អភិបាលក្រុងកែប ចុះអនុវត្តវិធានការរដ្ឋបាល រុះរើសំណង់មិនរៀបរយ តាមបណ្តោយឆ្នេរស្រី ស

ផែនការរៀបចំសណ្តាប់ធ្នាប់សាធារណៈតាមបណ្តោយឆ្នេរកែប ត្រូវបានរដ្ឋបាលក្រុង ចុះអនុវត្តវិធានការរដ្ឋបាល ដោយរុះរើរាល់សំណង់ដែលសង់រំលោភផ្លូវថ្មើរជើង និងទីសាធារណៈផ្សេងទៀត ក្រោយអាជីករមួយចំនួនមិនអនុវត្តតាមការណែនាំរបស់រដ្ឋបាលក្រុងកែប បានដាក់ចេញកាលពីពេលកន្លងទៅ។ កំឡុងពេលរុះរើនោះ មានក្រុមអាជីវករខ្លះ ព្យាយាមរារាំងចំណាត់ការរបស់សាលាក្រុងកែប តែមិនមានករណីហិង្សាកើតឡើងនោះទេ។

លោក ខេង យ័ន អភិបាលក្រុងកែប នាថ្ងៃទី២១ ខែតុលា ឆ្នាំ២០២២នេះ បានចុះអនុវត្តន៍វិធានការអាជីវករមួយចំនួនមិនព្រមស្តាប់ការណែនាំអប់រំ និងការណែនាំរបស់អាជ្ញាធរ។ ក្នុងនោះសំណង់មិនរៀបរយ និងការដាក់តាំងលក់សម្ភារៈផ្សេងៗលើទីសាធារណៈ ត្រូវបានរុះរើចេញបានប្រមាណ ៨០% ដោយឡែកអាជ្ញាធរនៅតែបន្តធ្វើដូចនេះនៅសប្តាហ៍ក្រោយ រហូតតាមបណ្តោយឆ្នេរកែប ក្លាយទៅជាទីក្រុងដែលគួរឱ្យចង់មកលេងកម្សាន្តពីសំណាក់ភ្ញៀវទេសចរ។

លោក ខេង យ័ន អភិបាលក្រុងកែប បានលើកឡើងថា៖ “នេះ គឺដើម្បីប្រយោជន៍សាធារណៈទាំងអស់ មិនមែនដើម្បីផលប្រយោជន៍ខ្ញុំទេ ហើយបើដឹងថា ខ្លួនរំលោភហើយ មេត្តាបញ្ឈប់ ដើម្បីកុំមានបញ្ហាថ្នាំងថ្នាក់លើអារម្មណ៍ជាមួយគ្នា”។

លោកបន្តថា ទីតាំងសំណង់រោងសម្រាកបរិភោគអាហារ នៅតាមបណ្តោយឆ្នេរកែប ដែលអាជីវករកំពុងលក់ដូរនេះ ជាទីតាំងទទួលបានការផ្តល់សិទ្ធវិនិយោគពីរដ្ឋាភិបាលទៅឱ្យឯកជន ហើយក្រុមអាជីវករពួកគាត់ជួលបន្តក្នុងរយៈពេលវែង ហើយការវិនិយោគនេះ នឹងផុតសុពលភាពនៅឆ្នាំ២០២៤ ក្រោយបញ្ចប់ រដ្ឋអាចនឹងទទួលយកមកវិញ ឬបន្តវិនិយោគទៅឱ្យឯកជន។

លោក ខេង យ័យ បានបន្ថែមថា ការរៀបចំតាមបណ្តោយឆ្នេរកែបឱ្យសមជាទីក្រុងទេសចរណ៍ ជាគោលដៅរបស់រដ្ឋបាលក្រុងកែប ជាបន្តនឹងរៀបចំទីតាំងមួយចំនួនទៀត ដូចជាផ្សារកែប ផ្សារក្តាម និងផ្សារដំណាក់ចង្អើរ ជាដើម៕

អត្ថបទ៖ សឹង រ៉ាត់