរបន្ថយទោស៣ខែ។ ទណ្ឌិត១៩៦នាក់ត្រូវស្នើសុំបន្ធូរបន្ថយទោស៦ខែ។  ទណ្ឌិតចំនួន ៦៤នាក់ ត្រូវស្នើសុំបន្ធូរបន្ថយទោស ៩ខែ។ ទណ្ឌិតចំនួន១៤នាក់ ត្រូវស្នើសុំបន្ធូរបន្ថយទោស១២ខែ។ ទណ្ឌិតចំនួន៣នាក់ ត្រូវស្នើសុំបន្ថយទោសពីមួយជីវិតមកត្រឹម ៣០ឆ្នាំ និងទណ្ឌិតចំនួន៤នាក់ ត្រូវស្នើសុំលើកលែងទោស។   នេះបើតាមការបញ្ជាក់លម្អិតរបស់លោក គឹម សន្តិភាព សមាជិកកគណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស នៅលើបណ្ដាញសង្គមផ្លូវការ។

តាមនីតិវិធីក្រោយពីកិច្ចប្រជុំគណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោសចប់ទៅ គណៈកម្មការថ្នាក់ជាតិនេះ ត្រូវរៀបចំបែបបទជូនប្រមុខរាជរដ្ឋាភិបាលពិនិត្យ និងសម្រេច ដើម្បីដាក់សំណុំថ្វាយព្រះមហាក្សត្រសុំបន្ធូរបន្ថយ និងលើកលែងទោសឱ្យទណ្ឌិត។

គួររម្លឹកថា ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ និងពិធីបុណ្យវិសាខបូជា កាលពីឆ្នាំ២០២៥ ទណ្ឌិតសរុបចំនួន ៩០០ នាក់ ត្រូវបានព្រះមហាក្សត្រកម្ពុជាបន្ធូរបន្ថយទោស និងលើកលែងទោស។

គួរឱ្យដឹងថា រដ្ឋធម្មនុញ្ញ ជាច្បាប់កំពូលនៃកម្ពុជា មាត្រា ២៧ បញ្ញត្ដិថា «ព្រះមហាក្សត្រទ្រង់មានព្រះរាជសិទ្ធិបន្ធូរបន្ថយ និងលើកលែងទោស»។ លក្ខខណ្ឌ បែបបទ និងនីតិវិធីនៃការបន្ធូរបន្ថយទោស និងលើកលែងទោសដល់ទណ្ឌិត ត្រូវបានបញ្ញត្តិ ក្នុងព្រះរាជក្រឹត្យចុះថ្ងៃទី១២ ខែមករា ឆ្នាំ២០២១។ នៅកម្ពុជាមានពិធីបុណ្យជាតិចំនួន ៥ ដែលទណ្ឌិតអាចស្នើសុំលើកលែង និងបន្ធូរបន្ថយទោស រួមមាន ទិវា​ជ័យជម្នះ​លើ​របប​ប្រល័យពូជសាសន៍ ៧ មករា,  ពិធីបុណ្យ​ចូលឆ្នាំថ្មី​ប្រពៃណីជាតិ, ពិធីបុណ្យ​វិសាខបូជា, ពិធីបុណ្យ​ឯករាជ្យជាតិ, និង​ព្រះ​រាជពិធី​បុណ្យអុំទូក បណ្តែតប្រទីប​ និង ​សំពះ​ព្រះខែ អកអំបុក​។  ការបន្ធូរ​បន្ថយទោស និង​ការលើកលែង​ទោស​ចំពោះ​ទណ្ឌិត​ក្នុង​គោលបំណង​ដើម្បី​ធ្វើ​សមាហរណកម្ម​ទណ្ឌិត​នោះ​ឱ្យ​ចូលទៅ​រួមរស់​ក្នុង​សង្គម​វិញ ឬ​ក្នុង​គោលបំណង​ផ្នែក​មនុស្សធម៌ ហើយ​អាចអនុវត្ត​បាន​តែ​ចំពោះ​ទណ្ឌិត​ដែល​ត្រូវបាន​ផ្តន្ទាទោស​ដាក់​ពន្ធនាគារ​ដោយ​សាលក្រម​ ឬ​សាលដីកា​ស្ថាពរ​ប៉ុណ្ណោះ​។

ការបន្ធូរបន្ថយទោសដល់ទណ្ឌិតធ្វើឡើងទៅបាន លុះត្រាតែទណ្ឌិតនោះបានទទួលការអនុវត្តទោស ១ភាគ៣ នៃទោសដាក់ពន្ធនាគារសរុប ដែលតុលាការបានកំណត់ ហើយចំពោះទោសដាក់ពន្ធនាគារមួយជីវិត ទណ្ឌិតត្រូវទទួលរងទោស ១០ឆ្នាំជាមុនសិន៕

ដោយ៖ ង៉ិល ណារ៉ាត់