អភិបាលខណ្ឌឫស្សីកែវ ដឹកនាំកម្លាំងចុះស្តារប្រព័ន្ធលូ សង្កាត់ទាំង ៧ ពិនិត្យវឌ្ឍនភាពកាយស្តារព្រែកអូវែង និងព្រែកបាក់ទូក

កាលពីថ្ងៃទី ២៣ ខែមេសា ឆ្នាំ ២០២៦ លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំកម្លាំងរដ្ឋបាលខណ្ឌ សហការជាមួយអាជ្ញាធរសង្កាត់ទាំង ៧ និងភូមិទាំង ៣០ ចុះអនុវត្តការងារស្តារប្រព័ន្ធលូបង្ហូរទឹកទូទាំងមូលដ្ឋានខណ្ឌ ដើម្បីធានាបាននូវប្រព័ន្ធបង្ហូរទឹកមានប្រសិទ្ធភាព និងកាត់បន្ថយបញ្ហាជំនន់ទឹកភ្លៀងក្នុងតំបន់។

ក្នុងសកម្មភាពខាងលើនេះ កម្លាំងការងារ ក៏បានចូលរួមធ្វើអនាម័យបរិស្ថាន សម្អាតសំរាមតាមដងផ្លូវសាធារណៈ និងតំបន់សាធារណៈផ្សេងៗ ដើម្បីលើកកម្ពស់សោភ័ណភាពទីក្រុង និងបង្កើនសុខភាពសាធារណៈរបស់ប្រជាពលរដ្ឋ។

ជាមួយគ្នានេះផងដែរ លោកអភិបាលខណ្ឌ បានបន្តចុះពិនិត្យវឌ្ឍនភាពការងារកាយស្តារព្រែកអូវែង និងព្រែកបាក់ទូក ដែលជាគម្រោងសំខាន់ក្នុងការកែលម្អប្រព័ន្ធបង្ហូរទឹក និងការគ្រប់គ្រងធនធានទឹកនៅក្នុងមូលដ្ឋាន។

ប្រជាពលរដ្ឋ ក៏បានសម្តែងការសប្បាយចិត្ត ខណៈ រដ្ឋបាលខណ្ឌឫស្សីកែវ យកចិត្តទុកដាក់ក្នុងការកែលម្អហេដ្ឋារចនាសម្ព័ន្ធ អនាម័យ បរិស្ថាន ដើម្បីសម្រួលដល់ការរស់នៅ និងប្រកបមុខរបររកស៊ីប្រចាំថ្ងៃរបស់ពលរដ្ឋក្នុងមូលដ្ឋានទូទាំងខណ្ឌឲ្យកាន់តែប្រសើរឡើង៕

អត្ថបទ ៖ សំណាង