មន្រ្តីក្រសួង​សាធារណការ​ចុះ​ប្រមូលព័ត៌មាន​​​​ទីតាំង​​​​សាងសង់​ផ្លូវល្បឿនលឿនភ្នំពេញ-សៀមរាប

កាលពី​ថ្ងៃទី២៥ ដល់២៦ ខែមករា ឆ្នាំ២០២៤ លោក ឡេង ធនយុទ្ធា រដ្ឋលេខាធិការនិងជា​នាយកគម្រោង​បានដឹកនាំប្រតិភូ​ចុះ​ពិនិត្យនិងស្វែងយល់ទីតាំងនៃគម្រោងសាងសង់​ផ្លូវល្បឿនលឿនភ្នំពេញ-សៀមរាប-ប៉ោយប៉ែត ដោយមានការចូលរួមពី​មន្រ្តីក្រសួង​និងតំណាងក្រុមហ៊ុនសាងសង់ CRBC ។

បេសកកម្មនេះរៀបចំឡើងដើម្បីប្រមូលព័ត៏មាន និងផ្តល់អនុសាសន៍បន្ថែម​ជូនក្រុមហ៊ុនពិនិត្យ​​កែសម្រួលជាពិសេសកំណាត់ផ្លូវ​ដំណាក់កាលទី ១ ភ្នំពេញ – សៀមរាប បន្ទាប់ពីក្រសួងទទួលរបាយការណ៍សិក្សាសមិទ្ធិលទ្ធភាព បច្ចេកទេស​ប្លង់វិស្វកម្មគម្រោងពីក្រុមហ៊ុន។

ត្រង់​ចំណុចច្រកចូលភ្នំពេញពីផ្លូវជាតិ ៦A មន្រ្តីជំនាញ​បាន​ណែនាំដល់ក្រុមហ៊ុនពិនិត្យឡើងវិញធ្វើយ៉ាងណាកំណត់ទីតាំងដែលមាន​ផលប៉ះពាល់តិចនិងមិនកកស្ទះចរាចរណ៍ រួមទាំង​ចំណុចប្តូរទិស​ចរាចណ៍ផងដែរ។

ដោយឡែកដំណាក់កាលទី ២ កំណាត់ផ្លូវ សៀមរាប-ប៉ោយប៉ែត នឹងមានកិច្ច​ប្រជុំជាមួយស្ថាប័ន អាជ្ញាធរពាក់ព័ន្ធ ជាពិសេសអាជ្ញាធរអប្សរាដើម្បីពិនិ្យផ្តល់យោបល់លើកំណាត់ផ្លូវវាងក្រុង។ ប្រតិភូបានស្នើឱ្យមន្ទីរសាធារណការ និងដឹកជញ្ជូនរាជធានីខេត្ត បន្តផ្តល់ទិន្នន័យព័ត៏មានជាក់លាក់បន្ថែមទៀតដល់ក្រុមហ៊ុន ដើម្បីបំពញបន្ថែមការសិក្សា។

បើតាម​ប្រភព​​ពី​ក្រុមហ៊ុនអះអាង​ថា នឹងបញ្ចប់សេចក្តីព្រាងគម្រោងសិក្សាសមិទ្ធិលទ្ធភាពប្លង់វិស្វកម្មសំណង់​នៅខែកុម្ភៈ ២០២៤ និងសមិទ្ធិលទ្ធភាពគម្រោង (FS ) អាចនឹងដាក់ជូនរាជរដ្ឋាភិបាលនាពេលនាដើមខែមិថុនា ឆ្នាំ​២០២៤។

សម្រាប់ដំណាក់ទី២៖ សៀមរាប-ប៉ោយប៉ែត នឹងបញ្ចប់ការងារសិក្សានៅការដ្ឋានខែមីនា ២០២៤ និងបញ្ចប់សេចក្តីព្រាង​គម្រោងសិក្សាសមិទ្ធិលទ្ធភាព បច្ចេកទេសប្លង់វិស្វកម្ម និងដាក់ជូនមកក្រសួង ពិនិត្យ កែសម្រួល ឈានទៅបញ្ចប់នៅខែឧសភា ២០២៤ខាងមុខ៕