មកដឹងពីដើមកំណើត និងអត្ថន័យ នៃល្បែងទាញព្រ័ត្រ

ល្បែងទាញព្រ័ត្រ គឺជាល្បែងដ៏មានប្រជាប្រិយភាពមួយ ដែលគេនិយមលេងជាទូទៅនៅទូទាំងសកលលោក ពិសេសកម្ពុជា។​ ល្បែងប្រជាប្រិយខ្មែរមួយនេះ គឺដកស្រង់ចេញពីទេវកថារបស់ព្រហ្មញ្ញសាសនា រឿង កូរសមុទ្រទឹកដោះ ដែលមានជាតឹកតាង នៅលើសំណង់ប្រាសាទនានា ហើយរឿងនេះ គេក៏ប្រែឱ្យមកជាល្បែងប្រពៃណី សម្រាប់ការកម្សាន្ត ដែលសមស្របទៅតាមបរិបទរបស់កសិករខ្មែរ រហូតដល់បច្ចុប្បន្ន។

ជាទូទៅប្រជាជនខ្មែរ ក្មេងចាស់ ប្រុសស្រី និយមលេងល្បែងប្រជាប្រិយមួយប្រភេទនេះ នារដូវចូលឆ្នាំប្រពៃណីខ្មែរ រួមជាមួយនឹងល្បែងប្រជាប្រិយខ្មែរដទៃទៀត ឬក៏គេលេង នៅក្នុងឱកាសបុណ្យឆ្លងចេត្រ ដែលកិច្ចនេះ​ ច្រើនតែធ្វើនៅទីខ្ទមអ្នកតាម្ចាស់ទឹកម្ចាស់ដី នៅកណ្តាលភូមិ។ នេះបើតាមសៀវភៅបញ្ជីសារពើភណ្ឌ មរតកវប្បធម៌អរូបីកម្ពុជា ដែលចងក្រងដោយ ក្រសួងវប្បធម៌ និងវិចិត្រសិល្បៈ បោះពុម្ពផ្សាយក្នុងឆ្នាំ២០១៧។

ល្បែងទាញព្រ័ត្រនេះ មិនត្រឹមតែបង្កលក្ខណៈសប្បាយរីករាយ និងការសាកកម្លាំងគ្នាប៉ុណ្ណោះទេ ប៉ុន្តែថែមទំាងចង់បង្ហាញពីការរឹតចំណងសាមគ្គីភាព ប្រៀបបីដូចទៅនឹងរឿងកូរសមុទ្រទឹកដោះយ៉ាងដូច្នេះដែរ ព្រោះថា ដើម្បីទទួលបានជ័យជម្នះ ភាគីនីមួយៗ គឺត្រូវរួមកម្លាំងគ្នា។

ល្បែងទាញព្រ័ត្រ ត្រូវបានដាក់បញ្ចូលជាបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ កាលពីថ្ងៃទី២ ខែធ្នូ ឆ្នាំ២០១៥ នៅទីក្រុងវិនឌុក ប្រទេសណាមីប៊ី៕