​ថ្នាក់​ដឹក​នាំ​ក្រសួង​ការ​ងារ​ ចូលរួម​អបអរ​ខួប ៧២ ឆ្នាំ ​កម្ពុជា ​ទទួល​បាន​ឯករាជ្យ​ពី​បារាំង​

លោក ហេង​ សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រួមទាំងថ្នាក់ដឹកនាំក្រសួង ព្រឹកថ្ងៃអាទិត្យ ទី៩ ខែវិច្ឆិកា ឆ្នាំ២០២៥ ​បានចូលរួមក្នុងពិធី អបអរសាទរ ខួបអនុស្សាវរីយ៍​លើក​ទី៧២ឆ្នាំ នៃទិវាបុណ្យឯករាជ្យជាតិ ៩ វិច្ឆិកា និងទិវាកំណើតនៃ​កងយោធពលខេមរភូមិន្ទ របស់កម្ពុជា (១៩៥៣- ២០២៥) នៅវិមានឯករាជ្យ ក្រោមព្រះរាជាធិបតីភាព ព្រះករុណាព្រះបាទ​សម្ដេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា។

​ពិធីនេះ ក៏មានការយាង និងអញ្ជើញចូលរួមពីថ្នាក់ដឹកនាំស្ថាប័នកំពូលៗរបស់កម្ពុជា មានសមាជិក​ព្រឹទ្ធសភា រដ្ឋសភា រាជរដ្ឋាភិបាល ភ្ញៀវជាតិ អន្តរជាតិ មន្ត្រីទូតនានា មន្រ្តីរាជការ កងកម្លាំងប្រដាប់​អាវុធ យុវជន យុវតី សិស្សានុសិស្ស និងមហាជនយ៉ាងច្រើនកុះករ។​

​ទិវាបុណ្យឯករាជ្យជាតិ ៩ វិច្ឆិកា បានរំលឹកឱ្យឃើញពីព្រះរាជបេសកកម្មដើម្បីជាតិមាតុភូមិ និង​ប្រជារាស្ត្រខ្មែរ របស់ ព្រះករុណា ព្រះបាទ សម្តេច នរោត្តម សីហនុ ព្រះបិតាឯករាជ្យជាតិ ព្រះ​បរមរតនកោដ្ឋ ដែលព្រះអង្គបានលះបង់ព្រះកាយ​ពល និងព្រះបញ្ញាញាណយ៉ាងក្លៀវក្លាបំផុត ធ្វើ​ការ​តស៊ូ ក្នុងក្របខ័ណ្ឌនៃព្រះរាជបូជនីយកិច្ច ដើម្បីទាមទារឯករាជ្យដ៏ពិតប្រាកដសម្រាប់កម្ពុជា៕