ផ្ទាំងប៉ាណូធំៗបង្ហាញពីការគាំទ្រគម្រោង ព្រែកជីកហ្វូណនតេជោ ត្រូវបានដំឡើងនៅតំបន់កោះពេជ្រ ត្រៀមអបអរសាទរថ្ងៃបើកការដ្ឋាន

ផ្ទាំងប៉ាណូធំៗ បង្ហាញពីការគាំទ្រគម្រោង ព្រែកជីកហ្វូណនតេជោ ត្រូវបានអាជ្ញាធររាជធានីភ្នំពេញ ដំឡើងតាមសួនច្បារក្បែរមជ្ឈមណ្ឌលពិព័រណ៍កោះពេជ្រ ដើម្បីត្រៀមអបអរសាទរថ្ងៃបើកការដ្ឋានសាងសង់ទី៥សីហា ខាងមុខ។ ការរៀបចំដំឡើងនេះ គឺជាការបង្ហាញ និងឱ្យប្រជាពលរដ្ឋទូទៅដែលបានធ្វើដំណើរឆ្លងកាត់ ឬក៏បានទៅលេងកម្សាន្តនៅមជ្ឈមណ្ឌលកោះពេជ្រ អាចមើលឃើញ និងបានដឹងកាន់តែច្បាស់ពីព្រែកជីកជាប្រវត្តិសាស្ត្ររបស់កម្ពុជា។

ក្រៅពីផ្ទាំងប៉ាណូដែលបានរៀបចំហើយនោះ នៅទីលានទល់មុខសាលមហោស្រពកោះពេជ្រ ក្រុមការងារជំនាញ ក៏កំពុងមមាញឹក ក្នុងការរៀបចំដំឡើងឆាក សម្រាប់ការប្រគុំតន្ត្រី បង្កជាការសប្បាយភាពដល់ពលរដ្ឋ នៅវេលាល្ងាច នៃថ្ងៃបើកការដ្ឋានផងដែរ។

ប្រជាពលរដ្ឋបានសម្តែងការពេញចិត្តចំពោះការរៀបចំលើកផ្ទាំងប៉ាណូនេះ ព្រោះវាជាផ្នែកនៃការជួយផ្សព្វផ្សាជាសាធារណៈឱ្យពលរដ្ឋបានដឹងកាន់តែទូលំទូលាយ និងក៏សូមចូលរួមគាំទ្រជាមួយគ្នាផងដែរ ចំពោះព្រែកជីកដ៏ធំ និងអស្ចារ្យដំបូងគេនៅកម្ពុជា។

ពិធីបើកការដ្ឋានជាផ្លូវការណ៍នៅសល់តែរយៈពេល០៤ថ្ងៃទៀតប៉ុណ្ណោះ ក៏នឹងចូលមកដល់។ នៅថ្ងៃទី៥ សីហា ឆ្នាំ២០២៤ដដែលនោះ រដ្ឋបាលរាជធានីភ្នំពេញ ក៏នឹងរៀបចំព្រឹត្តការណ៍ដ៏ធំនៅកោះពេជ្រ គឺការប្រគុំតន្ត្រីដែលមានអ្នកចូលរួមប្រមាណ១ម៉ឺននាក់ជាមួយការបាញ់កាំជ្រួចយ៉ាងគគ្រឹកគគ្រេងផងដែរ ដើម្បីជាការចូលរួមអបអរគម្រោងព្រែកជីកប្រវត្តិសាស្ត្រនេះ ហើយប្រជាពលរដ្ឋទូទៅ ក៏អាចទៅចូលរួមលេងកម្សាន្តដើម្បីបង្កភាពអធិកអធ័មសម្រាប់ការគាំទ្រផងដែរ៕

អត្ថបទ៖ សុភា