ជនជាតិភាគតិចម្នាក់នៅខេត្តមណ្ឌលគិរីចូលដាក់អន្ទាក់មាន់នៅក្នុងព្រៃ ត្រូវហ្វូងសត្វដំរីព្រៃជាន់ស្លាប់

បុរសម្នាក់ដែលជាជនជាតិភាគតិច ប្រកបរបរដើរដាក់អន្ទាក់មាន់ព្រៃយកមកបរិភោគ ត្រូវដំរីព្រៃជាន់ស្លាប់នៅក្នុងព្រៃក្នុងពេលចេញទៅដាក់អន្ទាក់។ ហេតុការណ៍បានកើតឡើងនៅក្នុងភូមិពូចា ឃុំស្រែព្រះ ស្រុកកែសីមា ខេត្តមណ្ឌលគិរី។ សមត្ថកិច្ចបានបង្ហាញអត្តសញ្ញាណជនរងគ្រោះមានឈ្មោះ ព្លឹង គោញ ភេទប្រុសអាយុ៥២ឆ្នាំ ជនជាតិព្នង មានទីលំនៅបច្ចុប្បន្នភូមិពូចា ឃុំស្រែព្រះ ស្រុកកែវសីមា ខេត្តមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសម្តីរបស់កូនបង្កើតឈ្មោះ គញ អនតូ ត្រូវជាកូនរបស់ជនដែលបានស្លាប់ បានឲ្យដឹងថា មុនពេលកើតហេតុ នៅព្រឹកថ្ងៃទី១៣ខែមករា ឪពុករបស់ខ្លួនបានចេញពីផ្ទះ ធ្វើដំណើរចូលព្រៃ ដើម្បីទៅដាក់អន្ទាក់យកមាន់ព្រៃ យកមកធ្វើម្ហូបដោះស្រាយជីវភាពដូចសព្វមួយដង ប៉ុន្តែរហូតដល់វេលារសៀលក៏មិនឃើញឪពុកត្រឡប់មកផ្ទះវិញដូចរាល់ដង។

លុះព្រឹកឡើង ថ្ងៃទី១៤ ខែឆ្នាំដដែល ដោយបាត់មិនឃើញឳពុកវិលមកផ្ទះដូចរាល់ដង ខ្លួនក៏បានបបួលពូរបស់ខ្លួនដែលមានឈ្មោះ លើម វន ចូលព្រៃ ដើម្បីស្វែងរកឪពុកដែលបានបាត់ខ្លួនមួយថ្ងៃមួយយប់។ លុះធ្វើដំណើរដល់អូរមួយ ដែលមានឈ្មោះថា អូរច្រា ក៏ប្រទះឃើញឪពុករបស់ខ្លួនដេកស្លាប់ នៅកន្លែងកើតហេតុនោះតែម្ដង។ ក្រោយឃើញហេតុការណ៍បែបនេះ លោក លើម វន បានរាយការណ៍ជូនសមត្ថកិច្ច។

ក្រោយទទួលបានដំណឹងនេះ សមត្ថកិច្ចបានចុះទៅធ្វើកោសល្យវិច័យលើសពជនរងគ្រោះ។ តាមការធ្វើកោសល្យវិច័យរបស់សមត្ថកិច្ចជំនាញពិនិត្យទៅលើផ្ទៃមុខ និងដងខ្លួនជនរងគ្រោះ បានរកឃើញថាមានស្នាមដានជើងសត្វដំរីជាន់ ហើយសន្និដ្ឋានថា ជនរងគ្រោះខាងលើត្រូវបានហ្វូងសត្វដំរីព្រៃជាន់ព្រេចស្លាប់។

បច្ចុប្បន្នសពជនរងគ្រោះសមត្ថកិច្ចបានប្រគល់ជូនសាច់ញាតិធ្វើបុណ្យតាមប្រពៃណី៕

អត្ថបទ៖រៀម សុខហេង