​កែច្នៃ​​មើមខ្ញី ចេក បំប៉ន​សុខភាព ជួយ​កសិករ​ស្រុក​សំឡូតជាង ២០០ គ្រួសារ បាន​ចំណូល​ទ្រទ្រង់គ្រួសារ

ប្រជាកសិករស្រុកសំឡូត​ប្រមាណជាង ២០០ គ្រួសារ អាចរកចំណូលដើម្បីទ្រទ្រង់ជីវភាពគ្រួសារ ក្រោយពីម្ចាស់សហគ្រាស​មួយ​កន្លែង​នៅក្នុងក្រុងបាត់ដំបង បានមកសហការនិងទទួលទិញផលិតផលកសិករ​យកទៅកែច្នៃ​ជា​អាហារូបត្ថម្ភ​ជំនួយដល់សុខភាព។

កសិករ​បាន​អះអាង​ថា សកម្មភាពរបស់ម្ចាស់សហគ្រាសនេះ បាន​ជួយ​ជំរុញឲ្យកសិករ​បង្កើនការដាំដុះសម្រាប់រកថវិកាផ្គត់ផ្គង់គ្រួសារ ខណះកន្លងមកមើមខ្ញី និងចេកណាំវ៉ាកសិករ​ដាំច្រើនតែពុំមានទីផ្សារ។

អ្នកស្រី សេង សំណាង ម្ចាស់សហគ្រាសកែច្នៃបន្លែផ្លែឈើជាម្សៅ ដើម្បីជួយផ្នែកសុខភាព “អឹម អិល អេក” បានឲ្យដឹង​ថា ក្រោយពីអ្នកស្រីសម្រេចក្តីស្រមៃ​បង្កើតជាសហគ្រាស អ្នកស្រីបានមើលឃើញពីទំហំវត្ថុធាតុដើមយ៉ាងសម្បូរបែប របស់ប្រជាកសិករនៅក្នុងស្រុកជាស្រេច ដែលធ្វើការដាំដុះច្រើនពុំសូវមានទីផ្សារ ក្នុងនោះមាន មើមខ្ញី និង ចេកណាំវ៉ា រួច​អ្នកស្រីក៏បានធ្វើការទំនាក់ទំនង និងសហការជាមួយកសិករជាង​ ២០០ ​គ្រួសារនៅ​ស្រុកសំឡូត ដើម្បីជួយបង្កើននិងលើក​កម្ពស់សេដ្ឋកិច្ចគ្រួសាររបស់ពួកគាត់បន្ថែម ដែលកំពុងតែមានតម្រូវការសម្រាប់ជីវភាពរស់នៅប្រចាំថ្ងៃ។

អ្នកស្រីបន្តថា សហគ្រាសកែច្នៃបន្លែផ្លែឈើជាម្សៅ ហៅកាត់ថា “MLH” អឹម អិល អេក” របស់អ្នកស្រី បានបង្កើតឡើងនៅក្នុង ឆ្នាំ២០២១ ស្របពេលដែលជំងឺ​កូវី ១៩ មិនទាន់បានបញ្ចប់នៅឡើយ។

សហគ្រាសអ្នកស្រី សេង សំណាង មានទីតាំងនៅភូមិអង់ សង្កាត់ អូរចារ ក្រុងបាត់ដំបង ដែលទិញវត្ថុធាតុដើមពីប្រជាកសិករក្នុងស្រុកមានដូចជា ផ្លែចេកណាំវ៉ា រំដេង ខ្ជាយ រមៀត ដើម្បីយកមកកែច្នៃជាផលិតផលជួយផ្នែកសុខភាព ក្រោយ​មានការទទួលស្គាល់ពីមន្រ្តីជំនាញត្រឹមត្រូវ។

បើតាមអ្នកស្រី សេង សំណាង វត្ថុធាតុដើមធម្មជាតិដែលអ្នកស្រីបានជួយប្រមូលទិញពីកសិករនៅក្នុងស្រុកសំឡូតជាង ២០០ គ្រួសារនោះមាន មើមខ្ញី ១០ តោនក្នុង ១ ឆ្នាំ ចេកណាំវ៉ា ១០ តោនក្នុង ១ ខែ ហើយវត្ថុធាតុដើមមួយចំនួនទៀត បានទទួលទិញពីកសិករនៅស្រុកវាលវែង ក្នុងខេត្តពពោធិ៍សាត់ និងពីភ្នំគូលេនមួយចំនួនផងដែរ។

អ្នកស្រីបន្តថា រាល់វត្ថុធាតុដើមធម្មជាតិទាំងអស់ ត្រូវបានធ្វើការសម្ងួតតាមស្តង់ដាអនាម័យរយះពេល ១២ ម៉ោង ដើម្បីរក្សាគុណភាពនិងសាធាតុចិញ្ចឹមរបស់វត្ថុធាតុធម្មជាតិទាំងនេះ មុននឹង​យកមកកែច្នៃជាម្សៅបញ្ចូលគ្នាក្នុងនោះមាន មើមការ៉ុត ផ្លែចេក ផ្លែល្ពៅ សណ្តែកសៀង បានក្លាយជាម្សៅសម្រាប់ទ្រទ្រង់សុខភាពបានគ្រប់វ័យយ៉ាងមានប្រសិទ្ធិភាព។

ស្ត្រីវ័យ ៤១ ឆ្នាំរូបនេះបន្តថា ម្សៅអាហារបំប៉នសុខភាពបានគ្រប់វ័យនេះ កំពុងមានការគាំទ្រពីអ្នកប្រើប្រាស់ និងបានផ្គត់ផ្គង់លើទីផ្សារប្រមាណ ៥ ពាន់ប្រអប់ក្នុង១ខែៗ ដោយក្នុង ១ ប្រអប់មាន ២០ កញ្ចប់ លក់ក្នុងតម្លៃ ៤ មុឺនរៀល ខណះ​ផលិតផល​មាន​ការ​ទទួលស្គាល់ពីគុណភាព មិនចាញ់ផលិតផលពីក្រៅប្រទេសនោះទេ៕

អត្ថបទ÷សៅ សារិទ្ធ