អ្នកជំនាញ៣រូប យល់ថា ការប្រារព្ធពិធីបុណ្យណូអែល​ មិនប៉ះពាល់ដល់វប្បធម៌ខ្មែរនោះទេ

ពិធីបុណ្យណូអែល (Christmas) ជាពិធីបុណ្យមួយប្រភេទ ដែលមានដើមកំណើតនៅតំបន់អ៊ឺរ៉ុប។ ពិធីបុណ្យនេះ ត្រូវបានគេប្រារព្ធធ្វើនៅតាមបណ្តាប្រទេសនានាដែលកាន់សាសនាគ្រឹស្តនៅលើសកលលោក ជារៀងរាល់ឆ្នាំនៅថ្ងៃទី២៥ ខែធ្នូ។ ក្នុងចំណោមបណ្តាប្រទេសប្រារព្ធនោះ ក៏មានរាលដាលមកដល់ប្រទេសកម្ពុជាផងដែរ។ តើការប្រារព្ធពិធីបុណ្យណូអែល​នេះ អាចប៉ះពាល់ដល់វប្បធម៌ខ្មែរដែរ ឬទេ? អ្នកជំនាញ៣រូប បានបញ្ជាក់ប្រាប់«កម្ពុជាថ្មី»ថា ការប្រារព្ធពិធីបុណ្យណូអែលនៅកម្ពុជា គឺមិនផលប៉ះដល់វប្បធម៌ខ្មែរនោះទេ។

អ្នកជំនាញផ្នែកទស្សនវិជ្ជា និងកិច្ចការសង្គមនៃរាជបណ្ឌិតសភាកម្ពុជា លោក​បណ្ឌិត ឈត ប៊ុនថង បានលើកឡើងថា ការប្រារព្ធពិធីបុណ្យណូអែល នៅក្នុងប្រទេសកម្ពុជា នាពេលបច្ចុប្បន្ននេះ មានភាពលេចធ្លោ និងមានការកើនឡើងគួរឱ្យកត់សម្គាល់ ជាពិសេស នៅក្នុងរាជធានីភ្នំពេញ និងតាមបណ្តាខេត្តមួយចំនួនទៀត។ លោកថា បើតាមការយល់ឃើញរបស់លោក ការដែលមានការរៀបចំពិធីបុណ្យនេះឡើងនៅក្នុងប្រទេសកម្ពុជា ដោយសារមានប្រជាជនមួយចំនួនជាអ្នកកាន់សាសនានេះ ហើយមួយចំនួនទៀតមិនមែនជាអ្នកកាន់សាសនានេះទេ ប៉ុន្តែ រៀបចំឡើង ដើម្បីឱ្យមានការទាក់ទាញអតិថិជន។ ជាក់ស្តែង ដូចជា ការរៀបចំនៅតាមសណ្ឋាគារ ភោជនីយដ្ឋាន សាលារៀន និងបណ្តាក្រុមហ៊ុនឯកជនមួយចំនួនទៀត ដែលបានរៀបចំដាក់តាំងលម្អដើមគ្រីសស្មាស់ជាដើម។

លោកបានបញ្ជាក់បន្ថែមថា នៅក្នុងប្រទេសកម្ពុជា រដ្ឋធម្មនុញ្ញ បានបើកទូលាយឱ្យមានការគោរពបូជានូវសាសនាផ្សេងៗ ដោយធ្វើយ៉ាងណាកុំឱ្យតែប៉ះពាល់ដល់សណ្តាប់ធ្នាប់ សន្តិសុខសាធារណៈ គឺអាចប្រតិបត្តិសាសនានោះបាន។ ដូច្នេះហើយ សម្រាប់លោកបណ្ឌិត ឈត ប៊ុនថង ការប្រារព្ធពិធីបុណ្យណូអែល នៅក្នុងប្រទេសកម្ពុជា ពុំមានផលប៉ះពាល់អ្វីនោះទេ កុំឱ្យតែមានការផ្សព្វផ្សាយអំពីវប្បធ​ម៌ទាំងអស់នោះ ថាជារបស់ខ្មែរ។ ម៉្យាងវិញទៀត ការដែលសាសនាដ៏ទៃទៀតអាចរស់នៅជាមួយគ្នាដោយភាពសុខដុមបាន គឺជាការគោរពគ្នាទៅវិញទៅមកសម្រាប់មនុស្សជាតិដូចគ្នា។

ចំណែក លោក សំបូរ មាណ្ណារ៉ា សាស្ត្រាចារ្យផ្នែកប្រវត្តិសាស្ត្រវិញ បានឱ្យដឹងដែរថា ប្រទេសកម្ពុជា ជាប្រទេសបើកទូលាយដែលមានប្រជាជន និងជនបរទេសកាន់សាសនាគ្រឹស្ត ហេតុនេះ ពួកគេមានសិទ្ធក្នុងការប្រារព្ធពិធីបុណ្យណូអែលនៅក្នុងប្រទេសកម្ពុជាបាន កុំឱ្យតែប៉ះពាល់ទៅដល់សន្តិសុខ សុវត្ថិភាពរបស់ប្រទេសសជាតិ។  លោកសាស្ត្រាចារ្យផ្នែកប្រវត្តិសាស្ត្រដដែលរូបនេះ បានបន្តថា ការប្រារព្ធពិធីបុណ្យណូអែលនៅក្នុងប្រទេសកម្ពុជា មិនបានធ្វើឱ្យប៉ះពាល់អ្វីដល់វប្បធម៌របស់ខ្មែរនោះទេ សំខាន់ គឺការគិតរបស់បុគ្គលដែលចូលរួម ត្រូវដឹងថា ពិធីនោះ មិនមែនជាវប្បធម៌របស់ខ្មែរ ហើយគេធ្វើឡើងសម្រាប់អ្នកដែលកាន់សាសនា ឬដើម្បីជាភាពទាក់ទាញមួយប៉ុណ្ណោះ។ ដូច្នេះ ឳពុកម្តាយ ឬអាណាព្យាបាល និងលោកគ្រូ អ្នកគ្រូ ត្រូវពន្យល់កូនខ្មែរឱ្យបានយល់ច្បាស់ និងចែកឱ្យដាច់រវាងវប្បវធម៌ខ្មែរ និងវប្បធម៌បរទេស។

ដោយឡែក លោកបណ្ឌិត យង់ ពៅ អគ្គលេខាធិកានៃរាជបណ្ឌិត្យសភាកម្ពុជា បានអះអាងថា យោងតាមច្បាប់រដ្ឋធម្មនុញ្ញកម្ពុជា គឺបានបញ្ជាក់អំពីសិទ្ធិសេរីភាពនៃជំនឿសាសនា​ដែរ ហើយមិនថា សាសនាអ្វី ឬពិធីបុណ្យអ្វីនោះទេ បើមិនមានផលប៉ះពាល់ដល់សន្តិសុខ សណ្តាប់ធ្នាប់សង្គម គឺពុំមានការហាមប្រាមឡើយ។ អាស្រ័យហេតុនេះ មិនថាការប្រារព្ធពិធីបុណ្យណូអែល ឬបុណ្យផ្សេងៗរបស់ជាតិសាសន៍ដទៃផ្សេងទៀតទេ កម្ពុជាផ្តល់នូវសេរីភាពពេញលេញស្របតាមច្បាប់របស់ព្រះរាជាណាចក្រកម្ពុជា។ លោកថា បើមើលតាមទិដ្ឋភាពសង្គម និងបរិបទអន្តរជាតិ បច្ចុប្បន្ន យុវជន និងប្រជាជនកម្ពុជាមួយចំនួន គឺមានទំនោរទៅលើការចូលរួមការរៀបចំពិធីបុណ្យណូអែលនេះ ហើយការប្រារព្ធពិធីនេះទៀតសោត ក៏ពុំមានផលរំខានអ្វីនោះដែរ។

លោកបន្ថែមថា ដោយសាររាជរដ្ឋាភិបាលកម្ពុជា បានថែរក្សាសុខសន្តិភាព សណ្តាប់ធ្នាប់សង្គមដំណើរការល្អ ដូច្នេះប្រជាពលរដ្ឋទាំងអស់ អាចទទួលបានសិទ្ធិសេរីភាពក្នុងការចូលរួមពិធីបុណ្យ និងពិធីសាសនាផ្សេងៗ ដោយពេញលេញ ដែលជាឱកាសមួយសម្រាប់ប្រជាពលរដ្ឋក្នុងការចូលរួមជាមួយសាសនាដទៃទៀត។ ម៉្យាងវិញទៀត លោកថា ការរៀបចំបុណ្យណូអែលនេះ ក៏មានផលចំណេញដល់ជាតិ ដូចជា​ តាមរយៈការបង្កើនអាជីវកម្ម បង្កើនការចាយវាយ ដើម្បីឱ្យមានចរន្តពាណិជ្ជកម្ម ដែលធ្វើឱ្យដំណើរការសេដ្ឋកិច្ចមានការកើនឡើង។ បន្ថែមពីនេះ វាក៏ផ្តល់ឱកាសយ៉ាងសម្បូរបែបដល់ភ្ញៀវទេសចរដែលមាននិន្នាការជឿលើសាសនាគ្រឹស្ត បានចូលរួមក្នុងពិធីបុណ្យណូអែលផង និងបានដើរលេងកម្សាន្តនៅកន្លែងផ្សេងៗក្នុងប្រទេសកម្ពុជាផង។

លោកបណ្ឌិត យង់ ពៅ បានបញ្ជាក់បន្ថែមថា លោកសាទរចំពោះការប្រារព្ធពិធីបុណ្យណូអែល ដោយសារការប្រារព្ធពិធីបុណ្យសាសនានេះ មិនបានជះឥទ្ធិពលអាក្រក់អ្វីដល់ប្រពៃណី វប្បធម៌ដើមរបស់កម្ពុជានោះទេ មានតែធ្វើឱ្យកម្ពុជាមានភាពសម្បូរបែបថែមទៀត៕