Gen Z អាមេរិក បើកចំហថ្នាំប្រឆាំងជំងឺធ្លាក់ទឹកចិត្តព្រោងព្រាត ខណៈអ្នកជំនាញបារម្ភសុវត្ថិភាព

ក្រុម Gen Z នៅសហរដ្ឋអាមេរិកកំពុងបើកចំហនៅលើ TikTok និង Instagram ថា ពួកគេប្រើថ្នាំប្រឆាំងនឹងជំងឺធ្លាក់ទឹកចិត្ត ដែលជាថ្នាំមនុស្សធ្លាប់ព្យាយាមលាក់វា ឥឡូវនេះកំពុងត្រូវបានបង្ហាញនៅលើបណ្តាញសង្គមថា ជាឱសថពេញនិយមបំផុត។ នោះបានបង្កឲ្យមានការព្រួយបារម្ភអំពីសុវត្ថិភាព និងផលប៉ះពាល់ដែលមិនអាចគ្រប់គ្រងបានពីអ្នកជំនាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែត Wall Street Journal (WSJ) កាលពីថ្ងៃទី ១៩ ខែតុលា បានដកស្រង់សម្ដីស្រ្តីវ័យ៣០ឆ្នាំ់រស់នៅក្នុងរដ្ឋតិចសាស់ ដែលជួបប្រទះនឹងថ្នាំប្រឆាំងនឹងជំងឺធ្លាក់ទឹកចិត្តប្រភេទ Lexapro ពេលកំពុងស្តាប់ផតឃែស្ថ ខណៈដែលនាងជួបប្រទះភាពឯកកោ និងការថប់បារម្ភខ្លាំង។ ពេលទទួលវេជ្ជបញ្ជាសម្រាប់ឱសថទូទៅដែលមានធាតុផ្សំដូចគ្នានឹង Lexapro តាមរយៈក្រុមហ៊ុនទូរគមនាគមន៍ Hers នាងបានបង្ហោះវីដេអូមួយនៅលើ TikTok ដែលខ្លួននាងទទួលយកវា។ ក្នុងនាមជាសហគមន៍មួយដែលបានបង្កើតឡើងជុំវិញ hashtags ពាក់ព័ន្ធ អ្នកតាមដានរាប់ពាន់នាក់បាននិយាយថា ពួកគេក៏កំពុងតែជួបអារម្មណ៍ដូចជារូបនាងដែរ។

យោងតាមក្រុមហ៊ុនវិភាគទិន្នន័យ Exolyt បានសរសេរថា hashtags TikTok សម្រាប់ថ្នាំប្រឆាំងនឹងជំងឺធ្លាក់ទឹកចិត្តមានចំនួនអ្នកទស្សនា ១.៣ ពាន់លាន ហើយ Lexapro លើសពី ៥០០លាន។ អ្នកមានឥទ្ធិពលវ័យក្មេងបានប្រើ hashtags ដើម្បីបង្ហាញបែបកំប្លែងថា ពួកគេប្រើថ្នាំប្រឆាំងនឹងជំងឺធ្លាក់ទឹកចិត្តជាឱសថពេញនិយមនិងជារឿងធម្មតាទៅហើយ។

ជាការពិតនៅសហរដ្ឋអាមេរិក រយៈពេលជាមធ្យមនៃការប្រើថ្នាំប្រឆាំងនឹងជំងឺធ្លាក់ទឹកចិត្តឈានដល់ ៥ ឆ្នាំ ប៉ុន្តែមិនមានភស្តុតាងច្រើនអំពីប្រសិទ្ធភាពនៃការប្រើប្រាស់រយៈពេលវែងនោះទេ។ ការស្រាវជ្រាវថ្មីៗនេះបានរាយការណ៍ថា ២/៣ នៃអ្នកជំងឺដែលប្រើថ្នាំអស់រយៈពេលជាង ២ឆ្នាំ មានរោគសញ្ញាពិបាកក្នុងរាងកាយ។

លោក Mark Stone អតីតអ្នកស្រាវជ្រាវនៅរដ្ឋបាលចំណីអាហារ និងឱសថសហរដ្ឋអាមេរិក (FDA) បាននិយាយថា អត្ថប្រយោជន៍នៃការប្រើថ្នាំគឺត្រូវច្បាស់ ប៉ុន្តែផលប៉ះពាល់ដូចជាការខូចមុខងារផ្លូវភេទ ឬបញ្ហាផ្លូវចិត្តមិនអាចត្រូវបានគេអើពើបានទេ។ ជាពិសេសលោកបានកត់សម្គាល់ថា វេជ្ជបញ្ជាកំពុងត្រូវបានផ្តល់ឲ្យដោយគ្មានការវិនិច្ឆ័យវេជ្ជសាស្រ្ត និងបានចង្អុលបង្ហាញពីចន្លោះប្រហោង ក្នុងការគ្រប់គ្រងផលប៉ះពាល់អវិជ្ជមាន។

ជាមួយគ្នានោះដែរ គ្រូពេទ្យវិកលចរិតម្នាក់ទៀតគឺលោក Josef Witt-Doerring បានព្រមានដែរថា នោះគឺជាបញ្ហាធមួយ នៅពេលដែលថ្នាំប្រឆាំងនឹងជំងឺធ្លាក់ទឹកចិត្តត្រូវបានខ្ចប់នៅលើប្រព័ន្ធផ្សព្វផ្សាយសង្គមថា ជាជំនួយរបៀបរស់នៅ។ ប៉ុន្តែសុខភាពផ្លូវចិត្ត មិនអាចដោះស្រាយបានដោយថ្នាំតែមួយគ្រាប់នោះទេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក ស៊ី អបអរមេដឹកនាំថ្មីរបស់បក្សប្រឆាំងតៃវ៉ាន់ ក្រោមគោលការណ៍ «ចិនតែមួយ»