រក​ឃើញ​កុមារីម្នាក់អាយុ ១២ ឆ្លងកូវីដ១៩ ពីម្តាយនៅខណ្ឌឫស្សីកែវ

កុមារីអាយុ ១២ ឆ្នាំ​ ម្នាក់ត្រូវបាន​​រក​ឃើញ​ឆ្លងកូវីដ១៩ ដោយ​ឆ្លង​ពីម្តាយនៅ​ស្ថិតនៅ​ក្នុង​ខណ្ឌឫស្សីកែវ រាជធានី​ភ្នំពេញ។ ​នេះបើយោងតាម​ទំព័រហ្វេសបុក​​ផ្លូវការ​លោក ជា ពិសី អភិបា​លខណ្ឌឫស្សីកែវ។

ប្រភពខាងលើនេះឱ្យ​ដឹង​ថា ថ្ងៃទី០៣ ខែមីនា ឆ្នាំ២០២១ វេលាម៉ោង ០៩ និង០០នាទី នៅចំនុចផ្ទះលេខ ១១៣២ ផ្លូវបេតុង ក្រុមទី១១ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ក្រុមគ្រូពេទ្យ បានប្រមូលយកសំណាក​​ទៅធ្វើតេស្ដជាលើកទីពីរ មានចំនួន ១២ នាក់ (ប្រុស ០៥នាក់) (ស្រី ០៧នាក់) ជាលទ្ធផលរកឃើញមាន អ្នកវិជ្ជមាននឹងមេរោគកូវីដ១៩ម្នាក់ ជាកុមារី អាយុ១២ឆ្នាំ (ត្រូវជាកូនរបស់ស្ត្រី អាយុ៣៦ឆ្នាំ និងបុរស អាយុ៣៩ឆ្នាំ ដែលបានវិជ្ជមាននឹងមេរោគកូវីដ១៩)។ បច្ចុប្បន្ននេះ កុមារីខាងលើ ត្រូវបាន ក្រុមគ្រូពេទ្យយកទៅព្យាបាល នៅមណ្ឌលចត្តាឡីស័ករាជធានីភ្នំពេញ (ព្រែកព្នៅ) ហើយ៕