ព័ត៌មានជាតិ

អាជ្ញាធរខណ្ឌ ៧ មករា សំណូមពរប្រជាពលរដ្ឋទុកដាក់សំរាមឲ្យបានត្រឹមត្រូវ

បានផុស

៤ ខែ មុន

នៅ

ថ្ងៃពុធ ៩ មេសា ២០២៥

ដោយ

អាជ្ញាធរខណ្ឌ ៧ មករា សំណូមពរដល់ប្រជាពលរដ្ឋសូមមេត្តាទុកដាក់សំរាមឲ្យបានត្រឹមត្រូវ ដើម្បីកុំឲ្យបាត់បង់សោភ័ណភាព សណ្ដាប់ធ្នាប់ ឬ មានក្លិនមិនល្អ ក្នុងមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅម្ដុំអគារបុរីកីឡា ស្ថិតក្នុងសង្កាត់វាលវង់ ខណ្ឌ ៧ មករា រាជធានីភ្នំពេញ ដោយត្រង់ចំណុចទីតាំងខាងលើនេះមានប្រជាពលរដ្ឋរស់នៅច្រើន ដូច្នេះការទុកដាក់សំរាមនៅអគារមួយចំនួនគ្មានសណ្ដាប់ធ្នាប់នោះទេ។

អ្នកស្រី ដានី ជាប្រជាពលរដ្ឋរស់នៅទីតាំងអគារបុរីកីឡា ប្រាប់ កម្ពុជាថ្មី ថា ដោយសារតែមានប្រជាពលរដ្ឋរស់នៅច្រើននៅលើអគារបុរីកីឡា ហេតុដូចនេះហើយមានអ្នកមួយចំនួនតូចនៅមិនទាន់យល់ដឹងពីបញ្ហាការទុកដាក់សំរាម និងពេលវេលារបស់ក្រុមហ៊ុនប្រមូលសំរាមមកទទួល ដោយខ្លះទៀតយកពីលើអគារចុះមកដល់ខាងក្រោមបោះចោល ឬ ទុកដាក់គ្មានសណ្ដាប់ធ្នាប់តែម្ដង។

ដោយឡែក លោក ពូ ខេន ជាប្រជាពលរដ្ឋរស់នៅតំបន់បុរីកីឡាដូចគ្នា ក៏បានបន្ថែមដែរថា ការទុកដាក់សំរាមដែលគ្មានរបៀបរៀបរយនេះវាអាចធ្វើឲ្យសំរាមទាំងអស់នេះហូរចូលតាមប្រព័ន្ធលូ បង្កការកកស្ទះ ឬក៏ជន់លិចក្នុងរដូវវស្សា។ ម្យ៉ាងទៀត ប្រសិនជាសំរាមនោះមានក្លិនមិនល្អអាចធ្វើឲ្យប៉ះពាល់ទៅដល់សុខភាពប្រជាពលរដ្ឋដែលរស់នៅជិតៗ នោះផងដែរ។ បន្ថែមនោះ ថែមទាំងប៉ះពាល់ដល់សុខភាពប្រជាពលរដ្ឋដែលធ្វើដំណើរឆ្លងកាត់តំបន់ខាងលើនេះផងដែរ។

ពាក់ព័ន្ធបញ្ហានេះ លោក ប៉ែន ធឿន ប្រធានការិយាល័យបរិស្ថានអនាម័យខណ្ឌ ៧ មករា បានបញ្ជាក់ឲ្យ កម្ពុជាថ្មី ដឹងថា ដោយមានការយកចិត្តទុកដាក់ពីលោកអភិបាលខណ្ឌ មន្ត្រីជំនាញ បានធ្វើការសហការជាមួយនឹងក្រុមហ៊ុនមីសូដា ក្នុងមូលដ្ឋានខណ្ឌ។ កន្លងទៅ លោកអភិបាលបានណែនាំទៅកាន់ប្រជាពលរដ្ឋតាមរយៈវេទិកាសាធារណៈរបស់ភូមិឃុំសង្កាត់ខណ្ឌ ត្រូវទុកដាក់វេចខ្ចប់កាកសំណល់ឲ្យបានល្អ ហើយត្រូវបញ្ចេញសំរាមតាមពេលវេលាកំណត់ម៉ោង ៦ ល្ងាច ដល់ម៉ោង ៩ យប់ ដោយសារតែអគារបុរីកីឡាមានចំនួនអ្នករស់នៅច្រើន ដូច្នេះហើយសំរាមដែលយកមកចោលគ្មានសណ្ដាប់ធ្នាប់មួយចំនួន អាជ្ញាធរខណ្ឌ បានចរចាជាមួយក្រុមហ៊ុនប្រមូលសំរាមបន្ថែមក្នុងការមកប្រមូលចេញ។ ពេលខ្លះមានប្រជាពលរដ្ឋមួយចំនួនខ្វះការយល់ដឹងពីបញ្ហាអនាម័យសាធារណៈជាហេតុដែលធ្វើឲ្យបាត់បង់សោភ័ណភាព។

ជាមួយគ្នានេះ អាជ្ញាធរខណ្ឌ ៧ មករា ក៏បានសំណូមពរទៅដល់ប្រជាពលរដ្ឋទាំងអស់ សូមមេត្តាទុកដាក់សំរាមឲ្យបានត្រឹមត្រូវ និងបញ្ចេញសំរាមតាមម៉ោងកំណត់របស់ក្រុមហ៊ុនប្រមូលសំរាមនីមួយៗ បានកំណត់ ជៀសវាងយកមកចោលគ្មានសណ្ដាប់ធ្នាប់៕

អត្ថបទ ៖ ម៉េង