ព័ត៌មានជាតិ

ប៉ុស្តិ៍នគរបាលគោកឃ្លាង ចុះផ្សព្វផ្សាយផលប៉ះពាល់ នៃគ្រឿងញៀន និងបញ្ហាក្មេងទំនើង ដល់សិស្សានុសិស្ស

បានផុស

១ year មុន

នៅ

ថ្ងៃពុធ ៥ កុម្ភៈ ២០២៥

ដោយ

កាលពីរសៀលថ្ងៃទី ០៤ ខែកុម្ភៈ ឆ្នាំ ២០២៥ នៅចុងម៉ោងសិក្សា កម្លាំងប៉ុស្តិ៍នគរបាលរដ្ឋបាលគោកឃ្លាង សហការជាមួយលោកនាយកសាលា លោកគ្រូ អ្នកគ្រូ ក្រុមប្រឹក្សាសង្កាត់ បានផ្សព្វផ្សាយគោលនយោបាយភូមិ-សង្កាត់ មានសុវត្ថិភាព ផលប៉ះពាល់ នៃគ្រឿងញៀន និងបញ្ហាក្មេងទំនើង នៅវិទ្យាល័យ សម្តេច ហ៊ុន សែន ភ្នំពេញថ្មី ស្ថិតក្នុងសង្កាត់គោកឃ្លាង ខណ្ឌសែនសុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអនុសេនីយ៍ឯក ង៉ាត់ សុភា នាយប៉ុស្តិ៍គោកឃ្លាង បានឱ្យដឹងថា ដោយអនុវត្តតាមការចុះអប់រំផ្សព្វផ្សាយនេះ គឺធ្វើឡើងតាមការណែនាំរបស់លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដែលបានដាក់ចេញនូវផែនការ ដើម្បីឱ្យកម្លាំងសមត្ថកិច្ចទូទាំងរាជធានីភ្នំពេញ ចុះផ្សព្វផ្សាយពីផលប៉ះពាល់ទាំងអស់នេះដល់សិស្សានុសិស្ស។

លោកអនុសេនីយ៍ឯក ង៉ាត់ សុភា បានឱ្យដឹងទៀតថា ជាមួយគ្នានោះ រូបលោកផ្ទាល់បានពន្យល់ឱ្យយល់ដឹងបានជ្រាបដល់សិស្សមានដូចជាបញ្ហាគ្រឿងញៀន ថា គ្រឿងញៀនធ្វើឱ្យប៉ះពាល់ដល់ការសិក្សា ខូចប្រព័ន្ធប្រាសាទខួរក្បាល បាត់បង់សតិ ឪពុកម្ដាយអាប់ឱនកេរ្តិ៍ឈ្មោះ បាត់បង់សេចក្ដីសុខ -លំនឹងក្នុងគ្រួសារ ធ្វើឱ្យប្រទេសជាតិពោរពេញដោយ ចោរកម្ម ឆក់ ប្លន់ និង មនុស្សអសីលធម៌។ សរុបមក ផលប៉ះពាល់ នៃគ្រឿងញៀន បានជះឥទ្ធិពលមកលើខ្លួនឯង គ្រួសារ និង សង្គមជាតិ។

ដោយឡែកបញ្ហាក្មេងទំនើងវិញ លោកក៏បានពន្យល់ណែនាំអំពីលក្ខណៈភូមិ-ឃុំ មានសុវត្ថិភាព គ្មានហិង្សា ក្មេង លួចឆក់ប្លន់ ក្មេងទំនើង។ បញ្ហាក្មេងទំនើងនេះ កម្លាំងសមត្ថកិច្ច កំពុងនិងបង្ក្រាប ទប់ស្កាត់ដូចភ្លៀងរលឹម មានមួយចាប់ ១ មាន ២ ចាប់ ២ គឺមិនទុកនោះទេ។

ជាមួយគ្នានេះ លោកនាយប៉ុស្តិ៍ ក៏បានបញ្ជាក់ថា ដើម្បីទប់ស្កាត់បញ្ហាក្មេងទំនើងនេះ ត្រូវមានការសហការពីភាគីពាក់ព័ន្ធ ដូចជា អាណាព្យាបាល គ្រឹះស្ថានអប់រំ អាជ្ញាធរ ព្រមទាំងសាមីខ្លួនផ្ទាល់។ អាណាព្យាបាល ត្រូវបង្កើនការតាមដានកូនៗ របស់ខ្លួន ហើយកាត់បន្ថយសេរីភាពពួកគេខ្លះ ព្រោះកាលណាដែលពួកគេមានសេរីភាពច្រើន អាចនឹងមានឱកាសចូលក្រុមបងតូចបងធំ ឬ ក្រុមក្មេងទំនើងជាដើម៕

អត្ថបទ ៖ សំណាង