ក្រុងកែបទទួលបានជយលាភីទីក្រុងស្អាតអាស៊ាន

ក្រុងកែបនៃខេត្តកែបទទួលបានជយលាភីទីក្រុងស្អាតអាស៊ានលើកទី៤ ដែលមានសុពលភាពពី​ឆ្នាំ២០២៤-២០២៦។

វេទិកាទេសចរណ៍អាស៊ានឆ្នាំ២០២៤ រៀបចំឡើងក្រោមប្រធានបទ ទីក្រុងស្អាតអាស៊ានប្រកបដោយគុណភាព និងការទទួលខុសត្រូវ ធានានិរន្តភាពនៃអនាគតអាស៊ាន (Quality and Responsible ASEAN – Sustaining ASEAN Future) ដែល​​មានការចូលរួមពីសំណាក់រដ្ឋមន្ត្រីទេសចរណ៍ និងថ្នាក់ដឹកនាំទេសចរណ៍មកពីប្រទេសសមាជិកអាស៊ាន ចិន ជប៉ុន សាធារណរដ្ឋកូរ៉េ ឥណ្ឌា ក៏ដូចជាប្រទេសនិងអង្គការដៃគូមួយចំនួន។

ពិធីប្រកាសជយលាភីនេះបានធ្វើឡើងក្នុងវេទិកាទេសចរណ៍អាស៊ាន ATF 2024 ដែលបានប្រព្រឹត្តទៅនៅរាត្រីថ្ងៃទី ២៦ ខែមករា ឆ្នាំ២០២៤ នៅទីក្រុងវៀងចន្ចន៍ប្រទេសឡាវ។

លោក សោម ពិសិដ្ឋ អភិបាលខេត្តកែប​បានលើកឡើងឱ្យដឹងថា លទ្ធផល​នេះ​កើតចេញពី​ការខិតខំប្រឹង​ប្រែងរបស់​ថ្នាក់ដឹកនាំ​ខេត្ត​គ្រប់​រូប រួមជាមួយនិងអាជ្ញាធរមូលដ្ឋានគ្រប់​លំដាប់​ថ្នាក់​​ ពិសេសការ​ចូលរួម​របស់​ប្រជាពលរដ្ឋទូទាំងខេត្តកែប​។

អត្ថបទ៖ សឹង រ៉ាត់