ជនជាតិដើមភាគតិចនៅមណ្ឌលគិរី បន្តទម្លាប់ដូនតា ប្រមូលផលស្រូវ បូតដោយដៃ

ជនជាតិដើមភាគតិចព្នងនៅក្នុងខេត្តមណ្ឌលគីរីមួយចំនួន នៅតែបន្តរក្សាទំនៀមទម្លាប់ប្រមូលផលស្រូវបូតដោយដៃ ដោយសារជំនឿថានឹងនាំមកនូវសេចក្ដីសុខ។

កសិករឈ្មោះ ក្រែក ជូញ អាយុ ៤៧ ឆ្នាំ ជាជនជាតិភាគតិចព្នង រស់នៅភូមិពូតាំង សង្កាត់រម្យនា ក្រុងសែនមនោរម្យ ខេត្តមណ្ឌលគិរី បានប្រាប់កម្ពុជាថ្មី នៅថ្ងៃទី២០ ខែវិច្ឆិកានេះថា ឲ្យតែដល់ខែរដូវប្រមូលផលស្រូវទុំ អ្នកភូមិតែងតែនាំគ្នាបូតស្រូវក្នុងចម្ការដោយដៃផ្ទាល់ ទោះពិបាកយ៉ាងណាក៏ដោយ។

លោកបន្តថា ទំនៀមទម្លាប់ប្រមូលផលស្រូវបូតដោយដៃនេះ ត្រូវប្រើពេលយូរថ្ងៃ ទម្រាំប្រមូលផលអស់ ប៉ុន្តែដើម្បីថែរក្សាវប្បធម៌ពីដូនតាមក ទើបអ្នកភូមិនៅតែបន្តរក្សាការដាំដុះ និងប្រមូលផលតាមបែបប្រពៃណីនេះដដែល ដើម្បីកុំឲ្យបាត់បង់ និងចង់ឲ្យក្មេងជំនាន់ក្រោយបានស្គាល់។ ការរក្សាជំនឿ ប្រពៃណីនេះ គឺមិនមែនតែនៅពេលប្រមូលផលនោះទេ ពោលគឺចាប់តាំងពីពេលដាក់ដាំស្រូវមកម្ល៉េះ ដោយមានការសែនព្រេនសុំសេចក្ដីសុខ នៅទីតាំងចម្ការផ្តាល់តែម្ដង៕

អត្ថបទ៖ រៀម សុខហេង