ដើមឫស្សីព្រៃនៅ​មានតម្រូវការ ១ ដើម លក់បាន ២ ពាន់​រៀល ​រនាបបាន ១ ម៉ឺនរៀល ក្នុង ១ បាច់

របរកាប់ដើមឫស្សី ឬ ធ្វើរនាបឫស្សីព្រៃ ជារបរមួយរបស់អ្នកភូមិអញ្ចាញ ឃុំដារ ស្រុកចិត្របុរី ខេត្តក្រចេះ តាំងពីយូរឆ្នាំ​មក​ហើយ ខណៈបច្ចុប្បន្ននេះកំពុងមានតម្រូវការខ្លាំងនៅលើទីផ្សារ ប៉ុន្តែតម្លៃវិញនៅដដែលនិងពុំសូវមានអ្នកចូលព្រៃកាប់ដូចមុន។

លោក វ៉ាន ហ៊ូ ប្រជាពលរដ្ឋនៅភូមិអញ្ចាញ ឃុំដារ ស្រុកចិត្របុរី បានឲ្យកម្ពុជាថ្មីដឹងថា សព្វថ្ងៃនេះ ថៅកែមួយចំនួននៅក្នុងទីរួមខេត្តក្រចេះ កំពុងត្រូវការនិងបានកម្មង់ដើមឫស្សីជាច្រើនដើម និងរនាបឫស្សីជាច្រើនបាច់ខុសពីឆ្នាំមុនៗ ប៉ុន្តែតម្លៃនៅដដែល ខណៈដែល​ដើមឫស្សីព្រៃខ្សត់ទៅៗ​និង​កាន់តែទៅឆ្ងាយ ធ្វើឲ្យអ្នកភូមិមួយចំនួនបោះបង់ចោលរបរចូលព្រៃកាប់ដើមឫស្សីមួយនេះ។

តាមរយៈបទពិសោធន៍ជិត ៣០ ឆ្នាំ លោក វ៉ាន ហ៊ូ បានបន្តថា លោកប្រកបរបរចូលព្រៃកាប់ដើមឫស្សី តាំងពីបររទះគោ ចូលព្រៃកាប់ដើមឫស្សីវិលវិញល្ងាច និងលក់ដើមឫស្សីបានតម្លៃពី ៥ រយរៀល ទៅ ៨ រយរៀល ក្នុង១ដើម និងរនាបបាច់ លក់បានតម្លៃពី ៥ ពាន់រៀល ទៅ ៨ ពាន់រៀល ក្នុង១បាច់។

ប៉ុន្តែសព្វថ្ងៃនេះ លោកត្រូវចំណាយពេលយូរថ្ងៃទម្រាំទៅដល់ព្រៃឫស្សី និងពិបាកក្នុងការរកដើមឫស្សីព្រៃ ដោយសារឥឡូវ​ខ្សត់ជាងពីកាល ២០ ឆ្នាំមុន ហើយពេលកាប់បានមកហើយ លក់បានក្នុងតម្លៃពី ២ ពាន់រៀល ទៅ ២៥០០ រៀល ក្នុង ១ ដើម និងរនាបបាច់លក់បានតម្លៃ ១ ម៉ឺនរៀល ក្នុង ១ បាច់ តែប៉ុណ្ណោះ ទោះបីជាតម្លៃសព្វថ្ងៃថ្លៃជាងពីមុនក៏ពិតមែន ប៉ុន្តែដើមឫស្សីព្រៃក៏ពិបាករកដូចគ្នា។ ដោយចូលព្រៃមួយជើង ចំណាយពេលពី ៣ ទៅ ៤ ថ្ងៃ អាចកាប់ដើម​ឫស្សីជាង ២០០ ដើម ប៉ុណ្ណោះ។

ដោយសារវ័យកាន់តែចាស់​ លោកបានសម្រេចចិត្តថា ប្រហែលជា ១ ទៅ ២ ឆ្នាំទៅមុខទៀត នឹងឈប់ចូលព្រៃកាប់ដើមឫស្សីទៀតហើយ ពីព្រោះកម្លាំងកាន់តែខ្សោយ ដើមឫស្សីកាន់តែពិបាករក និងលក់បានតម្លៃទាប៕

អត្ថបទ៖ ប្រុញ វិធិន