ព័ត៌មានជាតិ

សម្តេច ហ៊ុន សែន៖ ល្បែងទាញព្រ័ត្រ បង្ហាញពីសាមគ្គីភាពជាធ្លុងមួយ ក្នុងការយកឈ្នះក្រុមប្រកួតជាលក្ខណៈកម្សាន្ត

បានផុស

៨ ខែ មុន

នៅ

ថ្ងៃចន្ទ ២ ធ្នូ ២០២៤

ដោយ

សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ថា ល្បែងទាញព្រ័ត្រ បង្ហាញពីសាមគ្គីភាពជាធ្លុងមួយ ក្នុងការយកឈ្នះក្រុមប្រកួតជាលក្ខណៈកម្សាន្ត។ នេះបើតាមការបង្ហោះសារអបអរសាទរខួប៩ឆ្នាំ (ថ្ងៃទី២ ខែធ្នូ ឆ្នាំ២០១៥ ដល់ថ្ងៃទី២ ខែធ្នូ ឆ្នាំ២០២៤) នៃការដាក់បញ្ចូលល្បែងទាញព្រ័ត្រ ក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ នៅប្រទេសណាមីប៊ី របស់សម្តេចតេជោ នៅព្រឹកថ្ងៃទី២ ខែធ្នូ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសអបអរសាទរនេះ សម្តេចតេជោ ហ៊ុន សែន បានបញ្ជាក់ថា៖ “ល្បែងទាញព្រ័ត្រ ជាល្បែងដ៏មានប្រជាប្រិយភាពមួយ ដែលប្រជាជនខ្មែរនិយមលេង ក្នុងពិធីផ្សេងៗ ដើម្បីបង្ហាញពីសាមគ្គីភាពជាធ្លុងមួយ ក្នុងការយកឈ្នះក្រុមប្រកួតជាលក្ខណៈកម្សាន្ត”។ សម្តេចក៏បានសង្កត់ធ្ងន់ថា កិច្ចការពារសម្បត្តិបេតិកភណ្ឌវប្បធម៌ ជាភារកិច្ចរបស់កូនខ្មែរគ្រប់ៗរូប ដើម្បីថែរក្សាសម្បត្តិវប្បធម៌ខ្មែរឱ្យបានគង់វង្សសម្រាប់មនុស្សជំនាន់ក្រោយបន្តទៀត។

ជាមួយគ្នានេះ បើតាមក្រសួងអប់រំ ដែលបានផ្សព្វផ្សាយ នៅព្រឹកថ្ងៃទី២ ខែធ្នូ ឆ្ណាំ២០២៤ ក្នុងឱកាសខួប៩ឆ្នាំ នៃការដាក់បញ្ចូលល្បែងទាញព្រ័ត្រ ក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ នៅប្រទេសណាមីប៊ី ថាល្បែងទាញព្រ័ត្រ ជាល្បែងលេងកម្សាន្តសប្បាយរបស់យុវជនខ្មែរ ទាំងប្រុស និងស្រី។ ល្បែងនេះ គេលេងដោយប្រើកម្លាំងកាយជាមូលហេតុ ហើយគេលេងតែក្នុងរដូវចូលឆ្នាំខ្មែរ គឺខែចេត្រ ពិសាខប៉ុណ្ណោះ។ ល្បែងនេះ គេតែងលេងនៅតាមវត្តអារាម ក្នុងពិធីបុណ្យចូលឆ្នាំខ្មែរប្រពៃណីជាតិ ព្រោអតាមវត្តអារាមវាមទីធ្លាធំទូលាយ ងាយស្រួលលេងល្បែងនេះ។ ក្រៅពីក្នុងវត្ត ប្រជាជនខ្មែរក៏អាចលេងល្បែងនេះតាមស្រុកភូមិដែលមានវាលល្មមអាចលេងបាន។

បើតាមឯកសាររបស់ក្រសួងវប្បធម៌ និងវិចិត្រសិល្បៈ បានបញ្ជាក់ថា ការចុះ “ល្បែងទាញព្រ័ត្រ” ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ កាលពីថ្ងៃទី២ ខែធ្នូ ឆ្នាំ២០១៥ នៅទីក្រុងវិនឌុក ប្រទេសណាមីប៊ី ដោយគណៈកម្មការអន្តររដ្ឋាភិបាលនៃអង្គការយូណេស្កូបានសម្រេចក្នុងសេចក្តីសម្រេចលេខ 10.COM10.b.12 ចុះ “ល្បែងទាញព្រ័ត្រ” ចូលក្នុងបញ្ជីតំណាងនៃបេតិកភណ្ឌវប្បធម៌អរូបីនៃមនុស្សជាតិ តាមការស្នើពីប្រទេសចំនួន៤ សុំចុះល្បែងទាញព្រ័ត្រចម្រុះជាតិសាសន៍ដែលក្នុងនោះមានប្រទេសកម្ពុជា សាធារណរដ្ឋកូរ៉េ វៀតណាម និងហ្វីលីពីន៕