ព័ត៌មានជាតិ

មេបញ្ជាការអាវុធហត្ថខេត្តកោះកុង ស្នើនាយទាហានមានមុខតំណែងថ្មីបង្កើនចំណេះដឹង និងអនុវត្តតួនាទីភារកិច្ចឱ្យមានប្រសិទ្ធភាព

បានផុស

២ years មុន

នៅ

ថ្ងៃចន្ទ ១៥ កក្កដា ២០២៤

ដោយ

កោះកុង ៖ លោកមេបញ្ជាការកងរាជអាវុធហត្ថខេត្តកោះកុង បានស្នើដល់គ្រប់នាយទាហានដែលទទួលបានមុខតំណែងតួនាទីភារកិច្ចថ្មី ចាំបាច់បង្កើនចំណេះដឹង និងការអនុវត្តតួនាទីភារកិច្ចប្រកបដោយប្រសិទ្ធភាពខ្ពស់ឱ្យសមទៅនឹងការលើកទឹកចិត្ត ដែលថ្នាក់លើ បានផ្តល់ជូននាពេលនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោកឧត្តមសេនីយ៍ត្រី តាំង ឈុនស្រេង បែបនេះបានធ្វើឡើងរសៀលថ្ងៃទី១៥ ខែកក្កដា ឆ្នាំ២០២៤ ក្នុងពិធីប្រកាសការតែងតាំងផ្លាស់ប្តូរមុខតំណែង និងដំឡើងឋានន្តរសក្ដិថ្មីជូននាយកទាហានចំនួន៧នាក់។

លោកមេបញ្ជាការកងរាជអាវុធហត្ថខេត្តកោះកុង ដដែល ក៏ជំរុញមន្ត្រីកងរាជអាវុធហត្ថក្រោមឱវាទបន្តប្រកាន់ខ្ជាប់ប្រតិបត្តិឲ្យបានត្រឹមត្រូវនូវសុជីវធម៌ សីលធម៌ គុណធម៌ ប្រកបដោយការគោរពឲ្យតម្លៃមនុស្ស ប្រជាធិបតេយ្យ សេរីភាព និងយុត្តិធម៌ គោរពរៀមច្បង គោរពចាស់ព្រឹទ្ធាចារ្យ ការពាររាជរដ្ឋាភិបាលស្របច្បាប់ ការពារ និងបម្រើប្រជាពលរដ្ឋនៅក្នុងមូលដ្ឋានឲ្យស្របតាមគោលនយោបាយដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

លោក តាំង ឈុនស្រេង រំលេចដែរថា «ជាការពិតណាស់ពេលវេលានេះ យើងទាំងគ្នាសុទ្ធតែបានដឹងយ៉ាងច្បាស់ថា គឺជាពេលដែលស្ថាប័ននីមួយៗ កំពុងតែធ្វើការកំណែទម្រង់ តួនាទី ភារកិច្ចទូទាំងប្រទេស ដែលអនុវត្តទៅតាមដំណាក់កាលផ្សេងៗ គ្នាតាមឆ្នាំ ដែលបានកំណត់អ្វី ដែលទទួលបាននាពេលនេះ គឺជាការតបស្នងចំពោះការខិតខំបំពេញភារកិច្ចជូនអង្គភាពកន្លងមក ដោយមានការយកចិត្តទុកដាក់ពីសំណាក់ថ្នាក់ដឹកនាំខាងលើផងដែរ ហើយក៏មានបងប្អូនយើងជាច្រើនទៀត បានខិតខំដូចគ្នាដែរ តែនៅមិនទាន់ទទួលបាន សូមកុំអាលអាក់អន់ចិត្តព្រោះនៅមានជំហានជាបន្តបន្ទាប់ទៀត»។

គួរកត់សម្គាល់ថា បញ្ជាការដ្ឋានកងរាជអាវុធហត្ថខេត្តកោះកុង នៅរសៀលថ្ងៃទី១៥ ខែកក្កដា នេះ បានបានប្រកាសមុខតំណែង និងបំពាក់ឋានន្តរសក្ដិ ជូននាយទាហាន នៃកងរាជអាវុធហត្ថខេត្តកោះកុង សរុបចំនួន ០៧រូប។ ក្នុងនោះ តែងតាំងផ្លាស់ប្តូរមុខតំណែងចំនួន ០១រូប និងដំឡើងឋានន្តរសក្តិចំនួន ០៦រូប ថ្នាក់វរសេនីយ៍ទោចំនួន ០៤រូប , ថ្នាក់វរសេនីយ៍ត្រីចំនួន ០២រូប ដែលបានទទួលនូវមុខតំណែង និងឋានន្តរសក្ដិថ្មី គឺជាការបញ្ជាក់ឱ្យឃើញពីការយកចិត្តទុកដាក់របស់ថ្នាក់ដឹកនាំគ្រប់ជាន់ថ្នាក់៕

អត្ថបទ ៖ សិរីវឌ្ឍនៈ