ព័ត៌មានជាតិ

នាយករដ្ឋមន្ត្រីថាកម្ពុជាបានបង្ហាញទៅពិភពលោកចំពោះការតស៊ូផ្លាស់ប្ដូរពី«វាលពិឃាត» មកជាទឹកដីនៃសន្ដិភាព

បានផុស

១០ ខែ មុន

នៅ

ថ្ងៃអាទិត្យ ១៣ កក្កដា ២០២៥

ដោយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានថ្លែងថាការដាក់សារមន្ទីរប្រល័យពូជសាសន៍ទាំង៣កន្លែងនៅកម្ពុជាជាសម្បត្តិបេតិកភណ្ឌពិភពលោកគឺជាគំរូមួយចំពោះពិភពលោកស្ដីពីការតស៊ូដ៏យូរអង្វែងរបស់កម្ពុជា ក្នុងការផ្លាស់ប្ដូរដោយជោគជ័យពីរបបប្រល័យពូជសាសន៍ មកជាទឹកដីនៃសន្ដិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសារពិសេសនៅព្រឹកថ្ងៃទី១៣ ខែកក្កដា ឆ្នាំ២០២៥នេះ សម្ដេចធិបតី ហ៊ុន ម៉ាណែត បានប្រកាសថា ថ្ងៃទី១១ ខែកក្កដា នឹងក្លាយជាកាលបរិច្ឆេតនៃការចងចាំដ៏មានសារៈសំខាន់មួយបន្ថែមទៀតសម្រាប់ជាតិ ប្រជាជនកម្ពុជា និងពិភពលោក។ ការចុះ «បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សានិងសន្ដិភាព» គឺជាអំណោយយ៉ាងអស្ចារ្យមួយរបស់កម្ពុជា ជូនដល់មនុស្សជាតិទូទាំងពិភពលោកនូវគំរូនៃការចងចាំ ការផ្សះផ្សាជាតិ ការស្វែងរកយុត្តិធម៌ជូនជនរងគ្រោះ ការអប់រំ ការកសាង និងការការពារសន្ដិភាព។

សម្ដេចធិបតីបានថ្លែងថា៖ «ការចុះបញ្ជីនេះជាការបង្ហាញនួវសារដែលមានតម្លៃជាសាកលទោះបីជាធ្លាប់ឆ្លងការនូវសោកនាដកម្មដ៏អាក្រក់យ៉ាងណាក៏ដោយក៏ប្រជាជាតិមួយអាចងើបម្ដងទៀត។ ហើយការងើបឈរនេះមិនមែនដោយការបំភ្លេចពីអតីតកាល ប៉ុន្ដែដោយការចងចាំនិងការប្រែក្លាយការចងចាំទាំងនោះជាកម្លាំងចលករដើម្បីសន្ដិភាព»

បូជនីយដ្ឋានទាំងបីដែលត្រូវបានដាក់បញ្ជូលជាសម្បត្តិបេតិកភណ្ឌពិភពលោករួមមាន អតីតមន្ទីរឃុំឃាំងម-១៣ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ គំនិតផ្ដួចផ្ដើមនៃការដាក់បញ្ជូលនេះត្រូវបានលើកឡើងពីឆ្នាំ២០១៩ តាមអនុសាសន៍របស់អតីតនាយករដ្ឋមន្ត្រី សម្ដេចតេជោ ហ៊ុន សែន ដើម្បីបន្សល់ទុកជាមរតកប្រវត្តិសាស្ត្រនៃការចងចាំ សម្រាប់មនុស្សជំនាន់ក្រោយរាប់ពាន់ឆ្នាំតទៅមុខ៕