ស្រះឈូកមួយកន្លែងក្នុងស្រុកសង្កែ ក្លាយជាតំបន់កម្សាន្តសម្រាប់អ្នកខេត្តបាត់ដំបង

មានមនុស្សជាច្រើន ពិសេសគឺក្រុមយុវវ័យបានធ្វើដំណើរជាហូរហែទៅអង្គុយកម្សាន្តលំហែកាយ និងហូបចំណីអាហារប្លែកៗ នាពេលល្ងាច ដើម្បីស្រូបយកខ្យល់អាកាសដ៏បរិសុទ្ធនៅមាត់ស្រះឈូកដែលកំពុងរីកស្គុះស្គាយនៅក្នុងបឹង។

ទីតាំងដែលកំពុងល្បីតៗគ្នា អំពីទេសភាពនាពេលល្ងាច និងមានចំណីអាហារជាច្រើនប្រភេទ គឺមានទីតាំងក្នុងភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង ដែលនៅទីនោះគេសង្កេតឃើញមានស្រះឈូកចំនួនពីរកន្លែងជាប់គ្នា ដោយឡែកនៅមាត់ស្រះឈូកគឺជាទីធ្លាយយ៉ាងទូលាយ និងមានប្រជាពលរដ្ឋលក់នំចំណីជាច្រើនប្រភេទសម្រាប់ជាតម្រូវការរបស់ភ្ញៀវទេសចរ និងក្រុមយុវវ័យដែលទៅកម្សាន្តនៅទីនោះ។

លោក សួន រដ្ឋា ជាអ្នកលក់ណែមអាំង សង្វាក់អាំង និងពងទាកូន បានរៀបរាប់ថា នៅទីតាំងខាងលើនេះកាលពីមុនមិនសូវមានភ្ញៀវមកលេងនោះទេ ដោយសារមិនសូវមានអ្នកស្គាល់ ព្រោះបើធ្វើដំណើរតាមផ្លូវបេតុងចំពីក្រោយផ្សារអន្លង់វិល ឆ្ពោះទៅកាន់ស្រះឈូកនេះ គឺមានចម្ងាយប្រមាណ ៤គីឡូម៉ែត្រ។ ប៉ុន្តែមួយរយៈចុងក្រោយនេះដោយសារសម្បូរអ្នកបង្ហោះរូបភាពតាមបណ្ដាញសង្គម ដោយបង្ហាញនូវទេសភាពស្រះឈូកដ៏ស្រស់ស្អាត និងចំណីអាហារជាច្រើនមុខ ក៏ស្រាប់តែមានភ្ញៀវមកលេងជាហូរហែ ពិសេសគឺក្រុមយុវវ័យដែលគេនាំគ្នាមកអង្គុយហូបចំណីអាហារប្លែកៗនៅតាមតុ កៅអី ដែលអ្នកលក់បានរៀបចំនៅតាមមាត់ស្រះ។

លោកបានបន្តថា ក្រុមអាជីវករដែលលក់ចំណីអាហារនៅទីនេះ ក៏ត្រូវបានម្ចាស់ដីសុំឲ្យជួយបង់មួយកន្លែងពី ៣.០០០ ទៅ ១២.០០០ រៀលក្នុងមួយថ្ងៃ ទៅតាមទំហំទីតាំងដែលលក់ ហើយម្ចាស់ដីក៏បានបេះផ្លែឈូកយកមកដាក់លក់ភ្លាមៗនៅទីនោះដែរ ដោយចាប់ពីម៉ោង ៤ល្ងាចគឺមានអ្នកទៅកម្សាន្តបណ្ដើរៗ ដោយសារជាពេលមេឃចាប់ផ្ដើមត្រជាក់។

គួរបញ្ជាក់ដែរថា រយៈពេលប៉ុន្មានជាង ១ខែមកនេះ ទីតាំងស្រះឈូកចាប់ផ្ដើមមានភ្ញៀវទៅកម្សាន្តច្រើនគួរសម ដែលធ្វើឲ្យអ្នកលក់ចំណីអាហារមានការសប្បាយរីករាយ ក្នុងការលក់ដូរដើម្បីបានកម្រៃចិញ្ចឹមគ្រួសារ ដែលទីតាំងនេះគ្រាន់តែជាចំណែកមួយនៅក្នុងទីតាំងជាច្រើនទៀតក្នុងខេត្តបាត់ដំបង សម្រាប់ឲ្យភ្ញៀវទៅកម្សាន្តដើម្បីស្រូបយកខ្យល់អាកាសដ៏បរិសុទ្ធ៕

អត្ថបទ៖ សោ និយមរ័ត្ន