ព័ត៌មានជាតិ

មន្ត្រីជាន់ខ្ពស់រាជរដ្ឋាភិបាល នឹងទទួលបានការធានារ៉ាប់រងលើផ្នែកហានិភ័យការងារ និងផ្នែកថែទាំសុខភាពពី ប.ស.ស

បានផុស

២ សប្តាហ៍ មុន

នៅ

ថ្ងៃអាទិត្យ ២១ មេសា ២០២៤

ដោយ

មន្ត្រីជាន់ខ្ពស់រាជរដ្ឋាភិបាលមួយចំនួនរួមមានរដ្ឋលេខាធិការ អនុរដ្ឋលេខាធិការ ទីប្រឹក្សា ជំនួយការ និងមន្ត្រីខុទ្ទកាល័យដែលតែងតាំងដោយព្រះរាជក្រឹត្យ ឬ អនុក្រឹត្យ ឬ ប្រកាស និងមិនស្ថិតនៅក្រោមច្បាប់ស្ដីពីសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា នឹងទទួលបានការធានារ៉ាប់រងរបបសន្តិសុខសង្គមលើផ្នែកហានិភ័យការងារ និងផ្នែកថែទាំសុខភាព ចាប់ពីពេលអនុក្រឹត្យចេញជាធរមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉េង ហុង អគ្គនាយក ប.ស.ស ស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា លើសពីនេះទៀត បើយោងតាមអនុក្រឹត្យរបស់រាជរដ្ឋាភិបាលចុះថ្ងៃទី ២២ ខែមីនា ឆ្នាំ ២០២៤ គ្រូពុទ្ធិកសិក្សា និងមន្ត្រីបំពេញការងារនៅអគ្គាធិការដ្ឋានពុទ្ធិកសិក្សាជាតិ និងមន្ត្រីថ្នាក់ក្រោមជាតិរួមមាន ក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ មេភូមិ អនុប្រធានភូមិ និងសមាជិកភូមិ ប្រធានអនុប្រធានការិយាល័យប្រជាពលរដ្ឋរាជធានី ខេត្ត និងប្រធានការិយាល័យប្រជាពលរដ្ឋក្រុងស្រុកខណ្ឌដែលជាមន្ត្រីមូលដ្ឋាន ក៏ទទួលបានប័ណ្ណសមាជិក ប.ស.ស ដោយធានារ៉ាប់រងរបបសន្តិសុខសង្គមផ្នែកហានិភ័យការងារ និងផ្នែកថែទាំសុខភាពផងដែរ។ ដោយឡែកសម្រាប់ទីប្រឹក្សា និងជំនួយការដែលត្រូវបានតែងតាំងដោយពុំទទួលប្រាក់បំណាច់មុខងារ មិនស្ថិតនៅក្នុងវិសាលភាព នៃអនុក្រឹត្យខាងលើនេះទេ។

លោកបានពន្យល់ថា ការពង្រីកវិសាលភាពនេះជាយន្តការបន្ថែមមួយទៀតក្នុងការពង្រីកសេវាថែទាំសុខភាពឆ្ពោះទៅរកការគ្របដណ្ដប់សុខភាពជាសកល ដែលជាកម្មវិធីគោលនយោបាយអាទិភាព ៦ ចំណុច របស់រាជរដ្ឋាភិបាលនីតិកាលទី ៧ នេះ និងជាការធានាឱ្យមានសង្គតិភាពរវាងវិស័យសាធារណៈ និងវិស័យឯកជន ដោយមិនទុកឱ្យប្រជាពលរដ្ឋណាម្នាក់មិនទទួលបានការព្យាបាលជំងឺនៅពេលដែលមានជំងឺនោះឡើយ៕

អត្ថបទ ៖ សំអឿន