ជនជាតិដើមភាគតិចខេត្តមណ្ឌលគិរី ប្រារព្ធពិធីរំឭកខួបវប្បធម៌ និងបុណ្យចូលឆ្នាំថ្មីប្រពៃណីរបស់ខ្លួន

ការប្រកាន់ខ្ជាប់ទំនៀមទម្លាប់ប្រពៃណីជាតិសាសន៍របស់ខ្លួននីមួយៗជារឿងសំខាន់ ដែលជាអត្តសញ្ញាណរបស់ប្រជាជន ឬប្រទេសផងដែរ។ ជាក់ស្តែងនៅថ្ងៃទី១២ ខែមេសា ឆ្នាំ២០២៥ ជនជាតិដើមភាគតិចទូទាំងខេត្តមណ្ឌលគិរី បានប្រមូលផ្តុំគ្នាយ៉ាងច្រើនសន្ធឹកសន្ធាប់ រំឭកខួបវប្បធម៌ប្រពៃណីរបស់ខ្លួន ហើយនាំគ្នាដង្ហែក្បួននៅក្នុងក្រុងសែមនោរម្យច្រើនកុះករអធឹកអធម។

លោក ម៉ៅ ណាន អាយុ៥៦ឆ្នាំ ជាមេសហគមន៍ជនជាតិដើមភាគតិចព្នងនៅភូមិអន្រេះ ឃុំអរបួន ស្រុកកោះញែក ខេត្តមណ្ឌលគិរី បានប្រាប់ «កម្ពុជាថ្មី» ថា ក្នុងនាមពួកគាត់ ជាជនជាតិដើមភាគតិចព្នងរស់នៅខេត្តមណ្ឌលគិរីតែងតែរំឭកខួបវប្បធម៌នេះ ជារៀងរាល់ឆ្នាំ ឲ្យតែចូលមកដល់ខែមេសាអំឡុងពីថ្ងៃទី១១ ដល់ថ្ងៃទី១២ ហើយការធ្វើពិធីបុណ្យរម្លឹកវប្បធម៌ជនជាតិដើមនេះ មានចំនួន៤ជនជាតិរួមមាន៖ ក្រោល ស្ទៀង ម្ហូន និងជនជាតិភាគតិចព្នង។

លោកប្រធានសហគមន៍ និងជាមេកន្ទ្រាញ បានបន្ថែមថា ការធ្វើបុណ្យរម្លឹកវប្បធម៌នេះឡើង គឺដើម្បីចង់បង្ហាញទៅដល់សាធារណជន ប្រជាពលរដ្ឋទូទៅ ឲ្យស្គាល់ពីវប្បធម៌ជនជាតិដើមភាគតិចគ្រប់ជាតិសាសន៍ ក្នុងខេត្តមណ្ឌលគិរី គឺពួកខ្ញុំនៅតែប្រកាន់ខ្ជាប់ប្រពៃណីទំនៀមទម្លាប់វប្បធម៌ ដូចបងប្អូនខ្មែរទូទៅដែរ។

ពេលដល់ថ្ងៃទី១១ ដល់ថ្ងៃទី១២ ខែមេសានេះ ដូចជាថ្ងៃបុណ្យចូលឆ្នាំថ្មីរបស់ជនជាតិភាគតិចដែរ។ បន្ថែមពីនេះ បានបញ្ជាក់ជូនសាធារណជន កុំឲ្យយល់ច្រឡំថា ជនជាតិដើមភាគតិចគ្រប់ជាតិសាសន៍ ថា រស់នៅតែក្នុងព្រៃមិនអាចមានសមត្ថភាពអាចធ្វើការងាផ្សេងៗ នឹងមិនអាចរៀនសូត្របានខ្ពង់ខ្ពស់នោះទេ។

លោកបញ្ជាក់ថា ជនជាតិដើមភាគតិចគ្រប់ជាតិសាសន៍ មានសមត្ថភាព មានកម្រិតវប្បធម៌បានខ្ពង់ខ្ពស់ដូចគេដូចឯងដែរ ខ្លះធ្វើជាមន្ត្រីរាជការ ខ្លះទៀតក៏ជាកងកម្លាំងប្រដាប់អាវុធ ឯខ្លះទៀត ក៏មានឈាមជ័រជនជាតិដើមភាគតិច ជាថ្នាក់ដឹកនាំខេត្ត និងកំពុងមានកូនចៅបងប្អូន សិក្សារៀនសូត្រនៅឯបរទេសថែមទៀតផង។

លោកប្រធានសហគមន៍ ក៏បានអំពាវនាវទៅដល់ជនជាតិដើមភាគតិចទាំងអស់ ដែលជាជាតិដើមភាគតិច សូមមេត្តាកុំភ្លេចដើមកំណើតជាតិសាសរបស់ខ្លួន និងប្រកាន់ខ្ជាប់ប្រពៃណីឲ្យបាន ទំនៀមទម្លាប់ពីដូនតា និងសូមជូនពរទៅដល់ប្រជាពលរដ្ឋ ពិសេសជនជាតិដើមភាគតិចទាំងអស់ សុទ្ធតែក្នុងឱកាសឆ្នាំថ្មីជួបតែសេចក្ដីសុខសេចក្ដីចម្រើន និងធ្វើដំណើរត្រឡប់ទៅផ្ទះវិញវា ប្រកបដោយសុវត្ថិភាព និងកុំឲ្យមានឈឺតម្កាត់ផ្សេងៗផងដែរ។

សូមបញ្ជាក់ថា នៅក្នុងកម្មវិធីបុណ្យរំឭកវប្បធម៌ជនជាតិដើមភាគតិច៤ជមជាតិនេះ មានការសែនព្រេនកាប់គោក្របី មានទាំងស្រាពាងជាច្រើន ហើយអ្វីដែលបង្កការសប្បាយរីករាយនោះគឺមានការប្រគំតន្ត្រីទាំងពេលថ្ងៃរហូតដល់យប់ ដែលច្រៀងដោយ តារាចម្រៀងឯករបស់ជនជាតិដើមភាគតិចព្នងផ្ទាល់ខេត្តមណ្ឌលគិរី៕

អត្ថបទ៖រៀម សុខហេង