កសិករក្នុងខេត្តត្បូងឃ្មុំ ចាប់ផ្ដើមបង្កបង្កើនផលស្រូវប្រាំង​លើផ្ទៃដីជាង៦ពាន់ហិកតានៅឆ្នាំ២០២៤​នេះ

កសិករ១០ភូមិ ក្នុងឃុំទន្លេបិទ ស្រុក/ខេត្តត្បូងឃ្មុំ  និយមដាំស្រូវពីរមុខ គឺប្រភេទពូជស្រូវ៥១ និងពូជ៥៤ ព្រោះវាឲ្យផលល្អ បាយទាន់ឆ្ងាញ់ វាឲ្យផលក្នុង១ហិកតាមិនក្រោម៦តោននោះទេ។ ការបង្កបង្កើនផលស្រូវប្រដេញទឹកនាពេលបច្ចុប្បន្ននេះបានប្រមាណលើផ្ទៃដីជិត៣០០ហិកតាហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ភិន ឈុន មេឃុំទន្លេបិទ បានបញ្ជាក់ឲ្យដឹងថា ប្រជាកសិករនៅក្នុងឃុំទន្លេបិទ មានចំនួន១០ភូមិរួមមាន. ភូមិទួលគរ ភូមិទួលខ្សាច់ ភូមិព្រែកជីក ភូមិដូនម៉ៅក្រោម ភូមិដូនម៉ៅលើ ភូមិទន្លេបិទ ភូមិយាយស ភូមិអន្លង់ពោង ភូមិជ្រោយស្រឡៅ និងភូមិអំពិលជ្រុំ។ នៅលើផ្ទៃដីទំហំជិត៣០០ហិកតា ដោយកសិករដាំ១ឆ្នាំ២ដង ព្រោះឃុំទន្លេបិទ បានកសាងទំនប់បង្ហៀរទឹកទប់ទឹកសម្រាប់ស្រោចស្រពទឹកដល់កសិករក្នុងការដាំដុះស្រូវប្រាំងនេះផងដែរ។

លោក ដុក សារឿន ប្រធានការិយាល័យក្សេត្រសាស្ត្រ និងផលិតភាពកសិកម្មខេត្តបានបញ្ជាក់ឲ្យដឹងថា គិតត្រឹមថ្ងៃទី២៥ ខែវិច្ឆិកា ឆ្នាំ២០២៤នេះ ការងារបង្កបង្កើនផលស្រូវរដូវប្រាំងកសិករបានដាំលើផ្ទៃដីអនុវត្តបាន ៦ ១០០ហិកតា ស្មើនឹង ៣៩,៤៤%នៃផែនការ ១៥ ៤៦៥ហិកតា ។ ការបង្កបង្កើនផលស្រូវនៅក្នុងខេត្តទាំង៧ស្រុក/ក្រុង ស្រុកដែលបានច្រើនជាងគេគឺ ស្រុកក្រូចឆ្មារ និងស្រុកត្បូងឃ្មុំ ដែលទិន្នផលក្នុង១ហិកតាមិនក្រោម៦តោននោះទេ ចំពោះតម្លៃវិញកសិករលក់ក្នុង១គីឡ្រូក្រាមស្រូវ ពី១ពាន់រៀល ទៅ១ពាន់១០០រៀល ៕

អត្ថបទ៖ សាន វិឡែម