Connect with us

ព័ត៌មានជាតិ

សិស្សអវត្តមាន ៣៦% តាម​សាលារៀននៅរាជធានី​ភ្នំពេញ​ចូលឆ្នាំ​ចិន​ថ្ងៃ​ទី ១

បានផុស

នៅ

លោក ហែម ស៊ីណារ៉េត ប្រធានមន្ទីរអប់រំយុវជននិងកីឡារាជធានីភ្នំពេញមានប្រសាសន៍នៅព្រឹកថ្ងៃទី ១០ កម្ភៈនេះថានៅព្រឹកថ្ងៃទី ១ នៃពិធីបុណ្យចូលឆ្នាំប្រពៃណីចិន សាលារៀននៅរាជធានីភ្នំពេញមានសិស្សអវត្តមានប្រមាណ ៣៦% ខណៈគ្រូអវត្តមាន ៥%។

លោកប្រធានបានបន្តថា « នៅព្រឹកថ្ងៃទី ១ នៃបុណ្យចូលឆ្នាំចិន ត្រូវនឹងថ្ងៃសៅរ៍តាមរបាយការណ៍ឃើញថាវត្តមានគ្រូមកបង្រៀនមាន ៩៥% និងសិស្សមករៀនមាន ៦៤% យើង​បានខិតខំប្រឹងប្រែងទបស្កាត់ហើយតែជាធម្មតាឪពុកម្តាយសិស្សគាត់ទៅលេងស្រុកឬទៅកម្សាន្ត​ផ្សេងៗគឺសិស្សត្រូវទៅតាមឪពុកម្តាយហើយ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានមន្ទីរបានបន្តទៀតថា មុនពិធីបុណ្យចូលឆ្នាំចិនមកដល់ មន្ទីរតែងតែរៀបចំកិច្ចប្រជុំជាមួយនាយកសាលានៅរាជធានីភ្នំពេញ​ដើម្បីណែនាំឱ្យសាលានីមួយៗធ្វើការប្រជុំផ្សព្វផ្សាយដល់សិស្សនិងគ្រូឱ្យបានយល់ច្បាស់ពិសេសនៅ​ពេល​ម៉ោងគោរពទង់ជាតិថាបុណ្យចូលឆ្នាំចិនមិនមែនជាថ្ងៃឈប់ សម្រាករបស់ខ្មែរយើងទេ។ ដូចនេះលោកគ្រូអ្នកគ្រូត្រូវមកបង្រៀន និងសិស្សានុសិស្សត្រូវមករៀនដូចថ្ងៃធម្មតាមិនមានការឈប់សម្រាកឡើយ។

រូបឯកសារ

លោកបានបន្ថែមទៀតថា បុណ្យចូលឆ្នាំចិនឆ្នាំនេះ មន្ទីរមិនបានបង្កើតគណៈកម្មការឃ្លាំមើលតាមសាលានៅរាជធានីភ្នំពេញដូចឆ្នាំមុនទេ ដោយឱ្យតាមសាលានានាមានភាពម្ចាស់ការក្នុងការគ្រប់គ្រងការបង្រៀននិងរៀនរៀងៗខ្លួន។ប៉ុន្តែគណៈគ្រប់គ្រងសាលាទាំងអស់ត្រូវរាយការណ៍តាមគ្រុបតេឡេក្រាម ២ ដងក្នុង១ថ្ងៃគឺពេលព្រឹកនិងពេលរសៀល​មកមន្ទីរ​ដើម្បីគ្រប់គ្រងវត្តមានគ្រូនិងសិស្សឱ្យបានល្អ។

លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជននិងកីឡាបានលើកទឹកចិត្តនិងជំរុញដល់មាតាបិតានិងអាណាព្យាបាលសិស្សបញ្ជួនកូនៗមករៀនឱ្យបានគ្រប់ៗគ្នានៅថ្ងៃសែនចិននិងបុណ្យចូលឆ្នាំចិន។

លោកស្រីបានណែនាំដល់សាលារៀនត្រូវអនុវត្តតាមអនុក្រឹត្យឈប់សម្រាកដែលចេញដោយរាជរដ្ឋាភិបាល។ ជាមួយគ្នានេះដែរត្រូវគ្រប់គ្រងសិស្សានុសិស្សនិងបញ្ជីវត្តមានឱ្យបានត្រឹមត្រូវ។សិស្សដែលចង់ឈប់សម្រាកត្រូវតែសុំច្បាប់បើមិនដូច្នេះទេនឹងកំណត់ជាការឈប់ដោយអវត្តមាន៕

អត្ថបទ៖សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម