រដ្ឋាភិបាលបញ្ចុះតម្លៃប្រេងឥន្ធនៈ ទាបជាងទីផ្សារអន្តរជាតិ ចាប់ពីថ្ងៃទី១៦-២៨ នេះ

ថ្លៃលក់រាយប្រេងឥន្ធនៈសម្រាប់អនុវត្តចាប់ពីថ្ងៃទី១៦ ដល់២៨ ខែកុម្ភៈនេះ នឹងចុះមក ៣,៥០០រៀល/លីត្រ សម្រាប់ប្រេងសាំងធម្មតា និង ៣,២០០រៀល/លីត្រ សម្រាប់ប្រេងម៉ាស៊ូត។

ក្រសួងពាណិជ្ជកម្ម បានចេញសេចក្ដីជូនដំណឹងនៅថ្ងៃទី១៦ ខែកុម្ភៈ ឆ្នាំ២០២១នេះ ពីតម្លៃប្រេងឥន្ធនៈលើទីផ្សារអន្តរជាតិ និងការបញ្ចុះតម្លៃលក់រាយប្រេងឥន្ធនៈនៅកម្ពុជា។

សេចក្ដីប្រកាស បានបង្ហាញថា ផ្នែកតាមតម្លៃមធ្យមប្រេងឥន្ធនៈលើទីផ្សារអន្តរជាតិ ថ្លៃលក់រាយប្រេងឥន្ធនៈពីថ្ងៃទី១៦ ដល់២៨ ខែកុម្ភៈ ឆ្នាំ២០២១ នឹងត្រូវលក់ ៣,៦៦០រៀល/លីត្រ សម្រាប់ប្រេងសាំងធម្មតា និង ៣,៣៦០រៀល/លីត្រ សម្រាប់ប្រេងម៉ាស៊ូត។

ក្រសួងពាណិជ្ជកម្មបាន បញ្ជាក់ថា ដើម្បីសម្រួលដល់ជីវភាពរបស់ប្រជាជន​និងដោយមានការចូលរួមចំណែកពីក្រុមហ៊ុនចែកចាយប្រេងឥន្ធនៈនៅកម្ពុជា សម្ដេចអគ្គមហាសេនាបតីតេជោ ហ៊ុន ​សែន​ នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ចុះតម្លៃលក់រាយប្រេងឥន្ធនៈនៅកម្ពុជាចំនួន៤សេនដុល្លារក្នុងមួយលីត្រ។

ដូច្នេះថ្លៃលក់រាយព្រះឥន្ធនៈសម្រាប់អនុវត្តចាប់ពីថ្ងៃទី១៦ ដល់ថ្ងៃទី២៨ ខែកម្ភៈ ឆ្នាំ២០២១ នឹងចុះមកនៅ៣៥០០រៀលក្នុងមួយលីត្រសម្រាប់សាំងធម្មតា និង៣២០០រៀលក្នុងមួយលីត្រសម្រាប់ប្រេងម៉ាស៊ួត។

ក្រសួងពាណិជ្ជកម្មបានបញ្ជាក់ថា ក្រសួងមិនមែនជាអ្នកកំណត់ថ្លៃលក់រាយប្រេងឥន្ធនៈនៅកម្ពុជាទេ គឺក្រសួងគ្រាន់តែស្រង់តម្លៃឡើងចុះនៃប្រេងតាមទីផ្សារអន្តរជាតិមកគណនាតែប៉ុណ្ណោះ អាស្រ័ យហេតុនេះសូមគ្រប់ស្ថានីយលក់រាយប្រេងឥន្ទនៈទាំងអស់ប្រតិបត្តិតាមការចាំបាច់។

គួរបញ្ជាក់ថាចំពោះតម្លៃប្រេង កាលពីថ្ងៃទី០១-១៥ ខែកុម្ភៈកន្លងទៅ ប្រេងសាំងធម្មតាមានតម្លៃ៣,៤០០រៀល ក្នុងមួយលីត្រ និងប្រេងម៉ាស៊ូតតម្លៃ៣,០៥០រៀល ក្នុងមួយលីត្រ៕

អត្ថបទ៖ សំអឿន