ព័ត៌មានជាតិ

អ្នកនាំពាក្យអប់រំ ៖ មកដល់ពេលនេះ ក្រសួង នៅមិនទាន់អនុញ្ញាតឱ្យសាលាណាមួយរៀបចំការប្រឡងបាក់ឌុបដោយខ្លួនឯងទេ

បានផុស

២ years មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានអះអាង នៅព្រឹកថ្ងៃទី ១៨ កក្កដា នេះថា រហូតមកដល់ពេលនេះ ក្រសួង ពុំបានអនុញ្ញាតឱ្យសាលាណាមួយរៀបចំការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបដោយខ្លួនឯងនៅឡើយទេ។

លោកស្រី បានបន្តថា ប៉ុន្តែកន្លងមកក្រសួងធ្លាប់បានចេញលិខិតផ្តល់សញ្ញាបត្រសមមូលសម្រាប់សាលាមួយចំនួនដែលអនុវត្តកម្មវិធីសិក្សាអន្តរជាតិដូចជាសាលា Cambridge ជាដើម ដែលសាលានេះអនុវត្តតាមស្តង់ដារកម្មវិធីអន្តរជាតិ និងធ្វើរង្វាយតម្លៃស្របតាមស្តង់ដារដែលខ្លួនអនុវត្ត ហើយសិស្សប្រឡងចប់ពីកម្មវិធីអន្តរជាតិនោះ នឹងទទួលបានសមមូលសញ្ញាបត្រ។

សម្រាប់ឆ្នាំនេះ ក្រសួងអប់រំ យុវជន និងកីឡា បានកំណត់យកថ្ងៃទី ៨ ខែតុលា ឆ្នាំ ២០២៤ ជាកាលបរិច្ឆេទសម្រាប់ប្រឡងសញ្ញាបត្រមធ្យមសិក្សាទុតិយភូមិ ពោលគឺក្រោយពិធីបុណ្យភ្ជុំប៉ុន្មានថ្ងៃដែលធ្វើឱ្យអាណាព្យាបាលសិស្ស និងសិស្សដែលត្រូវចូលរួមប្រឡងបាក់ឌុបនៅឆ្នាំនេះ បានលើកឡើងថា ថ្ងៃបរិច្ឆេទ នៃការប្រឡងបាក់ឌុបវាកៀកនឹងពិធីបុណ្យភ្ជុំបិណ្ឌ ព្រោះថាបុណ្យភ្ជុំបិណ្ឌឆ្នាំនេះនឹងប្រព្រឹត្តិទៅនៅថ្ងៃទី ១ ទី ២ និង ទី ៣ ខែតុលា។ ដូចនេះសិស្សដែលមានស្រុកកំណើតនៅឆ្ងាយមិនអាចទៅលេងបាន និងសិស្សដែលចង់ទៅដើរកម្សាន្តក៏ពិបាកទៅដែរ ដោយសារកៀកជិតដល់ថ្ងៃប្រឡង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធបញ្ជានេះដែរ អ្នកនាំពាក្យក្រសួងអប់រំ បានលើកឡើងថា «កាលបរិច្ឆេទនេះ ក្រសួងជឿថា នឹងមិនធ្វើឱ្យប៉ះពាល់ដល់ដំណើរការប្រឡង ឬការឈប់របស់សិស្សានុសិស្សនោះទេ ព្រោះថាពិធីបុណ្យភ្ជុំឆ្នាំនេះ នឹងប្រព្រឹត្តិទៅនៅមុនពេលប្រឡងមួយសប្ដាហ៍ឯណោះ អីចឹងហើយបានជាក្រសួងយល់ថាដំណើរការនាំការប្រឡងរៀបចំដោយរលូន និងមិនមានបញ្ហាអ្វីទេ»៕

អត្ថបទ ៖ សំអឿន