របាយការណ៍៖ ៤ឆ្នាំ គម្រោង CAPFISH បានជួយលើកស្ទួយជីវភាពប្រជានេសាទចាប់តាំងពីការកែច្នៃ ដល់ការអប់រំ

លោក ស្រ៊ុន លឹមសុង ​អនុប្រធានរដ្ឋបាលជលផល​ សង្កេតឃើញថា រាល់សកម្មភាពរបស់គម្រោង CAPFISH-Capture​​ ដែលជាជំនួយរបស់សហភាពអឺរុប អនុវត្តដោយអង្គការអុកស្វាម គិតចាប់តាំងពីឆ្នាំ២០២១-២០២៥ ពិតជាបានជួយលើកស្ទួយការរស់នៅរបស់ប្រជានេសាទបានយ៉ាងច្រើនគួរឱ្យកោតសរសើរ រួមមានការចូលរួមផ្នែកទឹកស្អាតនិងអនាម័យ ផ្នែកអប់រំ ការចិញ្ចឹមជីវិត និងការអភិរក្សធនធានធម្មជាតិជាដើម។​

នាឱកាសអញ្ជើញចូលរួមបើកសិក្ខាសាលាក្នុងពិធីបិទ គម្រោង«បង្កើតការងារជាសេដ្ឋកិច្ចវិលជុំរបស់សហគមន៍នេសាទ នៅថ្ងៃទី ១៣ ខែមិថុនា ឆ្នាំ ២០២៥ លោក ស្រ៊ុន លឹមសុង អនុប្រធានកម្មវិធី CAPFISH-Capture នៃក្រសួងកសិកម្ម រុក្ខាប្រមាញ់ និងនេសាទ បានថ្លែងថា បើតាមរបាយការណ៍អុកស្វាម ក្នុងរយៈពេល ៤ ឆ្នាំកន្លងមក អង្គការអុកស្វាម និងអង្គកាជាដៃគូ បានសម្រេចបាននូវលទ្ធផលសំខាន់ៗជាច្រើន។

សមិទ្ធផលទាំងនោះរួមមាន បណ្តុះបណ្តាលសមាជិកសហគមន៍អំពីការអភិរក្សត្រី និងព្រៃលិចទឹក, បង្កើតក្រុមកែច្នៃផលនេសាទ និងក្រុមចិញ្ចឹមឃ្មុំ, ផ្តល់សេវាទឹកសុវត្ថិភាព បង្គន់អនាម័យ និងជួសជុលសាលារៀន, ផ្តល់អាហារ និងអាហារូបករណ៍ដល់សិស្ស,ជំរុញអេកូទេសចរណ៍ និងកសិកម្មឆ្លាត ការកែច្នៃសំរាមទៅជាអិដ្ឋអេកូ ​និងទៅជារបស់ប្រើប្រាស់ច្រើនយ៉ាង និងបានបំពាក់សូឡាតាមផ្ទះសហគមន៍នេសាទ។

លោក ស្រ៊ុន លឹមសុង បញ្ជាក់ថា៖«លទ្ធផលទាំងនេះមិនអាចសម្រេចបានឡើយ ប្រសិនបើគ្មានការចូលរួមយ៉ាងសកម្មពីសហគមន៍ អាជ្ញាធរមូលដ្ឋាន និងដៃគូអភិវឌ្ឍន៍ទាំងអស់។ ទាំងនេះជាចំណូលបន្ថែមរបស់ប្រជានេសាទដែលមិនអាចខ្វះបាន»។ លោកបន្ថែមថា​ ការអនុវត្តគម្រោងរបស់អង្គការអុកស្វាមនេះ រដ្ឋបាលជលផលមានមោទនភាពចំពោះសមិទ្ធិផលសំខាន់ៗ ដែលសម្រេចបាន ក្នុងការរួមចំណែកអភិវឌ្ឍជលផលនិងសូមថ្លែងអំណរគុណយ៉ាងជ្រាលជ្រៅចំពោះការប្តេជ្ញាចិត្ត និងការសហការរបស់អ្នកទាំងអស់គ្នា។ លោកចាត់ទុកថា សិក្ខាសាលានេះគឺជាឱកាសដ៏ល្អសម្រាប់យើងពិភាក្សា សិក្សា និងចែករំលែកបទពិសោធន៍ ដើម្បីបន្តការអភិវឌ្ឍន៍សហគមន៍នេសាទឲ្យកាន់តែប្រសើរឡើង។

ក្នុងឆ្នាំ២០២៤កន្លងមក រដ្ឋាភិបាលនៃប្រទេសកម្ពុជា ជាពិសេសរដ្ឋបាលជលផល សង្កេតឃើញថាប្រទេសកម្ពុជាទទួលបានផលនេសាទ និងវារីវប្បកម្មសម្រេចបានចំនួនជាង ៩២៧ពាន់ តោន កើនឡើង ៦១ពាន់តោន ស្មើនឹង៧% ធៀបនឹងឆ្នាំ២០២៣ ដែលក្នុងនោះ ផលនេសាទទឹកសាបទទួលបាន៤៦៧ពាន់តោន ផលនេសាទសមុទ្រទទួលបាន ១៣៩ពាន់តោន និងផលវារីវប្បកម្ម ៣២០ពាន់តោន។

ទន្ទឹមនេះ ការអភិរក្សសត្វផ្សោតដែលជារតនសម្បត្តិជាតិ ក្រសួងទទួលបានតួលេខវិជ្ជមាន ដែលមានសត្វផ្សោតបានកើតកូនចំនួន៩ក្បាល និងស្លាប់៤ក្បាល តាមការប៉ានស្មានមានសត្វផ្សោតសរុបចំនួន ១០៤ក្បាលក្នុងឆ្នាំ២០២៤។ នេះបើតាមរបាយការណ៍ជលផល។ ជាមួយគ្នានេះ ក៏មានវត្តមានជ្រូកទឹកជាច្រើនឡើងវិញបន្ទាប់ពីបាត់ខ្លួនជាង១០ឆ្នាំកន្លងមក ជាមួយគ្នានេះ ផ្សោតឃ្លៀច (ផ្សោតពណ៌ ផ្កាឈូក) និងផ្សោតក្បាលត្រឡោកក៏កើនឡើងច្រើនផងដែរ ប្រមាណជាង១០០ក្បាល ដែលតែងតែមានវត្តមានជាញឹកញាប់នៅតំបន់ឆ្នេរ ពិសេសខេត្តកំពតនិងកែប។

ក្រសួងកសិកម្ម បានពង្រឹងកិច្ចសហការជាមួយក្រសួង-ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងអាជ្ញាធរមានសមត្ថកិច្ច និង អង្គការជាតិនិងអន្តរជាតិក្នុងការទប់ស្កាត់​ បទល្មើសនេសាទកាន់តែមានប្រសិទ្ធភាព ដើម្បីធានាបាននូវការផ្គត់ផ្គង់ កាត់បន្ថយការនាំចូល រក្សាបានតុល្យភាពតម្លៃទីផ្សារ ព្រមទាំងធានាបាននូវគុណភាព និងសុវត្ថិភាពសម្រាប់អ្នកបរិភោគ៕