ព័ត៌មានជាតិ

មន្ទីរសុខាភិបាលខេត្តត្បូងឃ្មុំ រៀបចំកម្មវិធីពិនិត្យ ព្យាបាល និងវះកាត់ជំងឺភ្នែកគ្រប់ប្រភេទ ជូនពលរដ្ឋឥតគិតថ្លៃ ចំនួន ៥ទីតាំង

បានផុស

១ ខែ មុន

នៅ

ថ្ងៃសុក្រ ៥ មិថុនា ២០២៦

ដោយ

មន្ទីរសុខាភិបាលនៃរដ្ឋបាលខេត្តត្បូងឃ្មុំ សហការជាមួយកម្មវិធីជាតិសុខភាពភ្នែកនៃក្រសួងសុខាភិបាល និងឧបត្ថម្ភគាំទ្រដោយមូលនិធិហ្វ្រេដហូឡូនៅកម្ពុជា នឹងរៀបចំកម្មវិធី «ពិនិត្យ ព្យាបាល និងវះកាត់ជំងឺភ្នែកគ្រប់ប្រភេទ ជូនប្រជាពលរដ្ឋដោយឥតគិតថ្លៃ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីនេះនឹងត្រូវរៀបចំឡើងដោយក្រុមគ្រូពេទ្យជំនាញឯកទេសភ្នែក ទៅតាមកាលបរិច្ឆេទ និងទីតាំងមន្ទីរពេទ្យនានា ដូចខាងក្រោម៖

១. មន្ទីរពេទ្យបង្អែកតំបែរ ស្រុកប្រតិបត្តិតំបែរ ចាប់ពីថ្ងៃទី០៨ ដល់ថ្ងៃទី១២ ខែមិថុនា ឆ្នាំ២០២៦។

២. មន្ទីរពេទ្យបង្អែកក្រូចឆ្មារ ស្រុកប្រតិបត្តិក្រូចឆ្មារ ចាប់ពីថ្ងៃទី២២ ដល់ថ្ងៃទី២៦ ខែមិថុនា ឆ្នាំ២០២៦។

៣. មន្ទីរពេទ្យបង្អែកពញាក្រែក ស្រុកប្រតិបត្តិពញាក្រែក ចាប់ពីថ្ងៃទី០៦ ដល់ ថ្ងៃទី១០ ខែកក្កដា ឆ្នាំ២០២៦។

៤. មន្ទីរពេទ្យមិត្តភាពកម្ពុជា-ចិន ត្បូងឃ្មុំ ចាប់ពីថ្ងៃទី២០ ដល់ថ្ងៃទី២៤ ខែកក្កដា ឆ្នាំ២០២៦។

៥. មន្ទីរពេទ្យបង្អែកមេមត់ ស្រុកប្រតិបត្តិមេមត់ ចាប់ពីថ្ងៃទី ២៧ ដល់ថ្ងៃទី៣១ ខែកក្កដា ឆ្នាំ២០២៦។

ប្រជាពលរដ្ឋទាំងអស់ អាចទៅទទួលសេវា ប្រសិនបើមានបញ្ហាភ្នែកដូចជា ភ្នែកឡើងបាយ ឡើងកន្ទុយថ្លែន, ភ្នែកមើលមិនច្បាស់ ស្រវាំង ផ្សា រមាស់ ឬហូរទឹកភ្នែក និងជំងឺភ្នែកផ្សេងៗគ្រប់ប្រភេទ។

សូមបញ្ជាក់ជូនថា រាល់ការពិនិត្យ ព្យាបាល និងការវះកាត់ គឺមិនមានការទារកម្រៃ ឬបង់ប្រាក់អ្វីទាំងអស់ (ឥតគិតថ្លៃ ១០០%)។ ដូច្នេះប្រជាពលរដ្ឋដែលមានបញ្ហាភ្នែកទាំងអស់ អាចអញ្ជើញទៅទទួលសេវាពិនិត្យ និងព្យាបាលនៅមន្ទីរពេទ្យដែលនៅជិតផ្ទះរបស់លោកអ្នកបំផុត ទៅតាមថ្ងៃខែដែលបានកំណត់ខាងលើ កុំបីខកខានឡើយ៕