​រដូវនេសាទចូលមកដល់​មន្ត្រីប៉ាន់ស្មានថា ផលនេសាទប្រហែលបានដូចឆ្នាំមុន

មន្ត្រីរដ្ឋបាលជលផល នៃ​ក្រសួងកសិកម្ម រុក្ខាប្រមាញ់ និង​នេសាទបានឱ្យដឹងថា រដូវនេសាទនៅដំណាច់ឆ្នាំនេះ ​អាចនឹងចូលមកដល់នៅថ្ងៃ ៥ កើត ខែមិគសិរ ដែលត្រូវនឹងថ្ងៃទី ១៧ ខែធ្នូ ឆ្នាំ ២០២៣។

​លោក ហុង ហ៊ី ប្រធាននាយកដ្ឋានកិច្ចការរដ្ឋបាល និងនីតិកម្ម នៃរដ្ឋបាលជលផល បានប្រាប់​កម្ពុជាថ្មី​នៅថ្ងៃទី ០៨ ខែធ្នូ ឆ្នាំ ២០២៣ នេះថា រដូវត្រីចុះច្រើននៅឆ្នាំនេះអាចនឹងចាប់ផ្ដើម​ប្រមាណ​ជិត ១០ ថ្ងៃទៀត ខណៈផលនេសាទ​អាចនឹង​ទទួល​បានប្រហាក់ប្រហែល ឬទាបជាងឆ្នាំមុន ដោយ​សារទឹកតូចជាងឆ្នាំមុន។ ​

លោកប៉ាន់ស្មានថា បរិមាណត្រីមិនអាចលើសនោះទេ ​គឺអាចស្មើ ឬតិចជាង។ ប៉ុន្តែលោកបញ្ជាក់ថា ​សម្រាប់​ប្រជា​នេសាទ​នៅតាមព្រែក ស្ទឹង ពួកគាត់ប្រាប់ថា គាត់នេសាទត្រីបានច្រើន​ ខណៈបឹងទន្លេសាប​អាចប្រ​ហាក់ប្រហែល ​ហើយផ្អែកលើអាកាស​ធាតុផងដែរ។

​យោងតាមសេចក្ដីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ បង្ហាញថា ផលនេសាទដាយត្រីនៅរាជធានីភ្នំពេញ និងខេត្តកណ្តាល នៅក្នុងឆ្នាំ២០២២-២០២៣ សម្រេច​បាន​បរិមាណ​ជិត ១ ៥០០ តោន (១៤៨១) ដែលបរិមាណនេះកើនឡើងប្រមាណ ៤០ភាគរយ បើធៀបទៅ​នឹងផល​នេសាទ​ដាយត្រីនារដូវនេសាទឆ្នាំ​២០២១-២០២២ ដែលទទួលបានចំនួន ៨៩០តោន៕